11 އައިސްޕްލާންޓުގެ ތެރެއިން ބައެއް ޕްލާންޓުތަކުގެ ޚިދުމަތް މިއަހަރުގެ ތެރޭގައި ލިބޭނެ: މިނިސްޓަރު ޝިޔާމް
26 މެއި 2024 | އާދީއްތަ 14:11މި 11 އައިސްޕްލާންޓްގެ މަސައްކަތް ނިމުމާއެކު 1880ށް އައިސް ކެޕޭސިޓީ އިތުރުވާނެ
މިފްކޯގެ ޖަރީޒާ 103 އަށް މަސްކިރަނީ
މަސް ދޯނިފަހަރަށް އައިސް ލިބުމުގައި ދިމާވާ ދަތިތަކަށް ހައްލު ހޯދުމަށް ގާއިމްކުރާ 11 އައިސްޕްލާޓްތަކުގެ ތެރެއިން ބައެއް ޕްލާންޓުތަކުގެ ޚިދުމަތް މިއަހަރުގެ ތެރޭގައި ލިބޭނެ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
ފިޝަރީޒް މިނިސްޓްރީގައި އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޝިޔާމް ވިދާޅުވީ މިއަހަރުގެ މަސްވެރިންގެ ދުވަހާ ގުޅިގެން ޑިސެންބަރު މަހުގެ 10 ވަނަ ދުވަހު ބައެއް އައިސް ޕްލާންޓުތަކުން ޚިދުމަތް ލިބޭނެ ކަމަށެވެ.
11 އައިސްޕްލާންޓްގެ މަސައްކަތް ކުރިއަށް ގޮސްފައިވާ ހިސާބަށް އިޝާރާތް ކުރައްވައި މިނިސްޓަރު ޝިޔާމް ވިދާޅުވީ މިހާރު އޮތީ ޓެންޑަރިން ޕްރޮސަސްގައި ކަމަށާއި، އެއީ 330 ޓަނު ކަމަށެވެ. މިވަގުތު ހުރީ 1550 ޓަނުގެ އައިސްކެޕޭސިޓީ ކަމަށާއި، މި 11 އައިސްޕްލާންޓްގެ މަސައްކަތް ނިމުމާއެކު 1880ށް އައިސް ކެޕޭސިޓީ އިތުރުވާނެ ކަމަށް މިނިސްޓަރު ޝިޔާމް ވިދާޅުވިއެވެ.
މަސް ދޯނިފަހަރަށް އައިސް ލިބުމުގައި ދިމާވާ ދަތިތަކަށް ހައްލު ހޯދުމަށް ކުރަމުންދާ މަސައްކަތްތަކުގެ ތެރެއިން، އިތުރު 11 ރަށެއްގައި އައިސް ޕްލާންޓު ގާއިމްކުރުމުގެ މަޝްރޫއެއް ފެށުމަށް ވާންޖެހޭ ތައްޔާރީތައް ނިމި އަމަލީ މަސައްކަތްތައް ފެށުމަށް ތައްޔާރުވެފައިވާ ކަމަށް ފިޝަރީޒް މިނިސްޓްރީން ބުނެފައިވަނީ 11 އޭޕްރީލް 2024 ގައެވެ. ނަމަވެސް އަދިވެސް މިމަޝްރޫއުގެ މަސައްކަތްތައް އޮތީ ޓެންޑަރިންގ މަރުހަލާގައެވެ.
އައިސްޕްލާންޓްތައް ގާއިމްކުރުމަށް ނިންމާފައިވަނީ ހއ.ދިއްދޫ، ހދ.ކުޅުދުއްފުށި، ށ.ފުނަދޫ، ށ.ކޮމަންޑޫ، ޅ.ނައިފަރު، އއ.ރަސްދޫ، މ.ވޭވަށް، ދ.ބަނޑިދޫ، ދ.މީދޫ، ހއ.އިހަވަންދޫ އަދި ގދ.ރަތަފަންދޫގައެވެ.
