މެންޗެސްޓާ ސިޓީ އަށް ތަށި ދިފާއު ނުކުރެވި ޗެމްޕިއަންސް ލީގު ފުޓްބޯޅަ މުބާރާތުން ރޭ ކެޓި ނަމަވެސް ކުޅުންތެރިންގެ މަސައްކަތާމެދު ވަރަށް ހިތްހަމަޖެހޭ ކަމަށް ކޯޗު ޕެޕް ގާޑިއޯލާ ބުނެފި އެވެ.

އޭނާ ބުނީ ފުރަތަމަ މެޗުގައި 3-3އިން އެއްވަރުވުމަށްފަހު ރޭ ކުޅުނު މެޗު 1-1އިން އެއްވަރުވެ ޕެނަލްޓީ ޖަހައިގެން ރެއާލް މެޑްރިޑް އަތުން ޕެނަލްޓީ ޖަހައިގެން 4-3އިން ބަލިވުން ދެރަވި ކަމަށެވެ.

އޭނާ ބުނީ ނަތީޖާ ނެރެން ރޭގެ މެޗުގައި ފުރުސަތު ލިބުނު ކަމަށާއި ނަމަވެސް ލިބޭ ފުރުސަތުގެ ބޭނުން ނުކުރެވިއްޖެނަމަ ގޭމް ކޮންޓްރޯލްކޮށް ޖެހި ޕާސްތަކާއި ގޯލަށް ފޮނުވާލި ހަމަލާތަކަކީ އެއްވެސް އެއްޗަކަށް ފަހު ވަގުތު ނުވާ ކަމަށެވެ.

މި ބައްޔާއެކު ސިޓީއަށް ވަނީ ޖެހިޖެހިގެން ދެ ވަނަ ސީޒަނެއްގައި ތިން ތަށި ކާމިޔާބު ކުރުމުގެ ފުރުސަތު ގެއްލިފަ އެވެ. އެ ޓީމަށް މި ސީޒަނުގައި ބާކީ އޮތީ އިނގިރޭސި ޕްރެމިއާ ލީގާއި އިނގިރޭސި އެފްއޭކަޕެވެ.

ޑިފެންޑަރު ރުބެން ޑިއާސް މެޗަށް ފަހު ބުނީ ދެން އޮތީ ސީޒަނުގައި ކާމިޔާބު ކުރެވެން ހުރީ ކޮންކަމެއްތޯ ބަލައި އަވަހަށް މި ބަލިން އަރައިގަތުން ކަމަށެވެ.

މުބާރާތުގެ ސެމީ ފައިނަލުގައި 14 ފަހަރުގެ ޗެމްޕިއަން ރެއާލް ކުޅޭނީ ހަ ފަހަރު މުބާރާތް ކާމިޔާބުކޮށްފައިވާ ޖަރުމަނުގެ ބަޔާން މިއުނިކާ އެވެ.