ފަސް މިލިއަން ގަސް އިންދުމުގެ މަޝްރޫއުގައި ސިމްޑީ ގުރޫޕުން ބައިވެރިވެއްޖެ
މިއީ މިމަސައްކަތް ކުރިއަށް ގެންދިއުމަށް ލިބުނު އިތުރު ބާރެއް
ފަސް މިލިއަން ގަސް އިންދުމުގެ މަޝްރޫއުގެ ތެރެއިން
ރާއްޖޭގެ ނާޒުކު ތިމާވެށި ހިމާޔަތް ކުރުމަށް ކުރިއަށް ގެންދާ ފަސް މިލިއަން ގަސް އިންދުމުގެ މަޝްރޫއުގައި ސިމްޑީ ގުރޫޕުން ބައިވެރިވެއްޖެއެވެ.
ތިމާވެށި ދުވަހާ ގުޅިގެން ކުރިއަށް ގެންދިޔަ ގަސްއިންދުގެ ޕްރޮގްރާމްގައި ސިމްޑީގެ ގިނަ އަދަދެއްގެ މުވައްޒަފުން ބައިވެރިވެ ގަސް އިންދާފައިވެއެވެ.
ހުޅުމާލެ ކޮމިއުނިޓީ އެލައެންސްއިން ބުނީ ފަސް މިލިއަން ގަސް އިންދުމުގެ މަޝްރޫއުގައި ސިމްޑީ ގުރޫޕުން ބައިވެރިވުމަކީ ލިބުނު އުފަލެއް ކަމަށާއި، މިމަސައްކަތް ކުރިއަށް ގެންދިއުމަށް ލިބުނު އިތުރުބާރެއް ކަމަށެވެ. ގަސް އިންދުމުގެ ޕްރޮގްރާމް ސިލްސިލާކޮށް ކުރިއަށް ގެންދާނެ ކަމަށާއި، ކުރިއަށް އޮތްތަނުގައި ވެސް އެއްބާރުލުން ލިބޭނެ ކަމަށް އުންމީދުކުރާ ކަމަށް އެ ޖަމިއްޔާއިން ބުނެފައިވެއެވެ.
މީގެ އިތުރުން ހުޅުމާލެ ކޮމިއުނިޓީ އެލައެންސްއިން ބުނީ ކޮންމެ މީހަކީ ވެސް ގަސް އިންދުމުގެ އިތުރުން ގަސް ހައްދާ މީހަކަށް ވާންޖެހޭ ކަމަށެވެ. ހަމައެކަނި ގަސް އިންދާ މީހަކަށްވުމުން މަގުސަދު ހާސިލް ނުވާނެ ކަމަށެވެ.
ގަސް ހައްދަން އިލްމު ހޯދަންޖެހޭކަން ފާހަގަކޮށް އެ ޖަމިއްޔާއިން ބުނީ މިމަޝްރޫއުގެ ދަށުން އިންދާ ގަސްތައް ވަރަށް ރަނގަޅަށް ބަލަހައްޓާނެ ކަމަށާއި، އެގަސްތަކާ ގުޅޭ އަޕްޑޭޓް މައުލޫމާތުތައް ފޯރުކޮށްދެމުންދާނެ ކަމަށެވެ.
ރާއްޖޭގެ ތިމާވެށީގެ ހާލަތާއި ގުޅޭގޮތުން ހުޅުމާލެ ކޮމިއުނިޓީ އެލައެންސްއިން ބުނީ ހޫނަގަދަވެ، ދިޔަވަރު ބޮޑުވެ އުދައަރައި، މޫސުމީ ގިނަ ކާރިސާތައް ހިނގަމުންދާ ކަމަށެވެ. އެހެންކަމުން ރާއްޖޭގެ ވެށި އަންނަން އޮތް ޖީލުތަކަށް ވާސިލްކޮށްދިނުމަށް މިއަދު މަސައްކަތް ކުރަންޖެހޭ ކަމަށް އެ ޖަމިއްޔާއިން ބުނެފައިވެއެވެ.
