ފުރަތަމަ ޑިވިޝަނުގައި އަލަށް ވާދަކުރަން ތައްޔާރުވާ އޮޑި ސްޕޯޓްސް ކުލަބުން ގައުމީ ޓީމުގެ މިޑްފީލްޑަރު ހުސައިން ނިހާންގެ ސޮއި ހޯދައި ޓީމު ވަރުގަދަ ކުރަން ފަށައިފި އެވެ.
ދެ ވަނަ ޑިވިޝަނުގެ ތައްޓާއެކު ފުރަތަމަ ޑިވިޝަނަށް ކޮލިފައިވި ޓީމުން ޓީމު ވަރުގަދަ ކުރަން ފަށައި ގައުމީ ޓީމަށް ކުޅުނު ޑިފެންޑަރު މުހައްމަދު ރަޝީދު (ހޮކޭ) ވެސް ވަނީ ގެންގޮސްފަ އެވެ. އޭނާ އަކީ ދެ ވަނަ ޑިވިޝަނުގައި ވެސް އޮޑިއަށް ކުޅުނު ކުޅުންތެރިއެކެވެ. މި މުބާރާތުގައި އޭނާ ކުޅުނީ ރިޓަޔާކޮށްގެން ހުރުމަށްފަހު އެނބުރި ކުޅެން ނުކުމެ އެވެ. ހޮކޭ އަކީ ނިއުރޭޑިއަންޓާއި ވިކްޓަރީ އަދި ވެލެންސިއާ އާއި މާޒިޔާ އަށް ވެސް ކުޅުނު ތަޖުރިބާކާރު ކުޅުންތެރިއެކެވެ.
ހޮކޭގެ އިތުރުން ދެ ވަނަ ޑިވިޝަނުގައި އެ ޓީމަށް ކުޅުނު މާޒިޔާގެ މިޑްފީލްޑަރު އިބްރާހީމް ވަހީދު ހަސަން (ނޮޅިވަރަމް އިއްބެ) ވެސް ފެނުން ގާތީ އޮޑިންނެވެ. ނަމަވެސް އޭނާގެ މާޒިޔާގެ ކޮންޓްރެކްޓް އަދި ނުނިމެ އެވެ.
ވިކްޓަރީ ފާހަގަ ކުރެވުނު ނިހާން އަކީ ވެލެންސިއާ އަށް ކުޅުމަށްފަހު މާޒިޔާ އަށް މިދިޔަ ތިން ސީޒަނުގައި ކުޅުނު މޮޅު ކުޅުންތެރިއެކެވެ. މާޒިޔާ އިން އަންނަ ސީޒަނަށް ތައްޔާރުވަމުން އަންނައިރު އޭނާ ދޫކޮށްލީ ޒުވާން އައު ކުޅުންތެރިން ހޯދުމުގެ ޕްލޭނެއްގެ ދަށުންނެވެ.
