އެމްޑީޕީން މާލޭގައި ބާއްވާ ބޮޑު އެއްވުމާ ދިމާކޮށް، ހުކުރު ދުވަހުގެ އިރުއޮއްސި ހަޔަކުން ފެށިގެން ހުރިހާ ފުލުހުން ރެޑް އެލާޓްގައި ތިބުމަށް އަންގައިފިއެވެ.

ރާއްޖެއެމްވީ އަށް މައުލޫމާތު ލިބިފައިވާގޮތުން މި އެންގުން އައިސްފައިވަނީ، އެމްޑީޕީން ބާއްވާ އެއްވުމާ ގުޅިގެން ފުލުހުންނާއި ސިފައިންގެ އިސްވެރިން ބޭއްވި ކުއްލި ބައްދަލުވުމަކަށް ފަހުގައެވެ.

ބުރާސްފަތި ދުވަހު ސިފައިންގެ މައި އިދާރާ ބަންޑާރަކޮށީގައި ބޭއްވުނު މި މުހިންމު ބައްދަލުވުމުގައި ހޯމް މިނިސްޓަރު އަލީ އިހުސާން އާއި ޑިފެންސް މިނިސްޓަރު ޣައްސާން މައުމޫންގެ އިތުރުން ސަލާމަތީ ބާރުތަކުގެ އެންމެ އިސް ވެރިން ބައިވެރިވެވަޑައިގަތެވެ. މި ބައްދަލުވުމުގައި އެމްޑީޕީގެ އެއްވުމާ ގުޅިގެން ދިމާވެދާނެ އެކި ހާލަތްތަކުގައި އަޅާނެ ފިޔަވަޅުތަކާމެދު މަޝްވަރާކޮށް، މުހިންމު ނިންމުންތަކެއް ނިންމާފައިވާ ކަމަށް މަޢުލޫމާތު ލިބެއެވެ.

އެމްޑީޕީން ދަނީ ހުކުރު ދުވަހުގެރޭ ބާއްވާ މި ބޮޑު އެއްވުމަށް ފުރިހަމައަށް ތައްޔާރުވަމުންނެވެ. އަނެއްކޮޅުން އެއްވުމުގައި ގިނަބަޔަކު ބައިވެރިވާނެ ކަމުގެ ބިރަށް ރައީސް މުއިއްޒުގެ ސަރުކާރުން ދަނީ ދުރާލާ ފިޔަވަޅުތައް އަޅަމުންނެވެ. އެގޮތުން، ހުކުރު ދުވަހަކީ ރަސްމީ ބަންދު ދުވަހެއް ކަމުގައިވިޔަސް، އެއްވުމަށް ދާން ބޭނުންވާ ފަރާތްތަކަށް ހުރަސްއެޅުމުގެ ގޮތުން ސަރުކާރުގެ ކުންފުނިތަކާއި އިދާރާތަކުން އެދުވަހު އެކި ހަރަކާތްތައް ބޭއްވުމަށް ރާވައި، މުވައްޒަފުންނަށް އެކަމުގައި ބައިވެރިވުމަށް އަންގަމުންދާކަން ފާހަގަކުރެވެއެވެ. މީގެ އިތުރުން ބޮޑު އެއްވުމަށް ކުޑަތަންވެފައި ވަނިކޮށް އެމްޑިޕީގެ އެކައުންޓްތައް ފްރީޒްކުރަން ރައީސް މުއިއްޒުގެ ސަރުކާރުން ވަނީ ކޯޓުގައި އެދިފައެވެ.

ނަމަވެސް މިހާރުވެސް ރާއްޖޭގެ އެކި ކަންކޮޅުތަކުން ގިނަ އަދަދެއްގެ ރައްޔިތުން ވަނީ އެއްވުމުގައި ބައިވެރިވުމަށްޓަކައި މާލެ އައިސްފައެވެ. އަދާލަތު ޕާޓީން ވެސް ވަނީ މި އެއްވުމުގައި ރަސްމީކޮށް ބައިވެރިވާން ނިންމާފައެވެ. އަދި ކުރީގެ ރައީސް އިބްރާހިމް މުހައްމަދު ސޯލިހު އަދި ކުރީގެ ރައީސް މުހައްމަދު ނަޝީދު ވެސް ވަނީ ވީހާވެސް ގިނަ ރައްޔިތުން މި އެއްވުމުގައި ބައިވެރިވުމަށް ގޮވާލައްވާފައެވެ.