ދިއްގަރު ދާއިރާގެ މެމްބަރު ނާޒިމް ސަރުކާރަށް - ކަންކަން ފޮރުވައިގެން ތިބެއްޖެ ނަމަ ރާއްޖެއަށް އޮތީ ބަނަ ދުވަސްތަކެއް!
7 ޖޫން 2024 | ހުކުރު 13:29ނާޒިމް ވިދާޅުވީ ރާއްޖޭގެ ރައްޔިތުންނަށް ތެދުބަހުން ވަރަށް ތިލަކޮށް މި ވާހަކަތައް ދެކެވެން ޖެހޭ ކަމަށް
ދިއްގަރު ދާއިރާގެ މެމްބަރު އަހްމަދު ނާޒިމް އާއި މާލިއްޔަތު ކޮމިޓީގެ ބައެއް މެންބަރުން
ރާއްޖޭގެ މާލީ ހާލަތު އޮތް ގޮތް ސަރުކާރުން އެބަ ފޮރުވައެވެ. އޭގެ ހަގީގަތް ބުނެދޭން އަބަ ފަސްޖެހެއެވެ. ރައްޔިތުންގެ މަޖިލިހުގެ ސަރުކާރު ތަމްސީލު ކުރާ މެމްބަރު އަހްމަދު ނާޒިމް ހުސްވި ހަފްތާގައި މާލިއްޔާތު ކޮމިޓީގައި ދެއްކެވި ވާހަކައިން މިކަން ސާފުކޮށް ދޭހަވެއެވެ.
ރާއްޖޭގެ މާލީ ހާލަތު އޮތް ގޮތާއި، އިގްތިސާދު ކުރިއަށްދާ މިސްރާބު ސާފުކޮށް ރައްޔިތުންނަށް އެނގެންޖެހެއެވެ. އެއީ ބޮޑު ސިއްރަކަށް ހަދައިގެން ސަރުކާރުގައި ތިބި މީހުން އުޅެންވީ ކަމެއް ނޫނެވެ.
ރައްޔިތުންގެ މަޖިލީހުގެ އިންތިޚާބާއި އަދި އޭގެ ކުރިން ބޭއްވި ރިޔާސީ އިންތިޚާބުގައި ތާއީދު ހޯދަން ޑރ. މުއިއްޒާއި އެމަނިކުފާނުގެ ޓީމުން ދެއްކި ވާހަކަ ތަކުގެ ހަގީގަތް ކިޔައިދޭންވީއެވެ. ވެރިކަން ލިބިއްޖެއެވެ. މަޖިލިސްވެސް ހިތަކަށް ލިބިއްޖެއެވެ. މަޖިލީހާއި ވެރިކަން އެވަރަށް ލިބުނީމާ ކޯޓުތައް ވެސް އަތައް ހެޔޮވަރު ކޮށްލެވޭ ވަރަށް ލިބުނީއެވެ. ބޭނުންހާ ކަމެއް ވެރިކަމުގެ އިސް ސަފުގައި ތިބި މީހުންނަށް ވީއިރު، ރައްޔިތުން މި ތިބީ ވާނުވާގައެވެ.
މިތިބީ ޑޮލަރު އެ ބުނާ ރޭޓަކަށް ހަމަ ޖެހޭނެ ދުވަހެއްގެ އިންތިޒާރުގައެވެ. 48 ގަޑީއިރު ތެރޭ ޑޮލަރުން މަސްވެރިނަށް ފައިސާ ދޭނެ އިރެއްގެ އިންތިޒާރުގައެވެ. ޑުބާއީ އާއި ބެންކޮކުން ބޭސްކޮށްލަން އާސަންދައިގެ ދަށުން ދެވޭނެ ދުވަހެއްގެ އިންތިޒާރުގައެވެ. ރަށުގައި ފަށާފައި ހުރި ހުރިހާ މަޝްރޫއެއް ބަރާބަރަށް ހިނގައިގަންނާނެ ދުވަހެއްގެ އިންތިޒާރުގައެވެ. މިފަދަ ކިތަންމެ އިންތިޒާރެކެވެ.
އިންތިޒާރުގައި ތިއްބަސް ކަންކަން ހިނގާނީ ފައިސާ ހުރެގެންނެވެ. ސަރުކާރުގައި ކަންކަން ހިންގަން ބޭނުންވާނެ ފައިސާ ހުރިހެނެއް ހިޔެއް ނުވެއެވެ. ވެރިކަމަށް އަންނަ އިރަށް ފައިސާދޭނެ ފަރާތްތައް ހުރީ ހަމަ ޖެހި ނިމިފައޭ ބުންޏަސް އެއީ ކަން ހިނގާނެ ގޮތެއް ނޫންކަން އޭރުވެސް ގަބޫލު ކުރާ މީހުން ތިބީ ގަބޫލު ކޮށްގެންނެވެ.
ދިއްގަރު ދާއިރާގެ މެމްބަރު އަހްމަދު ނާޒިމް މާލިއްޔަތު ކޮމިޓީގައި މި ވިދާޅުވަނީ، މާލީ ހާލަތު އޮތް ގޮތުގެ ވާހަކަ ދައްކަންވީ "މީޑިއާ އަށް ވެސް ހުޅުވާލައިގެންނެވެ. އެއްވެސް ކަމެއް ސިއްރު ކުރާނެ ކަމެއް ނެތެވެ."
ނާޒިމްގެ ވާހަކަ އަކީ "ރާއްޖޭގެ ރައްޔިތުންނަށް ތެދުބަހުން ވަރަށް ތިލަކޮށް މި ވާހަކަތައް ދެކެވެން ޖެހޭ ކަމަށެވެ."
ވާނޭ، ވާނޭ، ކިޔާ ދޮގު ހަދައިގެން ވަގުތު ނަގާލުމަށް ވުރެ މެމްބަރު ނާޒިމް ވިދާޅުވި ގޮތައް ރައްޔިތުންނަށް ވާނީ ކޮން ކަމެއް ކަމާއި ނުވާނީ ކޮން ކަމެއްކަން އެބަ އެނގެން ޖެހެއެވެ.
ނާޒިމްގެ ވާހަކައިން ދޭހަވީ، ހަމަ ހަގީގަތުގައިވެސް އިންތިޚާބުގެ ދުވަސްވަރު ދޮގު ހަދާ އޮޅުވާލަނީއެވެ.
މެމްބަރު ނާޒިމް ފާހަގަ ކުރެއްވީ އިންތިޚާބުގެ ފޯވަހި ނިމިއްޖެއެވެ. އެހެން ކަމުން މިހާރު މިއީ ކަންކަމުގެ ހަގީގަތާ ކުރިމަތިލާށޭ ރައްޔިތުންގެ ކައިރީގައި ބުނަންވީ ވަގުތެވެ. "ރިޔަލިޓީ އާ ކޮންފްރަންޓް ކުރަން ރައްޔިތުންނަށް ދަސްކޮށް ދޭންވީ" ވަގުތެވެ.
ހަގީގަތާ ޚިލާފު ވާހަކަތަކާ މަންޒަރު ދައްކައިގެން ބޮޑު ދެ އިންތިޚާބު ކާމިޔާބު ކޮށް ދެން ރައްޔިތުން ގާތުގައި ހަގީގަތް އޮތް ގޮތަކީ މިއީ ކަމަށް ބުނެލިޔަސް އެއީ ލައްކަ ބޮޑު ވަރެކެވެ. މި ވަރުވެސް ކޮށް ނުލާ ތިއްބާ ނާޒިމް ވިދާޅުވިހެން، "ކަންކަން ފޮރުވައިގެން ތިބެއްޖެ ނަމަ ރާއްޖެއަށް އޮތީ ބަނަ ދުވަސްތަކެއް" ކަމަށް ވެއްޖެ ނަމަ މާ ދެރަވާނެއެވެ.
