މި މަހު ޖަރުމަނުގައި ފަށާ ޔޫރޯ ފުޓުބޯޅަ މުބާރާތުގައި ކުޅުމަށްޓަކައި، ރިސްކެއް ނަގާނެ ކަމަށް ފްރެންކީ ޑި ޔޯން ބުނެފި އެވެ.

ސްޕެއިންގެ ބާސެލޯނާ އަށް ކުޅެމުން އަންނަ ނެދެލެންޑްސްގެ މިޑްފީލްޑަރު، މިދިޔަ އޭޕްރީލް މަހުން ފެށިގެން އުޅެނީ ކަކުލުގެ އަނިޔާއެއްގަ އެވެ. އެހެން ނަމަވެސް ޔޫރޯ ފުޓުބޯޅަ މުބާރާތަށް ނެދަލެންޑްސްގެ ކޯޗު ރޮނާލްޑޯ ކޫމަން އެކުވަލާލި، 26 ކުޅުންތެރިންގެ ސްކޮޑުގައި އޭނާ ވަނީ ހިމަނައިފަ އެވެ.

މި ސީޒަންގައި ޑި ޔޯން ބާސެލޯނާ އަށް ކުޅެދީފައި ވަނީ 30 މެޗެވެ. އޭގެ ތެރެއިން ސްޕެނިޝް ލީގުގައި އޭނާ ކުޅެފައި ވަނީ 20 މެޗެވެ. ޑި ޔޯން ވަނީ މި ސީޒަންގައި ބާސެލޯނާ އަށް ދެ ލަނޑެއް ޖަހައިދީފަ އެވެ. ކެނެޑާ އާއި އައިސްލޭންޑާ ދެކޮޅަށް ނެދަލެންޑްްސް އިން ކުޅޭ ބައިނަލްއަޤުވާމީ ރަޙުމަތްތެރިކަމުގެ މެޗުތަކުގެ ކުރިން ޓީމުގެ ކުޅުންތެރިންނާ ގުޅުނު ނަމަވެސް، މިހާތަނަށް ޓީމުގެ ފަރިތަކުރުންތަކުގައި އޭނާ ބައިވެރިވެފައި ނުވެ އެވެ.

ޑި ޔޯން ކުރިއަށް ގެންދަނީ އިންޑިވިޖުއަލް ސެޝަން ތަކެކެވެ. އެކަމާ ގުޅޭ ގޮތުން ވާހަކަ ދައްކަމުން އޭނާ ބުނީ، މިހާތަނަށް އައިއިރު އޭނާ މުޅިން ފިޓު ނޫން ކަމަށާއި، އެހެންކަމުން ކަންކަން ކުރިއަށް ދަނީ ރަނގަޅަށޭ ބުނެވެން ނެތް ކަމަށެވެ. މިވަގުތަށް ކަކޫ ރަނގަޅުކަން ފާހަގަ ކުރަމުން ޑި ޔޯން ބުނީ، އެއީ ދާއިމީ ޙައްލަކަށް ނުވާތީ ރަނގަޅަށް ރިކަވާ ވާން ޖެހޭ ކަމަށެވެ.

މިވަގުތު ޓީމާއެކު އެއްވެސް ފަރިތަކުރުންތަކެއް ކުރިއަށް ނުގެންދާ ކަމުގައި ޑި ޔޯން ބުންޏެވެ. އޭގެ ބަދަލުގައި އޭނާ އަންނަނީ އިންޑިވިޖުއަލް ތަމުރީނުތަކެއް ހަދަމުން ކަމަށް ވެސް ޑި ޔޯން ވަނީ ބުނެފަ އެވެ. ޑި ޔޯން ފާހަގަ ކުރި ގޮތުގައި އޭނާ އަށް ޖެހޭނީ ކަކުލުގެ ރިކަވާގެ ކަންކަން ކުރިއަށްދާ ގޮތް ބަލައި، އިންތިޒާރެއް ކުރުމަށެވެ. އަދި ޓީމާ ގުޅެވޭނީ ކޮން ހިސާބެއްގައިތޯ ބަލަން ޖެހޭ ކަމަށް ވެސް ޑި ޔޯން ބުންޏެވެ.

އިތުރަށް ޑި ޔޯން ބުނީ ޔޫރޯގައި އަމިއްލަ ޤައުމަކަށްޓަކައި ރިސްކު ނަގަން ވެސް އޭނާ ހުރީ ތައްޔާރަށް ކަމަށެވެ. ސަބަބަކީ ޤައުމީ ޓީމަށް ނުވަތަ ޤައުމަށް ކަމެއް ކޮށްދެވޭ ކޮންމެ ފަހަރަކު، އޭނާ އަށް އިތުރު ފަޚުރުވެރިކަމަކާއި، ހިތްހަމަ ޖެހުމެއް ލިބޭތީ ކަަމަށް ވެސް ޑި ޔޯން ވަނީ ބުނެފަ އެވެ.

ނެދަލެންޑްސްގެ ޤައުމީ ޓީމުން ޑި ޔޯން އަށް ޖާގަ ލިބުނީ 2018 ވަނަ އަހަރު އެވެ. އޭގެ ފަހުން އޭނާ ވަނީ ޤައުމީ ޓީމަށް މިހާތަނަށް ކުޅެދިން 54 މެޗުގައި ދެ ލަނޑު ޖަހައިފަ އެވެ. ނެދަލެންޑްސް އާއެކު އޭނާ ވަނީ ޔުއެފާ ނޭޝަންސް ލީގުގެ ފައިނަލްގައި ކުޅެފަ އެވެ.