ޗައިނާއިން ހުޅަނގާއެކު ރަނގަޅު ގުޅުމެއް ގާއިމުކުރަން ބޭނުންނަމަ ރަޝިއާއަށް އެހީ ފޯރުކޮށްދިނުން ހުއްޓައިލަންޖެހޭ: ނޭޓޯ

ޗައިނާއިން ހުޅަނގާއެކު ރަނގަޅު ގުޅުމެއް ގާއިމުކުރަން ބޭނުންނަމަ ރަޝިއާއަށް އެހީ ފޯރުކޮށްދިނުން ޗައިނާއިން ހުއްޓައިލަންޖެހޭ ކަމަށް ނޭޓޯގެ ސެކްރެޓަރީ ޖެނެރަލް ޖެންސް ސްޓޮލްޓެންބާގް ވިދާޅުވެއްޖެއެވެ.

ސްޓޮލްޓެންބާގް އެގޮތަށް ވިދާޅުވީ ޗައިނާއަށް ކުރެއްވި ދަތުރުފުޅެއްގައެވެ. ހުޅަނގުގެ އަސްކަރީ އިއްތިހާދުގެ ވެރިޔާގެ މަގާމުވެސް އަދާކުރައްވާ ސްޓޮލްޓެންބާގް ވިދާޅުވީ ސެމީކޮންޑަކްޓާ ފަދަ މަތީ ފެންވަރުގެ ޓެކްނޮލޮޖީ ފޯރުކޮށްދީގެން ރަޝިޔާގެ ހަނގުރާމައަށް ޗައިނާއިން އެހީ ދޭތީ އެ ހަނގުރާމައިގެ މަސައްކަތަށް ބެއިޖިންގެ އެހީތެރިކަން ވަރަށް މުހިންމު ކަމަށެވެ.

ޗައިނާއިން ހުޅަނގާއެކު ރަނގަޅު ގުޅުމެއް ބާއްވަން ބޭނުންވާ ކަމަށް ބުނި ނަމަވެސް، ދެވަނަ ބޮޑު ހަނގުރާމައަށް ފަހު ޔޫރަޕްގައި ހިނގާ އެންމެ ބޮޑު ހަތިޔާރު އެޅި ހަނގުރާމައަށް އެހީ ފޯރުކޮށްދެމުންވެސް ދަނީ ޗައިނާއިން ކަމަށް އޭނާ ބުންޏެވެ. އެފަދަ އެހީ ފޯރުކޮށްދޭހާ ހިނދަކު ގުޅުން ރަނގަޅު ނުކުރެވޭނެ ކަމަށްވެސް ސްޓޮލްޓެންބާގް އިންޒާރުދެއްވިއެވެ.

މިފަހުން ޗައިނާއިން ވަނީ ރަޝިއާއާއެކު އަސްކަރީ އަދި ވިޔަފާރީގެ ގުޅުން ފުޅާކޮށްފައެވެ. އެމެރިކާއިން ވަނީ އެ ދެގައުމަށްވެސް ދަތިކުރުމުގެ ފިޔަވަޅު އަޅައިފައެވެ.

ޗައިނާއާއި ރަޝިޔާއާއި ދެމެދު މިދިޔަ އަހަރު ކުރި ވިޔަފާރި ވަނީ ރެކޯޑު މިންވަރަކަށް އިތުރުވެފައެވެ. އެގޮތުން މިދިޔަ އަހަރު 240.1 ބިލިއަން ޑޮލަރުގެ ވިޔަފާރި ކުރިއިރު އެއީ އޭގެ ކުރީ އަހަރާ އަޅާބަލާއިރު 26.3 އިންސައްތައިގެ އިތުރުވުމެކެވެ.

ޗައިނާ އާއި ރަޝިއާގެ ޒަމާނީ ގުޅުމުގެ އަސްލަކީ 20 ވަނަ ގަރުނުގެ ކުރީކޮޅު ދެ ގައުމުގެ މެދުގައި އުފެދުނު ކޮމިއުނިސްޓް އިންގިލާބުތަކެވެ. މާކްސިސްޓިކް-ލެނިނިސްޓް ފިކުރުގެ ސަބަބުން އެންމެ ފުރަތަމަ 1960 ގެ އަހަރުތަކުގައި ދެ ގައުމުގެ ދެމެދުގައި އުފެދުނު ހިޔާލު ތަފާތުވުންތަކާއި ބޯޑަރުގެ މައްސަލަތަކުގެ ސަބަބުން ދެ ގައުމު ވަނީ ވަރަށް ބޮޑަށް ބައިބައިވެފަ އެވެ. ނަމަވެސް ފިނި ހަނގުރާމަ ނިމުމަކަށް އައީ 1980 ގެ އަހަރުތަކުގެ ފަހުކޮޅު، އެމެރިކާގެ ބައިނަލްއަގްވާމީ ބާރު ތައް ބެލެންސް ކުރަން ދެ ގައުމުން ވެސް މަސައްކަތް ކުރަމުން ދަނިކޮށެވެ.

އޭގެ ފަހުން ބެއިޖިން އާއި މޮސްކޯއިން ވަނީ މަޑުމަޑުން އިގްތިސާދީ އަދި ސްޓްރެޓެޖިކް ގުޅުންތައް އަލުން ބިނާކޮށް، ހިއްސާވާ ވެރިކަމުގެ ނިޒާމުތަކުގެ މައްޗަށް ގުޅުން ބަދަހިކުރުމާއި، ހުޅަނގުގެ ލިބަރަލް ޑިމޮކްރަސީއާ ދެކޮޅު ހެދުމާއި، އެމެރިކާގެ ނުފޫޒު ކަނޑުވާލަން ބޭނުންވާ ކަމަށް ބުނެފައެވެ.

ދެ ގައުމުގެ ދެމެދުގައި ވިޔަފާރީގެ މުއާމަލާތްތައް ކުރިއަރަމުން އަންނައިރު، އަސްކަރީ އެއްބާރުލުން ފުޅާވެފައިވާއިރު، އޭގެ ތެރޭގައި ޖޮއިންޓް މިލިޓަރީ އެކްސަސައިޒްތައް ވެސް ހިމެނެއެވެ.

ހުޅަނގުގެ ވަރުގަދަ ދަތިކުރުމުގެ ފިޔަވަޅުތަކުގެ ތެރޭގައި ރަޝިއާ ޗައިނާއަށް ވަރަށް ބޮޑަށް ބަރޯސާވެފައި ވަނިކޮށް، 2022 ވަނަ އަހަރު ރަޝިއާއިން ޔޫކްރެއިންއަށް އަރައިގަތުން ވެގެން ދިޔައީ ރަޝިއާއިން ވަރަށް ބޮޑަށް ޗައިނާގެ އަޅައިލުން ބޭނުންވި ކަމަކަށެވެ. ބައެއް "ޕްރެގްމެޓިކް" ޚިޔާލު ތަފާތުވުންތަކާއެކުވެސް، ދެބާރުން ވަނީ އެމެރިކާއަށް ހުރަސް އެޅުމުގެ މަޤްޞަދުގައި ހަރުކަށި އިއްތިހާދެއް އުފައްދައިފައެވެ.