ވޯޓަރސް ޓަރންއައުޓް ރަނގަޅު، މިއީ އީސީގެ ލީޑަރޝިޕް އަށް ތައުރީފް ހައްގު ކަމެއް - އޮބްޒަރވަރުން
އީސީ އަށް ރާއްޖެއިން ބޭރުގެ އޮބްޒަރވަރުންގެ ޓީމުން ވަނީ ވަރަށް ބޮޑަށް ތައުރީފްކޮށްފަ
މަޖިލިސް އިންތިޚާބު 2024
މަޖިލިސް އިންތިޚާބު 2024ގެ ވޯޓަރސް ޓަރންއައުޓް ވަރަށް ރަނގަޅުކަމަށާއި މިއީ ރާއްޖޭގެ އިލެކްޝަންސް ކޮމިޝަންގެ ލީޑަރޝިޕަށް ތައުރީފް ހައްގު ކަމެއްކަމަށް އެ އިންތިޚާބު އޮބްޒަރވްކުރި ރާއްޖެއިން ބޭރުގެ ފަރާތްތަކުން ބުނެފިއެވެ.
މި އިންތިޚާބުގައި ފާހަގަކުރެވުނު ކަންތައްތަކާއި ގުޅޭގޮތުން ހޯމަ ދުވަހު ރާއްޖެއިން ބޭރުގެ އޮބްޒަރވަރުންގެ ޓީމުން ވަނީ ނޫސްވެރިންގެ ބައްދަލުވުމެއް ބާއްވާފައެވެ. އެ ބައްދަލުވުމުގައި ފިލިޕިންސްގެ އިލެކްޝަންސް ކޮމިޝަނަރ ނެލްސަން ޖީ ސެލިސް ވިދާޅުވީ ގިނަ އަދަދެއްގެ ބަޔަކު ވޯޓުލާން ނުުމެފައި ވުމަކީ ފާހަގަކޮށްލެވޭ ކަމެއް ކަމަށެވެ. ރިޔާސީ އިންތިޚާބަށް ވުރެ ނިސްބަތުން މަދު ބަޔަކު ވޯޓުލާން ނުކުތް ނަމަވެސް މި މަޖިލިސް އިންތިޚާބުގައި ވޯޓުލީ މީހުންގެ އަދަދަކީ އެކަށީގެންވާ ފަދަ ރަނގަޅު އަދެއް ކަމަށް އޭނާ ވަނީ ވިދާޅުވެފައެވެ. އޭނާ ވަނީ އެކަން އެގޮތަށް ހިނގީ އީސީން ވެސް އެކަށީގެންވާ ފަދަ މަސައްކަތްތަކެއް ކުރުމުގެ ސަބަބުންކަމަށް ޤަބޫލުކުރައްވާ ކަމަށް ވިދާޅުވެފައެވެ. އަދި ރާއްޖޭގެ އީސީގެ މަސައްކަތްތަކުން އެ ޓީމަށް ވެސް ވަރަށް ގިނަ ކަންކަން ދަސްވި ކަމަށް އޭނާ ވިދާޅުވިއެވެ. އެގޮތުން ރީ ރެޖިސްޓްރޭޝަންގެ މަރުހަލާ ކުރިއަށް ގެންގޮސްފައި ވަނީ ވަރަށް ހަރުދަނާކޮށް ކަމަށާއި އެއީ އެހެން ޤައުމުތަކަށް ނަމޫނާ އެއް ކަމަށް އޭނާ ވިދާޅުވިއެވެ.
އޭނާ އިތުރަށް ވިދާޅުވީ މަޖިލިސް އިންތިޚާބުގެ އިންތިޒާމްތައް ވަރަށް ފުރިހަމަ ކަމަށެވެ. އަދި އިންތިޚާބުގައި ޓެކްނޮލޮޖީގެ ބޭނުން ހިފާފައިވާ ގޮތް ވެސް ވަރަށް ރަނގަޅު ކަމަށް އޭނާ ވިދާޅުވިއެވެ. އެގޮތުން ވޯޓުލާ މީހާ އަކީ ކާކުކަން ދެނެގަތުމާއި، ވޯޓުލާ މީހުންގެ އަދަދު އަޕްޑޭޓްކޮށް އަދާހަމަކުރުމުގައި ގެންގުޅެފައިވާ ނިޒާމް ވަރަށް އަވަސްވެފައި ފުރިހަމަކަމަށް އޭނާ ވިދާޅުވިއެވެ. އެކަން އެގޮތަށް ހިނގާފައި ވަނީ އީސީން ޓެކްނޮލޮޖީގެ ބޭނުންކޮށްގެން އިންތިޚާބުގެ ކަންކަން ހަމަޖައްސާފައިވުމުން ކަމަށް އޭނާ ވިދާޅުވިއެވެ.
ރާއްޖެއިން ބޭރުގެ އޮބްޒަރވަރުންގެ ޓީމުން ވަނީ ވަރަށް ބޮޑަށް އިލެކްޝަންސް ކޮމިޝަނަށް ތައުރީފްކޮށްފައެވެ.
