ނުކުޅެދުންތެރިކަން ހުންނަ ކުދިންނަށް ހާއްސަ ފުރަތަމަ ޕާކް ހުޅުވައިފި
މި ޕާކް ތަރައްގީ ކޮށްފައިވަނީ ސިފްކޯއާއި ގުޅިގެން
ނުކުޅެދުންތެރިކަން ހުންނަ ކުދިންނަށް ހާއްސަކޮށް ރާއްޖޭގައި ފުރަތަމަ ފަހަރަށް ހުޅުވި ޕްލޭ އޭރިއާ
ނުކުޅެދުންތެރިކަން ހުންނަ ކުދިންނަށް ހާއްސަކޮށްފައިވާ ފުރަތަމަ ޕާކު މާލޭގައި ހުޅުވައިފިއެވެ.
މި ޕާކް މާލޭގައި ހުޅުވާފައިވަނީ ކުޑަކުދިންގެ ބަގީޗާގައެވެ. ރޮޓަރީ ކްލަބް އޮފް މާލެއިން ގާއިމް ކުރި މި ޕާކް ހުޅުވާފައިވަނީ ހޮނިހިރު ދުވަހުގެ ހަވީރު ކުޑަކުދިންގެ ބަގީޗާގައި ބާއްވާފައިވާ ހަފްލާއެއްގައެވެ.
މި މަސައްކަތް ކޮށްފައިވަނީ ސިފައިންގެ ކޯޕަރޭޓްއާއި ގުޅިގެން ކުޑަކުދިންގެ ބަގީޗާގެ ތެރޭގައެވެ. އަދި ނުކުޅެދުންތެރިކަން ހުންނަ ކުދިންނަށް ހާއްސަކޮށް މިފަދަ ޕާކެއް ތަރައްގީކޮށްފައިވަނީ މިހާރު ބޭނުން ކުރަމުންދާ އެއްވެސް ޕާކެއްގައި ނުކުޅެންތެރިކަން ހުންނަ ކުދިންނަށް ވަކިން ބޭނުން ކުރެވޭ އިކުއިޕްމެންޓްސް ނުހުންނާތީ ކަމަށް ރޮޓަރީ ކްލަބުން ބުނެއެވެ.
ރޮޓަރީގެ ފަރާތުން މާލޭ ކުލަބުގެ ރައީސް އަބްދުﷲ ނާޝިދު ވާހަކަ ދައްކަވަމުން ވިދާޅުވީ މިއީ 3 އަހަރު ދުވަހުގެ ޕްރޮޖެކްޓެއްގެ މަސައްކަތް ކަމަށާއި، މިއީ ފެށުން ކަމަށެވެ. އަދި މި ޕްރޮގްރާމަށް ދީފައިވާ ނަމަކީ އިންކްލޫސިލް ޕްލޭއޭރިއާ ކަމަށެވެ.
ނާޝިދު ވިދާޅުވީ މިކަން ފެށިގެން ދިޔައީ އެމްއެންޑީއެފްގެ ސިފްކޯގެ ވަރަށް ބޮޑު އެއްބާރުލުމާ އެކީގައި ކަމަށެވެ.
ހާއްސަ އެހީއަށް ބޭނުންވާ ކުދިންގެ ބެލެނިވެރިއަކު މި ހަފްލާގައި ވާހަކަ ދައްކަމުން ބުނެފައިވަނީ 20 އަހަރު ދުވަސް ވަންދެން ކުދިން ގޮވައިގެން އުޅޭ އިރު، އެކުދިން ގޮވައިގެން ޕާކަކަށް ދިޔަޔަސް ކުޅެން އަރާލެވޭނެ އެއްޗެއް ނުހުންނަ ކަމަށެވެ. ނަމަވެސް ރޮޓަރީ ކްލަބުގެ ފަރާތުން ކުޑަކުދިންގެ ބަގީޗާގައި އިންކްލޫސިވްކޮށް އެކަން ކުރެވޭނެ ގޮތަށް ހެދުމަކީ އުފާކުރާ ކަމެއް ކަަމަށެވެ.
ރޮޓަރީ ގްރޫޕަކީ ދުނިޔޭގެ އެކި ކަންކޮޅުތަކުގައި 35،000ށް ވުރެ ގިނަ ޖަމިއްޔާ ޖަމާއަތް އެމީހުންގެ ނަމުގައި ހިންގާ ގްރޫޕެކެވެ. އެގޮތުން ސްރީލަންކާގެ ރޮޓެރީ ގްރޫޕާއި ގުޅިގެން ރާއްޖޭގައި ވެސް 2013 ވަނަ އަހަރުގެ ފެބްރުއަރީ މަހުން ފެށިގެން ދަނީ ރާއްޖޭގައި ހަރަކާތްތެރިވަމުންނެވެ. އަދި ދުނިޔޭގެ އެކި ކަންކޮޅުތަކުގައި 1.2 މިލިއަން ހިދުމަތްތެރިން ހަރަކާތްތެރިވަމުން އަންނަ އިރު، ރާއްޖޭގައި އެކަނިވެސް 30ށް ވުރެ ގިނަ ހިދުމަތްތެރިން އެބަތިއްބެވެ.
ރޮޓަރީ ކްލަބުން ބުނީ އެކްލަބްގެ އުންމީދަކީ މިފަދަ އެހެން ޕާކުތައް ރާއްޖޭގައި ގާއިމް ވެގެން ދިއުން ކަމަށާއި އެކަމަށް ޝައުގުވެރިވާ ފަރާތްތަކަށް އެ ކްލަބްގެ ފަންނީ އަދި އެހެނިހެން އެހީތެރިކަން ލިބޭނެ ކަމަށެވެ.
