އޭސީ މިލާންގެ ކޯޗުކަމުގެ މަޤާމުން ސްޓެފާނޯ ޕިއޯލީ ވަކިކުރަން އެ ކުލަބުގެ ބޯޑުން ނިންމައިފި އެވެ.

މިލާންގެ ބޯޑުން މިހެން ނިންމީ، އިޓާލިއަން ލީގުގައި ވާދަވެރި އިންޓަ މިލާނާ ދެކޮޅަށް ކުޅުނު މެޗުން މިލާން ބަލިވުމުން ކަމަށް މީޑިއާތަކުން ވަނީ ރިޕޯޓުކޮށްފަ އެވެ. މިލާންގެ ބޯޑުން ނިންމާފައި ވަނީ މިހާރު ކުރިއަށްދާ ސީޒަން ނިމުމާއެކު، ކޯޗުކަމުގެ މަޤާމުން ޕިއޯލީ ވަކި ކުރުމަށެވެ. އަދި އެ ކުލަބުން އަންނަނީ އަންނަ ސީޒަނަށް އައު ކޯޗެއް ހޯދުމުގެ މަސައްކަތް ވެސް ކުރަމުންނެވެ.

އުމުރުން 58 އަހަރުގެ ޕިއޯލީ، މިލާންގެ ކޯޗުކަމާ ހަވާލުވީ 2019 ވަނަ އަހަރު އެވެ. އޭގެ ފަހުން އޭނާގެ އިރުޝާދުގެ ދަށުން އެ ކުލަބުން ވަނީ މިހާތަނަށް 235 މެޗު ކުޅެފަ އެވެ. އޭގެ ތެރެއިން މިލާން މޮޅުވެފައި ވަނީ 129 މެޗުންނެވެ. 51 މެޗުން ބަލިވެފައިވާއިރު، 55 މެޗު ނިމުނީ އެއްވަރުވެގެންނެވެ.

ޕިއޯލީގެ އިރުޝާދުގެ ދަށުން މިލާނުން ވަނީ އިޓާލިއަން ލީގު ކާމިޔާބު ކޮށްފަ އެވެ. މިލާންގެ ކޯޗުކަމުން ޕިއޯލީ ވަކި ކުރަން ބޯޑުން ނިންމިއިރު، މި ސީޒަންގެ އިޓާލިއަން ލީގުގައި އެ ޓީމު އޮތީ ދެ ވަނައިގަ އެވެ.