ކުޑައިރު ކުޅުނީ "އަލީ ބުނީ"، ބޮޑުވީމަ ކުޅެން މި ޖެހެނީ "ރައީސް ވިދާޅުވީ!"

ނާސަރީ ދުވަސް ވަރުން ފެށިގެން، މަދަރުސީ ދައުރުގައި އެންމެ ފޯރީ ގައި ކުޅެ އުޅުނު އެއް ކުޅިވަރަކީ، "އަލީ ބުނީ" އެވެ. ތަަންކޮޅެއް އާދައިގެ ނަމެއް މި ކުޅިވަރަށް ދީފައި އޮތް ކަމަށް ވިޔަސް، ޙަގީގަތުގައި މިއީ ވަރަށް މަޖާ، އަދި އޭރު އަޅުގަނޑުމެން އެންމެ ކުޅެން ބޭނުންވި ވެސް ކުޅިވަރެވެ. ކުޅޭ ގަޑި ޖެހުމުން، މުދައްރިސް ވަޑައިގެން ކުޅެން ބޭނުން ވަނީ ކޮން ކުޅިވަރެއްތޯ އެހުމުން، ގިނަ ދަރިވަރުން ބުނަނީ ވެސް "އަލީ ބުނީ" ކުޅެން ބޭނުންވާ ވާހަކަ އެވެ.

މި ކުޅިވަރުގައި ކުރާ ކޮންމެ ކަމެއް ކުރަން ޖެހޭނީ އަލީ ބުނީމަ އެވެ. އަލީ ބުނީމަ، ދުއްވައި ގަންނާނީ އެވެ. އަލީ ބުނީމަ، ހުރި ތާކު ހުރި ގޮތަކަށް ހުއްޓެންވީ އެވެ. އަނެއްކާ ވެސް އަލީ ބުނީމަ، ދުއްވައި ގަންނަންވީ އެވެ. އަލީ ބުނީމަ، އިށީންނަންވީ އެވެ. ނުވަތަ އޮށޯންނަންވީ އެވެ. އަލީ ބުނީމަ، ބަސް އަހަންވީ އެވެ. އަލީ ބުނީމަ، ލޯ މަރަންވީ އެވެ. ލޯ މަރާގޮތަށް، ދެން އެ ލޯ ހުޅުވާލާނީ ވެސް އަލީ ބުނި އިރަކުންނެވެ. ލޯ މަރައިގެން އިނދެ، ޖެހިގެން އިން ކުއްޖާގެ ގައިގަ ކޮއްޓާލަން އަލީ ބުނެފިތަ، އެކަން ވެސް ކުރާނެ އެވެ.

މަދަރުސާގެ އިންޓަވަލް ގަޑި ޖެހުމުން، އިންޓަވަލް ދަބަހުން ސާމާނު ނަގާނީ ވެސް އަލީ ބުނީމަ އެވެ. ހުރިހާ ކުދިން ވެސް އިންޓަވަލް އަށް ގެނައި ސާމާނު މޭޒު މައްޗަށް ނަގައި، ތައްޔާރުވުމުން މުދައްރިސް ވިދާޅުވާނެ އެވެ. އަލީ ބުނީ.....! ހުރިހާ ކުދިން އެ އަޑަކުން ބުނާނެ އެވެ. "އަލީ ބުނީ ބިސްމި ކިޔާށޭ!" އެއަށްފަހު ބިސްމި ކިޔައިގެން ކާން ފަށާނެ އެވެ. އަލީ ބުނާ ގަޑި އަށް ކައި ނިންމާނެ އެވެ.

އޭގެ ފަހުން މަތީ ސާނަވީ ތަޢުލީމު ނިންމައި، އުމުރުން 22 ނުވަތަ 23 އަހަރުވެ، މީހަކާ އިންނަ ހިސާބަށް ދިޔަ އިރު ވެސް، މި ޖެހެނީ ހަމަ "އަލީ ބުނީ" ކަހަލަ ކުޅިވަރެއް ކުޅެލަ ކުޅެލައި ތިބޭށެވެ. ކުޑަ ތަފާތެއް ހުރެ އެވެ. އެއީ، އުމުރުން މިހާ ހިސާބަށް އައިއިރު، މި ކުޅިވަރު ތަރައްޤީވެ، ކުރިއެރުންތަކެއް ހޯދައިފި އެވެ. މިހާރު މި ކުޅިވަރުގައި އަލީ ބުނަނީ އެއް ނޫނެވެ. މިހާރު "ރައީސް ވިދާޅުވަނީ" އެވެ. ޒަމާނަށް އައި ބަދަލާއެކު، ކުޅިވަރަށް ވެސް ތަރައްޤީ އަތުވެއްޖެ އެވެ.

ޒަމާނީ ޑިމޮކްރަސީ އާއި ކުރިއެރުންތަކާއި، އެންމެ ފަހުގެ ގޮތްތައް އަޅުގަނޑުމެން ހޯދީ މި ޒާތުގެ ކުޅިވަރު ކުޅޭކަން ނޫނެވެ. ހުރިހާ އަސާސެއްގެ މަތީގައި ފުރިހަމަ ވެފައި އޮތް މި ޤައުމުގައި، މިއީ އަޅުގަނޑުމެން މިކަހަލަ ކުޅިވަރު ކުޅެގެން ކަންކަން ކުރަން ޖެހޭ ޒަމާނެއް ނޫނެވެ. އަޅުގަނޑުމެން ހޯދި ހޯދުންތަކާއި، ޤަބޫލު ކުރި ޤަބޫލު ކުރުންތަކަކީ، މި ޒާތުގެ ކުޅިވަރު ކުޅެގެން ހޯދަން ބޭނުންވި ކަންކަމެއް ވެސް ނޫނެވެ.

އެހެން ވިޔަސް، މިއަދު އަޅުގަނޑުމެން ކުޅެން ޖެހިފައި ވަނީ "އަލީ ބުނީ"ގެ ޒަމާނީ ކުޅިވަރު ކަމަށްވާ، "ރައީސް ވިދާޅުވީ" އެވެ. މިއަދު އަޅުގަނޑުމެންގެ ސައިކަލުތަކާއި، ކާރުތަކަށް އަޅަން ބޭނުންވާ ތެޔޮ ފޮދު ވެސް އަގު ހެޔޮ ވަނީ، "ރައީސް ވިދާޅުވީ" މައެވެ. ސްކޫލް ދަރިވަރުންނަށް ބޭނުންވާ ފޮތް ކޮޅު ވެސް ލިބެން އޮތީ "ރައީސް ވިދާޅުވީ" މައެވެ. ދިިރިއުޅުމުގައި ބޭނުން ކުރާ ކާޑުގެ ބާވަތްތައް ރަށްރަށް ލިބުން ދަތިވެ، އެކަން ވެސް ދެން ވާން އޮތީ "ރައީސް ވިދާޅުވީ" މައެވެ.

މިއަދު ގިނަ ރައްޔިތުންގެ ޝަކުވާ އަކަށް ވެފައި މި ވަނީ، ކަރަންޓު ބިލު ބޮޑުވާ މައްސަލަ އެވެ. އެއް މަހުން އަނެއް މަހަށް ކަރަަންޓު ބިލު ބޮޑުވެ، ރައްޔިތުން ތިބީ "ރަތަށް" އަރައިފަ އެވެ. ކަރަންޓު ބިލު އަތަށް ލިބުމުން، "މި މަހު ހާދަ ބޮޑުވެއްޖެޔޭ!"، "މިއީ ހަމަ އަސްލު އަރާ ވަރުތަ؟"، "ބޭނުން ކުރާ އެއްޗެއް އިތުރެއް ނުވޭ، ކަރަންޓު ބޭނުން ކުރި މިންވަރު މަދު ވިޔަސް، ބިލުގައި އޮންނަ އަދަދު ބަދަލެއް ނުވި!"، މިއީ ހަމަ ކޮންމެ ރައްޔިތެއްގެ ހިތަށް ވެސް އަރާނެ ޝުޢޫރުތަކެކެވެ. އެ ވާހަކަ އަޑު ހަރުކޮށް ނުދައްކައި މަޑުމަޑުން ތިއްބަސް، ހިތާއި ހިތުން ޝަކުވާ ނުކުރާ މީހަކު މަދުވާނެ އެވެ.

ރައްޔިތުންގެ ޝަކުވާ އާއި ކަންބޮޑުވުން އިންތިހާ އަށް އިވެން ފެށުމުން، ދެން ވާނީ "އަލީ ބުނީ" ގައިވާ ގޮތަށެވެ. ކުއްލި އަކަށް ސަރުކާރު އަދި އެކަމާ ގުޅުން ހުރި ކުންފުނިން ނޫސްވެރިންގެ ބައްދަލުވުމެއް ބާއްވާފައި ބުނާނީ، ބޮޑުވި ބިލުން ރައްޔިތުންނަށް ޑިސްކައުންޓު ދޭން ނިންމާފައިވާ ކަމަށާއި، އެއީ "ރައީސް ވިދާޅުވީ" މަ ނިންމެވި ނިންމުމެއް ކަމަަށެވެ. ރައްޔިތުންގެ އަސާސީ ޚިދުމަތުން ވެސް ކަންކަން ކުރެވެނީ، "އަލީ ބުނީ" ގައި ވާގޮތަށް، "ރައީސް ވިދާޅުވީ" މަ ކަމަށް ވަންޏާ، ދެން ދައްކާނެ ވާހަކައެއް ނެތެވެ!