ފަލަސްތީނުގެ މައްސަލައަކީ މުސްލިމުންގެ އަގީދާ އާއި ގުޅިފައިވާ ކަމެއް، އެއީ ވަކި ކުރެވޭނެ ކަމެއް ނޫން - އަޙްމަދު ޒާހިރު ޢަލީ
31 މެއި 2024 | ހުކުރު 14:45އިސްރާ އެސޯސިއޭޝަންގެ އިސްނެގުމުގެ ދަށުން މި އެއްވުން ބާއްވާފައިވަނީ ހުކުރު އާޓިފިޝަލް ބީޗް ސަރަހައްދުގަ
ފަލަސްތީނުގެ ޣައްޒާއަށް އިސްރާއީލުން ދެމުން ގެންދާ ހަމަލާތަކާ ދެކޮޅު ހެދުމަށް ގޮވާލާ ބޭއްވި ޑު އެއްވުމުގެ ތެރެއިން
ފަލަސްތީނުގެ މައްސަލައަކީ މުސްލިމުންގެ އަގީދާ އާއި ގުޅިފައިވާ ކަމެއް ކަމަށާއި އެއީ ވަކި ކުރެވޭނެ ކަމެއް ނޫން ކަަމަށް ކުރީގެ އިސްލާމިކް މިނިސްޓަރ އަޙްމަދު ޒާހިރު ޢަލީ ވިދާޅުވެއްޖެއެވެ.
އޭނާ މިހެން ވިދާޅުވީ ފަލަސްތީނަށް ނިރުބަވެރި އިސްރާއިލުން ދެމުންދާ ހަމަލާތަކާއި ދެކޮޅަށް އަޑު އުފުލުމަށް ބޭއްވި އެއްވުމުގައި ވާހަކަދައްކަވަމުންނެވެ.
އެ މަނިކުފާނު ވިދާޅުވީ އެ އެއްވުމަށް ދިވެހިން ގޮސްފައިވަނީ ފަލަސްތީނުގެ ރައްޔިތުންނަށް ލިބޭ ވޭނާއި އަނިޔާ އިހުސާސްކުރާ ހާލުގައި ކަމަށެވެ. އެ މަނިކުފާނު ވިދާޅުވީ އެއީ މުސްލިމުންގެ ލެޔާއި ގުޅިފައިވާ ކަމެއް ކަމަށެވެ. މީގެ އިތުރުން ފަލަސްތީނުގެ މައްސަލަ ވަނީ ދިވެހިންގެ ހިތާއި ގުޅި ލާމެހިފައި ކަމަށާއި އެއީ ދިވެހިންގެ ހިތުން ވަކި ކުރެވޭނެ ކަމެއް ނޫން ކަމަށް ވެސް އެ މަނިކުފާނު ވިދާޅުވިއެވެ. މިއީ ހަމައެކަނި މުސްލިމުންނާއި ދެކޮޅަށް ކުރެވޭ ހަނގުރާމައެއް ނޫން ކަަމަށާއި ޔަހޫދީން ހިންގާ މި ހަނގުރާމައަކީ މުޅި އިންސާނިއްޔަތާއި ދެކޮޅަށް ކުރާ ހަނގުރާމަ އެއް ކަމަށް އެ މަނިކުފާނު ވަނީ ވިދާޅުވެފައެވެ. މިއީ ފަލަސްތީނުގެ ނަސްލު ނައްތާލުމަށް ހިންގަމުންދާ އަނިޔާވެރި ޖަރީމާއެއްގެ ގޮތުގައި އަހުމަދު ޒާހިރު ވަނީ ސިފަކުރައްވާފައެވެ. ގާޒާގެ 80 % ގެތަށް ވަނީ ސުންނާފަތިކޮށްފައި ކަމަށާއި އެ ތަނުގައި ތިބި އާއްމުންނަށް ކާން ވެސް ލިބެނީ އެއް ފަހަރު ކަަމަށް އެ މަނިކުފާނު ވިދާޅުވިއެވެ. އެ ހުރިހާ ކަމެއް ހިނގަނީ މަސްޖިދުލް އަޤްސާ ހިމާޔަތްކުރަން ފަލަސްތީނު އާއްމުން ތިބުމުން ކަމަށާއި އެހެންކަމުން އެ މީހުންގެ ހައްގުގައި ކުރެވުނީ ކީއްތޯ ސުވާލުކުރަން ޖެހޭ ކަމަށް އެ މަނިކުފާނު ވިދާޅުވިއެވެ. އެހެންކަމުން ޔަހޫދީންނަށް ނޫނެކޭ ބުނެ އެ މީހުންނަށް ނަފްރަތު ކުރަން ޖެހޭ ކަމަށް ވެސް އެ މަނިކުފާނު ވަނީ ވިދާޅުވެފައެވެ.
އިސްރާ އެސޯސިއޭޝަންގެ އިސްނެގުމުގެ ދަށުން މި އެއްވުން ބާއްވާފައިވަނީ ހުކުރު އާޓިފިޝަލް ބީޗް ސަރަހައްދުގައެވެ. މިއެއްވުމުގެ ބައިވެރިންވަނީ ފަލަސްތީނަށް ހަމަލާދެމުން ގެންދާ ސަބަބުތަކާ ތާރީހާ ގުޅޭ ގިނަ ވާހަކަތައް ދައްކާފައެވެ. އެއީ މުސްލިމުންގެ ވަރަށް މުގައްދަސް ބިމެއްކަން ފާހަގަކޮށްފައިވެއެވެ. މިހާރު ވެސް ދިވެހިން ފަލަސްތީނަށް ވަމުން ގެންދާ އެހީތެރިކަން ފާހަގަކޮށްފައިވެއެވެ. އަދި ކުރިއަށް އޮތްތަނުގައި އިތުރަށް މަސައްކަތް ކުރުމަށް ވެސް ވަނީ ގޮވާލާފައެވެ. މީގެ އިތުރުން އިސްރާއީލްގެ އުފެއްދުންތައް ބައިކޮޓްކޮށް، އިސްރާއީލް ޕާސްޕޯޓްގައި ރާއްޖެ އެތެރެވުން މަނާކުރުމަށް ވަނީ ގޮވާލާފައެވެ. ހުކުރު ދުވަހުގެ ހަވީރު 4:00ން އިރުއޮއްސި 6:00ށް ކުރިއަށް ގެންދިޔަ މިހަރަކާތުގައި ގިނަ އަދަދެއްގެ އާއްމު ރައްޔިތުން ބައިވެރިވެފައިވެއެވެ. ކުރިއަށް އޮތްތަނުގައި ވެސް މިފަދަ ސިލްސިލާ އެއްވުންތަކާ ހިނގާލުންތައް ކުރިއަށް ގެންދާނެ ކަމަށް އިސްރާ އެސޯސިއޭޝަނުން މައުލޫމާތުދެއެވެ.
