ސަލަމަތާއި ރައްކާތެރިކަމުގެ ގޮތުން އަދި އެންމެ ހަރަދު ކުޑަގޮތަކީ ވެސް 5 އަހަރުގެ މުއްދަތަށް ޕާސްޕޯޓް އޮތުން - އިމިގްރޭޭޝަން
10 އަހަރު ތެރޭގައި މީހެއްގެ މޫނަށް ވަރަށް ބައިވަރު ބަދަލު އާދޭ
ދިވެހި ޕާސްޕޯޓް
ސަލަމަތާއި ރައްކާތެރިކަމުގެ ގޮތުން އަދި އެންމެ ޚަރަދު ކުޑަގޮތަކީ ވެސް 5 އަހަރަށް މުއްދަތަށް ޕާސްޕޯޓް އޮތުން ކަމަށް މޯލްޑިވްސް އިމިގްރޭޝަނުން ބުނެފިއެވެ.
ޕާސްޕޯޓުގެ މުއްދަތާއި ގުޅިގެން ހުށަހެޅިފައިވާ މައްސަލައިގައި ގައުމީ ތަރައްގީއާއި ތަރިކައިގެ ކޮމިޓީގައި ވާހަކަ ދައްކަވަމުން ޑެޕިއުޓީ ޗީފް އިމިގްރޭޝަން އޮފިސަރ މުހައްމަދު ޝިފާން ވިދާޅުވީ ޕާސްޕޯޓުގެ މުއްދަތަކީ 5 އަހަރު ކަމަށާއި، އެކަމުގައި މައިގަނޑު 2 ސަބަބެއް ހިމެނޭ ކަމަށެވެ. އެއް ސަބަބަކީ ސެކިއުރިޓީ ކަމަށާއި، އަނެއް ސަބަބަކީ ފައިނޭންސްގެ ސަބަބު ކަމަށެވެ. އެގޮތުން ސެކިއުރިޓީ ސަބަބުތަކަށް ބަލާއިރު، ޕާސްޕޯޓް ހަދަނީ އިންޓަރނޭޝަނަލް ސިވިލް އޭވިއޭޝަން (އައިކާއޯ) ގެ މިންގަނޑުތަކަށް ކަމަށެވެ. އެ މިންގަނޑުތަކުގައި އޮންނަނީ 5 ނުވަތަ 10 އަހަރަށް ޕާސްޕޯޓް ދިނުމަށް ކަމަށެވެ.
ޝިފާން ވިދާޅުވީ އެކި ގައުމުތަކުގައި އަމަލުކުރަނީ އެކި ގޮތްގޮތަށް ނަމަވެސް، ރާއްޖޭގައި އަމަލުކުރަނީ ހުރިހާ ޕާސްޕޯޓަކަށް ވެސް 5 އަހަރަށް ކަމަށެވެ. އެހެން ގައުމުތަކުގައި 16 އަހަރު ނުފުރޭ ކުދިންނަށް އޮންނަނީ 5 އަހަރުން ހަދަންޖެހޭ ގޮތަށް ކަމަށާއި، 16 އަހަރު ނުވަތަ 18 އަހަރުން މަތީގައި އޮންނަނީ 10 އަހަރަށް ކަމަށެވެ. އަދި ޕާސްޕޯޓް ހަދަންޖެހޭ ފަރާތްތައް ގިނަކަމުން ބައެއް ގައުމުތަކުގައި 10 އަހަރަށް ޕާސްޕޯޓުގެ މުއްދަތު އޮތްނަމަވެސް ބެސްޓްޕްރެކްޓިސް އަކީ 5 އަހަރު ކަމަށް ޝިފާން ވިދާޅުވިއެވެ.
އެކަމުގެ ސަބަބު ކިޔައިދެއްވަމުން ޝިފާން ވިދާޅުވީ އޮޓޯ ގޭޓް ބޭނުންކުރުމަށް ތައްޔާރުވަމުން އަންނަ ކަމަށެވެ. އަދި ޕާސްޕޯޓުގެ ޗިޕްގައި ސޭވްކުރަނީ މައިގަނޑު ގޮތެއްގައި ދެ ބައޯމެޓްރިކެއް ކަމަށާއި، އެކައްޗަކީ ފިންގަރ ޕްރިންޓް އަދި އަނެއް ބަޔޯ މެޓްރިކަކީ މޫނު ކަމަށެވެ.
ޝިފާން ވިދާޅުވީ ރާއްޖޭގެ ޕާސްޕޯޓަކީ ވިސާއާއި ނުލާ ގިނަ ގައުމުތަކަށް ދަތުރުކުރެވޭ ޕާސްޕޯޓެއް ކަމަށާއި، އެހެންކަމުން ޕާސްޕޯޓް ނަހަމަގޮތުގައި ބޭނުންކުރުމުގެ ފުރުސަތު އެބައޮތް ކަމަށެވެ. ގައުމަކުން އެހެން ގައުމަކަށް ވިސާ ފްރީކުރުމަށް ހުއްދަ ދޭއިރު މައިގަނޑު 3 ކަމަކަށް ބަލާ ކަމަށާއި، އޭގެ ތެރޭގައި ހިމެނެނީ ދޭދޭ ގުޅުމާއި، ޕާސްޕޯޓުގެ އިންޓެގްރިޓީ ނުވަތަ ބާރު އަދި ރައްޔިތުންގެ އެހެން ގައުމެއްގައި ވިސާ އެބިއުސް ކޮށްގެން އުޅޭތޯ ބަލާ ކަމަށެވެ.
މީގެ އިތުރުން ޕާސްޕޯޓުގެ އަގަށް ބަލާއިރު، ޕާސްޕޯޓް ހަދަނީ 35.8 ޔޫރޯ ނުވަތަ 596 ރުފިޔާއަށް ކަމަށެވެ. އަދި ޕާސްޕޯޓުގެ ވޮލިއުމްއަކީ ނިސްބަތުން މަދު އަދަދެއް ކަމަށާއި، އެއީ ގާތްގަނޑަކަށް އެންމެ މަދުވެގެން 40،000 ކަމަށެވެ. ނަމަވެސް އަހަރަކު ޕާސްޕޯޓް އިޝޫކުރާ އަދަދު އަހަރެއްގެ މައްޗަށް 60،000ށް އަރާ ކަމަށް ޝިފާން ވިދާޅުވިއެވެ.
ޝިފާން ވިދާޅުވީ މި ހުރިހާ ސަބަބުތަކަށް ބަލާއިރު، އަދި އައިކާއޯއިން ވެސް ޕާސްޕޯޓާއި ގުޅިގެން ހަދާފައިވާ އުސޫލުތަކަށް ބަލާއިރު، އެންމެ ރަނގަޅުވާނީ 5 އަހަރަށް ޕާސްޕޯޓްގެ މުއްދަތު ބެހެއްޓުން ކަމަށާއި، އިމިގްރޭޝަންގެ ރިކޮމެންޑޭޝަނަކީވެސް އެއީ ކަމަށެވެ.
