ހދ.އަތޮޅުގެ ބައެއް ރަށްތަކަށް އައީ ލޮޅުމެއް، ބިންހެލުމެއް ނޫން - މެޓް

ހދ.އަތޮޅުގެ ބައެއް ރަށްތަކުގެ ބިންގަނޑަށް ލޮޅުމެއް އައި ނަމަވެސް، އެއީ ބިންހެލުމެއް ނޫންކަމަށް މޫސުމާއި ބެހޭ ޤައުމީ އިދާރާއިން ބުނެފިއެވެ.

މޫސުމާއި ބެހޭ ޤައުމީ އިދާރާއިން ބުނީ ހޯމަ ދުވަހުގެ ރޭ ހދ.އަތޮޅުގެ ބައެއް ރަށްތަކުގައި ބިންގަނޑަށް ލޮޅުމެއް އައި ކަމުގެ ރިޕޯޓްތައް ލިިބިފައިވާ ކަމަށެވެ. އެގޮތުން ބެލި ބެލުމުން ހދ.ހަނިމާދޫގައި ޤާއިމްކޮށްފައިވާ ބިންހެލުން ރިކޯޑްކުރާ މީޓަރަށް ރާއްޖެ ގަޑިން މިރޭ 08:27 ހާއިރު ލޮޅުމެއް ރެކޯޑް ކުރެވިފައިވާ ކަމަށް އެ އިދާރާއިން ވަނީ ބުނެފައެވެ.

ބައެއް މީޑިއާތަކުން ވަނީ އެ ސަރަހައްދަށް ބިންހެލުމެއް އައިކަމަށް ރިޕޯޓްކޮށްފައެވެ. އެކަމާއި ގުޅިގެން ރާއްޖެއެމްވީން ސުވާލުކުރުމުން މެޓް އޮފީހުގެ އޮފިޝަލަކު ވިދާޅުވީ ހދ.ގެ ބައެއް ރަށްތަކަށް އައި ލޮޅުމަކީ ބިންހެލުމެއްގެ ގޮތުގައި ރިކޯޑް ނުކުރެވޭ ކަމަށެވެ. އެހެންކަމުން ރާއްޖެ އަށް ބިންހެލުމެއް އައި ކަމަށް ބުނެ ފެތުރެމުންދާ މައުލޫމާތު ސައްޙަ ނޫންކަން އޭނާ ފާހަގަކުރެއްވިއެވެ. މީގެ އިތުރުން އެ ސަރަހައްދަށް އައި ލޮޅުމުގެ ސަބަބުން ރާއްޖެ އަށް އެއްވެސް ނުރައްކަލެއް ކުރިމަތިވާނެ ކަމަށް ލަފާނުކުރެވޭ ކަމަށް ވެސް އޭނާ ވިދާޅުވިއެވެ.