ޔޫކްރެއިނުން ރަޝިއާ އަށް ހަމަލާ ދިނުމަށް ހުޅަނގުގެ ހަތިޔާރު ބޭނުން ކުރުމާ މެދު ނޭޓޯގެ ގައުމުތަކުން މަޝްވަރާ ކުރަނީ

ހުޅަނގުގެ ހަތިޔާރު ބޭނުން ކޮށްގެން ޔޫކްރެއިނުން ރަޝިއާ އަށް ހަމަލާ ދިނުމަށް އާނބަސް ބުނުމާ މެދު ނޭޓޯގެ ގައުމުތަކުން މަޝްވަރާ ކުރުމަށް ނޭޓޯގެ ޚާރިޖީ ވަޒީރުން ޗެކް ރިޕަބްލިކްގެ ވެރިރަށް ޕްރާގްގައި ބުރާސްފަތި ދުވަހު ބައްދަލު ކުރައްވައިފިއެވެ.

ނޭޓޯގެ ޚާރިޖީ ވަޒީރުންގެ 2 ދުވަހުގެ މި ބައްދަލުވުމުގައި ހުޅަނގުން ފޯރުކޮށްދޭ ދުރު ރާސްތާ މިސައިލް ރަޝިއާ އަށް ހަމަލާ ދިނުމަށް ބޭނުން ކުރަން ކިއެވް އަށް ހުއްދަ ދިނުމާ މެދު ފުޅާ ދާއިރާއެއްގައި މަޝްވަރާ ކުރާނެއެވެ.

މި ބައްދަލުވުން މި ބޭއްވެނީ ޔޫކްރެއިން އަށް އަރާ ތިބި ރަޝިއާ ސިފައިން ހޯދަމުންދާ ކުރިއެރުންތައް ހިފެހެއްޓުމަށް ކިއެވް އަށް ރަޝިއާ އަށް ހަމަލާ ދިނުމަށް ހުރި ހުރަސްތައް ނައްތާލަން ޖެހޭނެ ކަމަށް ބުނެ ދެކެވޭ ވާހަކަތައް އިތުރުވެފައިވާ ދަނޑިވަޅެއްގައެވެ.

ހުޅަނގުގެ ގައުމުތަކުން ޚާއްސަ ކޮށް އެމެރިކާއިން ޔޫކްރެއިނަށް ފޯރުކޮށްދީފައި ދުރު ރާސްތާ މިސައިލް ބޭނުން ކޮށްގެން ރަޝިއާ އަށް ހަމަލާ ދިނުމުގެ ހުއްދަ ދިނުމަށް ތަކުރާރުކޮށް ޔޫކްރެއިން އިން އެ ގައުމުތަކުގެ ކިބައިން އެދެމުންދާތާ ދުވަސްތަކެއް ވެއްޖެއެވެ.

އެހެން ނަމަވެސް ރަޝިއާ އިން މިކަމުގެ ބަދަލު ހިފާނެ ގޮތަކާމެދު އުފެދޭ ސުވާލު ތަކުގެ ސަބަބުން ހުޅަނގަށް މިކަމުގައި އެއް ގަލަކަށް އެރޭ ގޮތް މިހާތަނަށް އޮތީ ނުވެފައެވެ. ޔޫކްރެއިންގެ ބޯޑަރު ހުރަސްކޮށް ރަޝިއާ އަށް ހަމަލާ ދިނުމަށް އެމެރިކާ އާއި ޖަރުމަން ވިލާތުން މިހާތަނަށް ވަނީ ދެކޮޅު ހަދާފައެވެ.

އެހެން ނަމަވެސް ނޭޓޯގެ ވެރިޔާ ޖެންސް ސްޓޮލްޓެންބާރގް އަންނަނީ މެމްބަރު ގައުމުތަކުގެ ވިސްނުން ބަދަލު ކޮށް މިކަމުގެ ހުއްދަ ޔޫކްރެއިން އަށް ދިނުމަށް ތަކުރާރުކޮށް އެދެމުންނެވެ. އޭނާގެ ނަޒަރުގައި ޔޫކްރެއިނަށް ރަޝިއާ އަށް ހަމަލާދެވޭ ގޮތް ވެގެން ނޫނީ ޔޫކްރެއިން އަކަށް އަމިއްލަ ދިފާއުގައި މަސައްކަތެއް ނުކުރެވޭނެއެވެ.

އަނެއްކޮޅުން އެމެރިކާގެ ވިސްނުންވެސް މިކަމުގައި ކޮންމެވެސް ވަރަކަށް ބަދަލު ވަމުން އަންނަކަން މި ފަހަކުން ވަނީ ފާހަގަ ކުރެވިފައެވެ. އެމެރިކާގެ ޚާރިޖީ ވަޒީރު އެންތަނީ ބްލިންކަން އެމެރިކާގެ ސިޔާސަތު މިކަމުގައި ބަދަލުވެދާނެ ކަމުގެ އިޝާރާތް ވަނީ ކުރައްވާފައެވެ.

ފަރަންސޭސި ރައީސް އެމަނުއެލް މެކްރޯން ބުރާސްފަތި ދުވަހު ވިދާޅުވީ، ޔޫކްރެއިނަށް ހަމަލާ ދިނުމަށް ރަޝިއާ އިން ބޭނުން ކުރާ ބޭސް ތަކަށް ހަމަލާ ދިނުމުގެ ހައްގު ޔޫކްރެއިނަށް އޮންނަން ޖެހޭނެ ކަމަށެވެ.

ރަޝިއާގެ ރައީސް ވިލަޑިމިއަރ ޕުޓިން ވަނީ އެފަދަ ހުއްދަ އެއް ޔޫކްރެއިނަށް ދީފިނަމަ އޭގެ ނަތީޖާ ވަރަށް ގޯސްވާނެ ކަމަށް ވިދާޅުވެ ވަރަށް ވަރުގަދަ އިންޒާރެއް ހުޅަނގުގެ ގައުމުތަކަށް ދެއްވާފައެވެ.

ޔޫކްރެއިންގެ ރައީސް ވުލެޑެމިއަރ ޒެލެންސްކީ ވިދާޅުވާ ގޮތުގައި، ޔޫކްރެއިނަށް ރަޝިއާ އަށް ހަމަލާ ދެވޭނެ މަގު ފަހިވާން ޖެހޭނެއެވެ. "އެމީހުންނަށް އެމީހުންގެ ސަރަހައްދުން އަހަރެމެންގެ ސަރަހައްދަށް ހަމަލާ އެބަ ފޮނުވޭ. އަހަރެމެންނަކަށް އެކަމަކަށް އެއްވެސް ކަމެއް ނުކުރެވޭ." ޒެލެންސްކީ ވިދާޅުވިއެވެ.

ޒެލެންސްކީ ދެކެވަޑައިގަންނަވާ ގޮތުގައި ޔޫކްރެއިނަށް ފައިޓާ ޖެޓާއި، ދުރު ރާސްތާ މިސައިލް ލިބިގެން ނޫނީ ހަނގުރާމަ ރަޝިއާ ކޮޅަށް ބުރަވެފައި އޮންނަ އޮތުން ބަދަލެއް ނުކުރެވޭނެއެވެ. މިކަން ބަދަލު ކުރަން ހުޅަނގުގެ ގައުމުތަކުން ޚާއްސަކޮށް އެމެރިކާގެ އެހީއަށް އޭނާ ވަނީ އެތައް ފަހަރެއްގެ މަތިން އެދި ވަޑައިގެންފައެވެ.

ބުރާސްފަތި ދުވަހު ފެށުނު ނޭޓޯގެ ޚާރިޖީވަޒީރުންގެ ބައްދަލުވުމުގައި މިކަމާމެދު ކޮންމެވެސް ގޮތެއް ނިންމާނެ ކަމަށް ޔޫކްރެއިނުން އުއްމީދު ކުރެއެވެ.