ޗެކް ރިޕަބްލިކުން، ޖޯޖިއާ އާ އެއްވަރު ކޮށްފި
ގްރޫޕް އެފް ގައި މި ދެ ޓީމު ކުޅުނު ފުރަތަމަ މެޗުން، ދެ ޓީމު ވެސް ވަނީ ބަލިވެފައި.
މެޗުގައި ލަނޑު ޖެހުމަށްފަހު ޗެކް ރިޕަބްލިކްގެ ކުޅުންތެރިން އުފާ ފާޅު ކުރަނީ
ޔޫރޯ ފުޓުބޯޅަ މުބާރާތުގެ ގްރޫޕް ސްޓޭޖުގައި ޗެކް ރިޕަބްލިކާއި ޖޯޖިއާ ބައްދަލު ކުރި މެޗު އެއްވަރުވެގެން ނިމިއްޖެ އެވެ.
ގްރޫޕް އެފް ގައި މި ދެ ޓީމު ކުޅުނު ފުރަތަމަ މެޗުން، ދެ ޓީމު ވެސް ވަނީ ބަލިވެފަ އެވެ. އެހެންވެ ހޮނިހިރު ދުވަހުގެ ހަވީރު ކުޅުނު މެޗު ދެ ޓީމަށް ވެސް މުހިންމުވި އެވެ.
މެޗުގައި ފުރަތަމަ ލަނޑު ޖަަހައި ކުރި ހޯދީ ޖޯޖިއާ އިންނެވެ. އެއީ މެޗުގެ ފުރަތަމަ ހާފުގެ އިތުރު ވަގުތުގަ އެވެ. އެ ޓީމަށް ލިބުނު ޕެނަލްޓީ ކާމިޔާބުކޮށް ލީޑު ނަގައިދިނީ ޖޯޖެސް މިކައުޓްޒޭ އެވެ. އެއީ ޗެކް ރިޕަބްލިކްގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ ދިން ޕެނަލްޓީ އެކެވެ.
މެޗުގައި ޗެކް ރިޕަބްލިކުން ނަތީޖާ ހަމަހަމަ ކުރުމަށް ކުރި މަސައްކަތް ކާމިޔާބުވީ ދެ ވަނަ ހާފުގަ އެވެ. މެޗުގެ 59 ވަނަ މިނެޓުގައި އެ ޓީމަށް ނަތީޖާ ހަމަހަމަ ކޮށްދިނީ ޕެޓްރިކް ޝިކް އެވެ. އޭގެ ކުރިން ވެސް މެޗުގައި ޝިކް ވަނީ ލަނޑު ޖަހާނެ ފުރުސަތެއް ތަނަވަސްކޮށްފަ އެވެ.
މެޗު އެެއްވަރުވެ، ޗެކް ރިޕަބްލިކް އޮތީ ގްރޫޕްގެ ތިން ވަނައިގަ އެވެ. ޖޯޖިއާ އޮތީ ހަތަރު ވަނައިގަ އެވެ. ގްރޫޕް ސްޓޭޖުގެ ފަހު މެޗުގައި ޗެކް ރިޕަބްލިކް ނިކުންނާނީ ތުރުކީއާ ދެކޮޅަށެވެ. އަދި ޖޯޖިއާ ނިކުންނާނީ ޕޯޗުގަލާ ދެކޮޅަށެވެ.
