ކްލެމެންސީ ބޯޑަށް ހަމަޖައްސާ މެންބަރެއްގެ ގޮތުގައި މެންބަރު އިބްރާހިމް ޝުޖާއު އައްޔަންކޮށްފި

ރައްޔިތުންގެ މަޖިލީހުން ކްލެމެންސީ ބޯޑަށް ކަނޑައަޅާ މެންބަރެއްގެ ގޮތުގައި ބާރަށު ދާއިރާގެ މެންބަރު އިބްރާހިމް ޝުޖާއު އައްޔަނުކުރުމަށް ފާސްކޮށްފިއެވެ.

އެ ގޮތަށް ފާސްކޮށްފައި ވަނީ އަންގާރަ ދުވަހު އޭނާ އެ ބޯޑަށް އައްޔަން ކުރުމާއި މެދު ގޮތެއް ނިންމުމަށް ނެގި ވޯޓުގައި ބައިވެރިވެވަޑައިގެންނެވި 88 މެންބަރުންގެ އިއްތިފާގުންނެވެ.

ކްލެމެންސީ ބޯޑަކީ އޭޖީ އޮފީހުގެ ދަށުުން މަސައްކަތް ކުރާ ގޮތަށް އެކުލަވާލާފައިވާ ބޯޑެކެވެ. އެ ބޯޑަކީ މާފު ދިނުމާއި އަދަބު ލުއިކޮށްދިނުމުގެ ގާނޫނުގެ ދަށުން އުފައްދާފައިވާ ބޯޑެކެވެ.

އެ ބޯޑުގައި ޖުމުލަ 11 މެންބަރުން ހިމެނެއެވެ.

އެ ބޯޑު އެކުލަވާލާފައިވާ ގޮތަށް ބަލާއިރު ސިއްހީ ދާއިރާގެ މީހަކު, ދީނީ އިލްމުގެ މީހަކު, މަދަނީ ޖަމިއްޔާގެ މީހަކު, ފުލުހުންގެ ދާއިރާގެ މީހަކު, ގާނޫނޫ ދާއިރާއިން މީހަކު, ތައުލީމީ ދާއިރާގެ މީހަކު, އިޖުތިމާއީ ދާއިރާގެ މީހަކު, ޕެރޯލް ބޯޑުގެ މީހަކު އަދި ޝަރުއީ ދާއިރާގެ މީހަކާއި ރައްޔިތުންގެ މަޖިލީހުގެ މެންބަރަކު ހިމެނެއެވެ.

ނިމިދިޔަ 19 ވަނަ މަޖިލީހުން ކްލެމެންސީ ބޯޑަށް އައްޔަނުކުރީ އިހަވަންދޫ ދާއިރާގެ މެންބަރު މުހައްމަދު ޝިފާއުއެވެ.