ކާރު ގަނެދޭނެކަމަށް ބުނެ މަކަރާއި ހީލަތް ހެދިކަމުގެ ތުހުމަތުގައި ފުލުހެއްގެ މައްސަލަ ބަލަން ފަށައިފިއެވެ.
މި މައްސަލައަކީ ރާއްޖެއިން ބޭރުން ކާރު ގެނެސްދޭނެ ކަމަށް ބުނެ ގިނަ ބައެއްގެ އަތުން ލާރި ނަގައި އެ ފައިސާއަށް ހިޔާނާތްތެރިވިކަމުގެ މައްސަލައެކެވެ. އަދި މި މައްސަލައިގައި ހިމެނެނީ ފުލުހުންގެ ވަޒީފާގައި އުޅޭ އޮފިސަރެކެވެ.
ސޯޝަލް މީޑިއާގައި މި ފުލުސް މީހާގެ ފޮޓޯއާއި ވަނަވަރު އާންމުކޮށް، ދައުރުކުރަމުންދާ ޕޯސްޓެއްގައި ބުނެފައިވަނީ، މި މީހާއަކީ ގިނަ އަދަދެއްގެ މީހުންނަށް ކާރު ގަނެދޭނެކަމަށް ބުނެ ފައިސާ ނަގައިގެން އުޅޭ މީހެއް ކަމަށާއި، ފުލުހުން މި މައްސަލައިގައި އެއްވެސް ކަމެއް ނުކުރާ ކަމަށެވެ.
އަދި އެތައް ބައެއްގެ އަތުން އެޑްވާންސަށް ފައިސާ ނަގައި ބޭރުން ކާރު ގެންނާނެ ކަމަށް ބުނެ ފިލައިގެން އުޅޭ މީހެއް ކަމަށެވެ.
މި މައްސަލައާއި ގުޅިގެން ފުލުހުންގެ ތަރުޖަމާނު އަހުމަދު ޝިފާން ވިދާޅުވީ ފުލުސް މީހާގެ މައްސަލަ ދިވެހި ފުލުހުންގެ ޚިދުމަތުގެ ޕްރޮފެޝަނަލް ސްޓެންޑަރޑްސް ކޮމާންޑުން ތަޙްގީގުކުރަމުންދާ ކަމަށެވެ.
