ސިއްޙީ ޚިދުމަތް ދިނުމުގެ ޤާނޫނަށް ހުށަހެޅި އިސްލާހަކީ މުލީއާގެއިން މެޑަމް ސާޖިދާއަށް އަމާޒުކޮށް ފޮނުވި ބިލެއް: ނާޒިލް
މި އިސްލާޙަކީ ރަނގަޅު ނިޔަތެއްގައި ކޮށްފިނަމަ ރަނގަޅު އިސްލާޙެއް
ހިތަދޫ ދެކުނު ދާއިރާގެ މެމްބަރު އިބްރާހިމް ނާޒިލް
ސިއްޙީ ޚިދުމަތް ދިނުމުގެ ޤާނޫނަށް ހުށަހެޅި އިސްލާހަކީ މުލީއާގެއިން މެޑަމް ސާޖިދާއަށް އަމާޒުކޮށް ފޮނުވި ބިލެއްކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހިމް ނާޒިލް ވިދާޅުވެއްޖެއެވެ.
މެމްބަރުން ނާޒިލް އެހެން ވިދާޅުވީ 29/2015 (ސިއްހީ ޚިދުމަތް ދިނުމުގެ ޤާނޫނަށް) ސަރުކާރުން ހުށަހަޅާފައިވާ އިސްލާޙަށް ބަހުސް ކުރައްވަމުންނެވެ.
މި އިސްލާޙުގައި ވަނީ ޑިރެކްޓަރ ޖެނެރަލް އޮފް ހެލްތް ސަރވިސަސްއަކީ ހެލްތް މިނިސްޓަރުގެ ލަފާފުޅުގެ މަތިން ސިވިލް ސަރވިސް ކޮމިޝަނުން އައްޔަނު ކުރާ ފަރާތެއް ކަމަށެވެ.
ނާޒިލް ވިދާޅުވީ، މި އިސްލާޙަކީ ރަނގަޅު ނިޔަތެއްގައި ކޮށްފިނަމަ ރަނގަޅު އިސްލާޙެއް ކަމަށާއި، ނަމަވެސް ފެންނަ ގޮތުގައި މިއީ މުލިއާގެއިން، ރައީސް ގެ އަނބިކަނބަލުން ސާޖިދާ މުޙައްމަދުއަށް ތައްޔާރު ކުރައްވާފައިވާ ބިލެއް ކަމަށެވެ.
މި އިސްލާޙުގައި ޑިރެކްޓަރ ޖެނެރަލް އައްޔަނު ކުރާ ގޮތަށް ގެންނަ ބަދަލުތަކަށް ބަލާއިރު، އެކަށީގެންވާ ބަދަލުތަކެއް ފެންނަން ނެތްކަން ނާޒިލް ފާހަގަ ކުރެއްވިއެވެ.
ވަކިން ޚާއްސަކޮށް މި ބިލުގެ މަޤްސަދަކީ ވަކި ބޭފުޅަކު ބޭނުންވާ މީހަކު މަޤާމަށް ގެނައުން ކަމަށްވެސް ނާޒިލް ވިދާޅުވިއެވެ.
މިއަދު ސަރުކާރަށް 7 މަސް ވެގެންދާއިރު ފެންނަމުންދަނީ ރައްޔިތުންނަށް އޮޅުވާލައި، ރައްޔިތުން އިތުރަށް ބިކަ ކުރަމުންދާ މަންޒަރުކަންވެސް މެމްބަރު ފާހަގަ ކުރެއްވިއެވެ.
އޭގެ އިތުރުން، ޑިރެކްޓަރ ޖެނެރަލްގެ މަސްއޫލިއްޔަތުތައް އިތުރަށް ތަފްސީލު ކުރުމާއި، ސިއްޙީ ނިޒާމުގެ މާސްޓަރ ޕްލޭނާ ގުޅޭގޮތުން ބިލުގައި ހިމަނާފައިވާއިރު، އެ މާސްޓަރ ޕްލޭނަކީ ކޮބައިކަން އިތުރަށް ސާފުވާން ޖެހޭނެ ކަމަށް އެމްޑީޕީގެ މެމްބަރުން ވިދާޅުވިއެވެ.
