ޔޫރޯ ފުޓުބޯޅަ މުބާރާތުގެ ފުރަތަމަ މެޗުގައި ސްކޮޓެލެންޑަށް ލިބުނު ނަތީޖާއާ މެދު ވަރަށް ބޮޑަށް ނުތަނަވަސްވެފައި ހުރި ކަމަށް އެ ޓީމުގެ ކޯޗު ސްޓީވް ކްލާކް ބުނެފި އެވެ.

މުބާރާތުގެ ގްރޫޕް ސްޓޭޖުގެ ފުރަތަމަ މެޗުގައި ސްކޮޓެލެންޑުން ނިކުތީ މުބާރާތް ބާއްވާ ޤައުމު ޖަރުމަނާ ދެކޮޅަށެވެ. އެ މެޗުން ސްކޮޓްލެންޑު ބަލިވީ 5-1 އިންނެވެ.

މެޗަށްފަހު އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ކްލާކް ބުނީ، އޭނާ ހުރީ ވަރަށް ބޮޑަށް މާޔޫސްވެ، އަމިއްލަ ނަފްސަށް ވެސް ނިކަމެތިކަން އިޙުސާސް ކުރެވޭ ހިސާބުގައި ކަމަށެވެ. ކްލާކް ފާހަގަ ކުރި ގޮތުގައި ސްކޮޓްލެންޑަކީ، އެއަށްވުރެ މާރަނގަޅު ނަތީޖާ ހޯދެން ޖެހޭ ޓީމެކެވެ. އެހެންކަމުން އޭނާގެ އުންމީދަކީ ގްރޫޕް ސްޓޭޖުގައި ކުރިއަށް އޮތް ދެ މެޗުގައި ވެސް އެކަން ދައްކާލެވުން ކަަމަށް ވެސް ކްލާކް ބުންޏެވެ.

އިތުރަށް ކްލާކް ބުނީ ޖަރުމަނާ ދެކޮޅަށް ކުޅުނު މެޗު ހުރިހާ ގޮތަކުން ވެސް އުނދަގޫވާނެ ކަން އިނގޭ ކަމަށެވެ. ޚާއްސަކޮށް ޖަރުމަނާ ދެކޮޅަށް ކުޅުމާއި، ޖަރުމަނުގެ އަމިއްލަ ދަނޑުގައި ކުޅުމަކީ ސްކޮޓްލެންޑަށް ކުަރިމަތިވި އުނދަގޫތަކެއް ކަމަށް އޭނާ ސިފަ ކުރި އެވެ. މުބާރާތުގައި ކުރިއަށް ދާން ބަލާއިރު، ބާކީ އޮތް ދެ މެޗުން ހަތަރު ޕޮއިންޓު ބޭނުންވާނެކަން ފާހަގަކޮށް ކްލާކް ބުނީ، އެކަމަށް ފޯކަސްކޮށްގެން މަސައްކަތް ކުރާނެ ކަމަށެވެ.

މީގެ އިތުރުން ކްލާކް ބުނީ، ސްކޮޓްލެންޑު އަތުން މެޗު ގެއްލުނީ ވަރަށް އަވަހަށް ކަމަށެވެ. ޚާއްސަކޮށް ފުރަތަމަ ހާފުގައި ޖަރުމަނުން ތިން ލަނޑު ޖެހުމާއި، ސްކޮޓްލެންޑުގެ ކުޅުންތެރިޔަކަަށް ރަތް ކާޑު ދައްކައި ދަނޑުން ފޮނުވާލުންވީ، މެޗުގައި އިތުރަށް ކުރިއަށް ދާން އުނދަގޫވި ކަމެއް ކަމަށް އޭނާ ސިފަ ކުރި އެވެ. މުޅި މެޗަށް ބަލާއިރު، އެއީ ސްކޮޓްލެންޑަށް ލިބުނު އެންމެ ބޮޑު ގެއްލުން ކަމަށް ވެސް ކްލާކް ބުންޏެވެ.

މުބާރާތުގައި ސްކޮޓްލެންޑުގެ ދެ ވަނަ މެޗުގައި އެ ޓީމު ނިކުންނާނީ ސްވިޒަލެންޑާ ދެކޮޅަށެވެ.