އިންތިޚާބުތަކާއި ބެހޭ ޢާންމު ޤާނޫނުގައި ބުނާގޮތުން އިންތިޚާބު ބާއްވާތާ 10 ދުވަސްތެރޭގައި ކެމްޕެއިން ތެރޭގައި މަގުތަކުގައި ހަރުކޮށްފައިވާ ތަކެތި ނަގަންޖެހޭ
ކެމްޕެއިން ޕޯސްޓަރ
20 ވަނަ ރައްޔިތުންގެ މަޖިލީހުގެ ކެމްޕެއިނަށް މަގުތަކުގައި ހަރުކޮށްފައިވާ ތަކެތި ޤާނޫނުގައި ބުނާ މުއްދަތުގެ ތެރޭގައި ނެގުމަށް އިލެކްޝަންސް ކޮމިޝަން (އީސީ)ން އިލްތިމާސްކޮށްފިއެވެ.
އިންތިޚާބުތަކާއި ބެހޭ ޢާންމު ޤާނޫނުގައި ބުނާގޮތުން އިންތިޚާބު ބާއްވާތާ 10 ދުވަސްތެރޭގައި ކެމްޕެއިން ތެރޭގައި މަގުތަކުގައި ހަރުކޮށްފައިވާ ތަކެތި ކެންޑިޑޭޓުން ނަގަންޖެހެއެވެ. ރައްޔިތުންގެ މަޖިލީހުގެ އިންތިޚާބު ބާއްވާފައިވަނީ މިމަހުގެ 21 ވަނަ ދުވަހުއެވެ. ރައްޔިތުންގެ މަޖިލީހުގެ އިންތިޚާބުގެ ކެމްޕެއިނަށް މާލެ އާއި ހުޅުމާލޭގައި ތެރޭގައި ދިދަ ފައްޗާއި ކެމްޕެއިން ޕޯސްޓަރާއި އެކި ސައިޒްތަކުގެ ބިލް ބޯޑުތައް ވަނީ ހަރުކޮށްފައެވެ. ޚާއްސަކޮށް ބްރިޖު ސަރަހައްދުގައި ގިނަ އަދަދެއްގެ ބިލް ބޯޑުތަކާއި ޕޯސްޓަރުތައް ވަނީ ހަރުކޮށްފައެވެ.
މިކަމާއި ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން އީސީގެ މެމްބަރ ހަސަން ޒަކަރިއްޔާ ވިދާޅުވީ ކެމްޕެއިނަށް ހަރުކުރި ތަކެތި ނެގުމަށް މިހާރު ކެންޑިޑޭޓުންނާއި ސިޔާސީ ޕާޓީތަކަށް އަންގާފައިވާކަމަށެވެ. އަދި ކެންޑިޑޭޓުންނާއި ސިޔާސީ ޕާޓީތަކުން އެތަކެތި ނަގަމުން އަންނަކަމަށް ޒަކަރިއްޔާ ވިދާޅުވިއެވެ.
ޒަކަރިއްޔާ ވިދާޅުވީ ޤާނޫނުގައި ބުނާ މުއްދަތު ހަމަވާއިރު އެތަކެތި ނުނަގާ ހުރެއްޖެނަމަ އީސީން ދައުލަތުގެ އިދާރާތަކަށް އެތަކެތި ނެގުމަށް އަންގާނެކަމަށެވެ. އެގޮތުން ސިޓީ ކައުންސިލާއި ފުލުހުގައި އީސީން ރަސްމީކޮށް އެތަނެތި ނަގައިދިނުމަށް އެދޭނެކަމަށް ވިދާޅުވިއެވެ.
