ބޮޑު ޗުއްޓީގެ ދުވަސްވަރާ ދިމާކޮށް ގައިންގަޔަށް އަރާ ބަލިތައް ފެންނަ މިންވަރު އިތުރު: އެޗްޕީއޭ

ބޮޑު ޗުއްޓީގެ ދުވަސްވަރާ ދިމާކޮށް ގައިންގަޔަށް އަރާ ބަލިތައް ފެންނަ މިންވަރު އިތުރު ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި އެޗްޕީއޭގެ ޕަބްލިކް ހެލްތު ކޯޑިނޭޓަރ ސަނާ ސަލީމް ވިދާޅުވީ ޗުއްޓީ ދުވަސްވަރާއި ދިމާކޮށް ކުޑަކުދިންނާއި ބޮޑެތި މީހުން ދަތުރުފަތުރުކުރުން އިތުރުވާއިރު، މިދުވަސްވަރު ގަައިންގަޔަށް އަރާ ބަލިތައް ވެސް އިތުރުވާމުންދާކަން ފާހަގަކުރެވޭ ކަމަށެވެ.

މިދުވަސްވަރު ފެންނަމުންދާ ބަލިތަކާއި ރޯގާތަކަށް އިޝާރާތް ކުރައްވައި ސަނާ ވިދާޅުވީ ޗިކުންގުންޔާއާއި ޑެންގީގެ އިތުރުން ފާނަބަސަދަ ވެސް ފެންނަމުންދާ ކަމަށެވެ. އަދި އަރަދަފުސްރޯގާ ޖެހިގެން ރިޕޯޓު ކުރެވޭ މިންވަރު އިތުރުވެފައިވާ ކަމަށް އޭނާ ވިދާޅުވިއެވެ.

ޑެންގީއާއި ޗިކުންގުންޔާއަށް އިޝާރާތް ކުރައްވައި ސަނާ ވިދާޅުވީ މިދެ ބަލި ވެސް ޖެހެނީ އީޑީސް މަދިރިން ކަމަށާއި، ރާއްޖޭގެ ހުރިހާ ހިސާބެއްގައި މަދިރި އުޅޭއިރު، އެކަމަށް ސަމާލުވާންޖެހޭ ކަމަށެވެ. އަދި މަދިރިން ރައްކާތެރިވުމަށް މަދިރި ލޯޝަންފަދަ އެއްޗެހި ގައިގައި ހާކައި ބޮޑަށް ނިވާވާ ގޮތަށް ހެދުން އެޅުމަށް އޭނާ އިލްތިމާސްކުރެއްވިއެވެ.

ސަނާ ވިދާޅުވީ ރޯގާ ޖެހި ހުންއަންނަ ނަމަ، ޑޮކްޓަރެއްގެ ލަފާ ހޯދުމަކީ ވަރަށް މުހިންމު ކަމެއް ކަމަށެވެ. އަދި ބަލިޖެހިއްޖެނަމަ ޑޮކްޓަރަށް ދެއްކުމަށްފަހު، ގިނައިން އަރާމުކުރުމާއި މީހުން އެއްވެ އުޅޭތަންތަނަށް ނުދިއުމަށާއި ހާއްސަކޮށް އެކި ސަރަހައްދުތަކަށް ދަތުރުކުރާ ފަރާތްތަކުން މިކަންކަމަށް ސަމާލުވުމަށް އޭނާ އިލްތިމާސްކުރެއްވިއެވެ.