މަޖިލިސް ތެރެއިންނާއި ބޭރުން ސަރުކާރު ޖަވާބުދާރީ ކުރުވުމުގައި އެމްޑީޕީ ދެމިއޮންނާނެ: ޑީޑީ

20 ވަނަ ރައްޔިތުންގެ މަޖިލީހުގެ އިންތިޚާބުން އެމްޑީޕީއަށް ކިތަންމެ މަދުން ގޮނޑި ކާމިޔާބުކުރެވުނުނަމަވެސް ސަރުކާރު ޖަވާބު ދާރީކުރުވުމުގައި މަޖިލީހުގެ ތެރެއިންނާއި ބޭރުން އެމްޑީޕީން މަސައްކަތްކުރަމުން ގެންދާނެކަމަށާއި އެކަމަށް ކުޑަވެސް ފަސްޖެހުމެއް ނާންނާނެކަމަށް އެމްޑީޕީގެ ކުރީގެ ރައީސް ޑރ އިބްރާހީމް ދީދީ (ޑރ ޑީޑީ) ވިދާޅުވެއްޖެއެވެ.

ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ޑީޑީ ވިދާޅުވީ އިންތިޚާބުތަކުން ނާކާމިޔާބީ އާ ދިމާވުމަކީ އެމްޑީޕީއަށް އައު ކަމެއް ނޫންކަމަށެވެ. އަދި ރައްޔިތުންގެ މަޖިލީހުގައި އެމްޑީޕީ ތަމްސީލުކުރާ މެމްބަރުންގެ އަދަދު މަދުވެފައިވުމަކީވެސް އެ ޕާޓީއަށް އަލަށް ކުރިމަތިވެފައިވާކަމެއް ނޫންކަމަށެވެ.

Advertisement

އެގޮތުން އައު ޤާނޫނު އަސާސީ އިސްލާހުކުރުމަށް އެކުލަވާލި ޚާއްސަ މަޖިލީހާއި ކުރީގެ ރައީސް މައުމޫން އަބްދުލްޣައްޔޫމްގެ ވެރިކަމުގައި އެންމެ ފަހުން އެކުލަވާލި މަޖިލީހުގައި އެމްޑީޕީ ތަމްސީލުކުރި މެމްބަރުންގެ އަދަދު މަދުކަމަށް ޑީޑީ ވިދާޅުވިއެވެ. ނަމަވެސް އޭރުގައި އައު ޤާނޫނު އަސާސީ އިސްލާހުކުރެވިގެންދިޔައީ އެމްޑީޕީގެ މަދު މެމްބަރުންނާއެކު އެމްޑީޕީގެ ބަސްވެސް އޭގައި ހިމެނިގެންކަމަށް ޑރ ޑީޑީ ވިދާޅުވިއެވެ.

ޑރ ޑީޑީ އިތުރަށް ވިދާޅުވީ ސަރުކާރު ޖަވާބުދާރީ ކުރުވުމުގައި އެމްޑީޕީ ފަހަތަށް ނުޖެހޭނެކަމަށާއި އެމްޑީޕީ އަކީ އެއަށްވުރެ ޒިންމާދާރު ހިންގުންތެރި ޕާޓީއެއްކަމަށެވެ. އެމްޑީޕީ އަކީ ރާއްޖޭގައި އޮތް އެންމެ ވަރުގަދަ ސިޔާސީ ޕާޓީކަން އެއީ ތާރީޚުން ފެންނަން އޮތް ހަގީގަތެއްކަމަށާއި ހަރަކާތްތަކަށް ބެލިއަސް ރައްޔިތުންނަށް ކޮށްދީފައިވާ ޚިދުމަތްތަކަށް ބެލިއަސް އެކަން ފެންނަން އޮންނާނެކަމަށް ޑރ ޑީޑީ ވިދާޅުވިއެވެ.

ޑރ ޑީޑީ ވިދާޅުވީ އެމްޑީޕީ އަކީ އޮޕަޒިޝަންގައި އޮވެ ރަނގަޅު މަސައްކަތްތަކެއް މީގެ ކުރިންވެސް ކޮށްފައިވާ ޕާޓީއެއްކަމަށެވެ. އަދި ނިމިގެންދިޔަ އިންތިޚާބުގައި އެމްޑީޕީއަށް ނާކާމިޔާބީ އާ ކުރިމަތިވީ ރަނގަޅަށް ކެމްޕެއިން ނުކުރެވިގެންކަމަށް ގަބޫލުފުޅު ނުކުރައްވާކަމަށް ޑީޑީ ވިދާޅުވިއެވެ.

ނަމަވެސް ރައްޔިތުން ވޯޓު ދިނީ އެރައްޔިތުން ނިސްބަތްވާ ރަށްރަށުގެ ތަރައްގީއަށްކަމަށާއި މީގެކުރިން އައި ޕީޕީއެމް ސަރުކާރުގައިވެސް ސަރުކާރަށް މަޖިލީހުން ގޮނޑި ލިބިފައި ނެތް ދާއިރާތަކަށް އޭރުގެ ސަރުކާރުން އަޅާލާފައިނުވާކަމަށް ޑީޑީ ވިދާޅުވިއެވެ. އެހެންކަމުން މިފަހަރުގެ ނިންމުން ރައްޔިތުން ނިންމުމުގައި މިކަމަށް ވިސްނާފައިވާކަމަށާއި ރައްޔިތުން ބޭނުންވީ ތަރައްގީގެ މަޝްރޫޢުތައް ނުހުއްޓި ކުރިޔަށްގެންދިޔުމަށްކަމަށް ޑީޑީ ވިދާޅުވިއެވެ.

ކެމްޕެއިން ތެރޭގައިވެސް މިސަރުކާރާ ރައީސުލްޖުމްހޫރިއްޔާ ޑރ މުހައްމަދު މުއިއްޒު ދައްކަވަމުން ގެންދެވި ވާހަކައަކީ އެރަށްރަށުގައި ތަރައްގީގެ މަޝްރޫޢުތައް ކުރިޔަށްގެންދިޔުމަށް މަޖިލީހުގެ މެޖޯރިޓީ ދިނުމަށްކަމަށާއި ރައްޔިތުން މިވަނީ ސަރުކާރަށް ސުޕަރމެޖޯރިޓީ ދީފައިކަމަށް ޑީޑީ ވިދާޅުވިއެވެ. އެހެންކަމުން މިހާރު މަޝްރޫޢުތައް ހުއްޓެންޖެހޭ ސަބަބެއް ނެތްކަމަށް ޑީޑީ ވިދާޅުވިއެވެ. ރައީސް މުއިއްޒުގެ ހުރިހާ ވައުދުތަކެއް މިހާރު ފުއްދެން ޖެހޭނެކަމަށް ޑީޑީ ވިދާޅުވިއެވެ.