ބަނޑޭރިކޮށީގެ އެޕާޓްމަންޓެއްގައި މަރުވެފައި އޮއްވާ ފެނުނު މީހާގެ ހަށިގަނޑު ޕޯސްޓްމޯޓަމް ހެދުމަށް ފޮނުވުމަށްޓަކައި ކުރަންޖެހޭ މަސައްކަތްތައް ފަށައިފިއެވެ.
ބަނޑޭރިކޮށީގެ އެޕާޓްމަންޓެއްގައި މަރުވެފައި އޮއްވާ ފެނިފައިވަނީ އުމުރުން 30 އަހަރުގެ ދިވެހި ފިރިހެނެއް ކަމަށް ފުލުހުން ބުނެފައިވެއެވެ. އޭނާ ފެނިފައިވަނީ މިހިނގާ މެއި މަހުގެ 13 ވަނަ ދުވަހުއެވެ.
އަދި އެ މީހާ ފެނިފައިވާ އެޕާޓްމަންޓަކީ މިވަގުތު ބޭނުންކުރަމުންދާ އެޕާޓްމަންޓެއް ނޫންކަމަށް ވެސް ފުލުހުން ބުނެފައިވެއެވެ.
ފުލުހުން ބުނީ މި މައްސަލަ އިތުރަށް ތަހުގީގުކުރުމަށް ނިންމާ، މަރުވެފައި އޮއްވާ ފެނުނު މީހާގެ އޮޓޮޕްސީއެއް ހަދަން ނިންމާފައިވާ ކަމަށެވެ.
އެކަމާ ގުޅޭ މައުލޫމާތު ހިއްސާ ކުރަމުން ބުރާސްފަތި ދުވަހު ފުލުހުން ބުނީ، އޭނާގެ ހަށިގަނޑު ޕޯސްޓްމޯޓަމް ހެދުމަށް ފޮނުވުމަށްޓަކައި ކުރަންޖެހޭ މަސައްކަތްތައް މިހާރު ކުރަމުންދާކަމަށެވެ.
