ސުޕަކަޕަށް ފަހު ޒިދާންގެ އަމާޒު އިތުރު ތަށިތަކާ ދިމާލަށް!
ރެއާލްގެ މެޗެއް ދެންއޮންނާނީ މި މަހުގެ 14 ވަނަ ދުވަހު
ރެއާލް މެޑްރިޑްގެ ކޯޗު ޒައިނުއްދީން ޒިދާން
ޔުއެފާ ޔުރޮޕާ ލީގުގެ ތަށި ރެއާލް މެޑްރިޑަށް ހޯދައިދިނުމަށް ފަހު އޭނާގެ އަމާޒު ހުރީ މިފެށޭ ސީޒަންގައިވެސް ރެއާލްއަށް އިތުރު ތަށިތަކެއް ހޯދައިދިނުމަށް ކަމަށް ރެއާލްގެ ކޯޗު ޒައިނުއްދީން ޒިދާން ބުނެފިއެވެ.
އަންގާރަ ދުވަހުގެ ރޭ މެންޗެސްޓާ ޔުނައިޓެޑާ ވާދަކޮށް ރެއާލްއިން މެޗު ކާމިޔާބު ކޮށްފައިވަނީ 1-2 ގެ ނަތީޖާއަކުންނެވެ. މިއީ އެޓީމުން ޔުއެފާ ސުޕާކަޕް ކާމިޔާބު ކުރި ތިންވަނަ ފަހަރެވެ.
މެޗަށް ފަހު ނޫސްވެރިންނާ ވާހަކަ ދައްކަމުން ޒިދާން ބުނެފައި ވަނީ މިއީ ސީޒަނަށް ރަނގަޅު ފެށުމެއް ކަމަށާއި ސީޒަންގައި އިތުރު ތަށިތަށް ހޯދުމަށް ގަދައަޅައި މަސައްކަތް ކުރަން ޖެހޭ ކަމަށެވެ. މީގެ އިތުރުން ވެސް ޒިދާން ވަނީ ރެއާލްގެ ސްކޮޑަކީ ވަރަށް ހުނަރުވެރި ސްކޮޑެއްކަން ފާހަގަ ކޮށްފައެވެ.
މެޗާ ބެހޭގޮތުން ވާހަކަ ދައްކަމުން ޒިދާން ވަނީ އޭނާގެ ޓީމުގެ ފަރާތުން ފެނިފައިވަނީ ވަރަށް ފުރިހަމަ ކުޅުމެއްކަން ފާހަގަކޮށް، އެ ކުޅުންތެރިން ދެއްކި ކުޅުމަށް ތައުރީފު ކޮށްފައެވެ.
މިއީ ޒިދާންގެ ކޯޗުކަމުގެ ދަށުން ރެއާލް ކާމިޔާބު ކުރި ހަވަނަ ތައްޓެވެ. ރެއާލްގެ މެޗެއް ދެންއޮންނާނީ މި މަހުގެ 14 ވަނަ ދުވަހު ސްޕެނިޝް ސުޕާކަޕްގައި ވާދަވެރި ބާސެލޯނާއާ ދެކޮޅަށެވެ.
