20 ވަނަ މަޖިލީހަށް އިންތިހާބުވި އެމްޑީޕީގެ މެންބަރުންނާ ރައީސް ޞާލިހު ބައްދަލުކުރައްވައިފި
މަޖިލިސް އިންތިހާބުގައި އެމްޑީޕީއަށް ވަނީ 12 ގޮނޑި ލިބިފައި
20 ވަނަ މަޖިލީހަށް އިންތިހާބުވި އެމްޑީޕީގެ މެންބަރުންނާ ރައީސް ޞާލިހު ބައްދަލުކުރެއްވީ ހޯމަ ދުވަހު
20 ވަނަ ރައްޔިތުންގެ މަޖިލީހަށް އިންތިޚާބުވި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ މެންބަރުންނާއި ކުރީގެ ރައީސް އަދި އެމްޑީޕީގެ އިސް އެޑްވައިޒަރު އިބްރާހީމް މުހައްމަދު ޞާލިހު ބައްދަލުކުރައްވައިފިއެވެ.
އެމްޑީޕީ އިން އެކްސްގައި ހިއްސާކުރި ޕޯސްޓެއްގައި ބުނެފައިވަނީ، ކުރީގެ ރައީސް ޞާލިހު ބައްދަލުކުރައްވާފައި ވަނީ މަޖިލިސް އިންތިޚާބުގައި އެ ޕާޓީގެ ޓިކެޓްގައި ވާދަކޮށް އިންތިޚާބުވި މެންބަރުންގެ ތެރެއިން މިވަގުތު މާލޭގައި ތިބި ފަރާތްތަކާ ކަމަށެވެ. ހޯމަ ދުވަހު ބޭއްވި މި ބައްދަލުވުމުގައި ދެއްކި ވާހަކަތަކުގެ ތަފްސީލް އަދި އެމްޑީޕީން ހާމަކޮށްފައެއް ނުވެއެވެ.
މިދިޔަ އެޕްރީލް މަހު 21 ގައި ބޭއްވި މަޖިލިސް އިންތިހާބުގައި އެމްޑީޕީއަށް ވަނީ 12 ގޮނޑި ލިބިފައެވެ.
ރައްޔިތުންގެ މަޖިލީހުގެ އައު ދައުރަށް އިންތިހާބުވި މެންބަރުން މި މަހުގެ 28 ވަނަ ދުވަހު ހުވާކުރުމަށް ވަނީ ހަމަޖެހިފައެވެ. މިދިޔަ މަޖިލިސް އިންތިޚާބުގައި އެމްޑީޕީ އަށް ރަނގަޅު ކާމިޔާބެއް ލިބޭ ގޮތް ވެފައިނުވާތީ އެ ޕާޓީގެ ގައުމީ މަޖިލީހުގެ ބައްދަލުވުމެއް ބާއްވާ، ނިމިދިޔަ މަޖިލިސް އިންތިޚާބުން ބަލިވި ސަބަބު ދަނެގަނެ، މަގު ޗާޓެއް އެކުލަވައިލުމުގެ މަސައްކަތް ކުރުމަށް ވަނީ ނިންމާފައެވެ.
