މިނިސްޓަރު ހަލީލާއި އަމީން ޕީއެންއެފްގެ މެންބަރުންނަށް ރިޝްވަތު ހުށަހެޅި - މަލީހު
ޕީއެންއެފްގެ ކެންޑިޑޭޓުންނަށާއި، މިނިވަން ކެންޑިޑޭޓުންނަށް ގުޅާފައި ރިޝްވަތު ހުށަހަޅަމުންދޭ
ޓްރާންސް ޕޯޓް މިނިސްޓަރ އަމީން (ވ) ހެލްތް މިނިސްޓަރ ޚަލީލް (ކ)
ހެލްތް މިނިސްޓަރު ޑރ. އަބްދުﷲ ހަލީލާއި ޓްރާންސްޕޯޓް މިނިސްޓަރު މުހައްމަދު އަމީން ޕީއެންއެފްގެ މެންބަރުންނަށް ރިޝްވަތު ހުށަހަޅާ ސަރުކާރަށް ތާއީދުކުރުމަށް އެދެމުންދާ ކަމަށް ޕީއެންއެފްގެ ސެނެޓަރު މުހައްމަދު މަލީހު ޖަމާލު ވިދާޅުވެއްޖެއެވެ.
ޕީއެންއެފްގެ ޖަގަހަ ޖަލްސާފައި ވާހަކަދައްކަވަމުން މަލީހު ވިދާޅުވީ މިއަދު ފެނިގެންދަނީ ވަޒީފާގެ އަޅުންނާއި ފިކުރުގެ ގައިދީންނަށް ދިވެހިރައްޔިތުން ހަދައިގެން މުޖްތަމުގައި ޕްރޮޑަކްޓެއްގެ ގޮތުގައި ބޭނުންކުރަމުންދާތަން ކަމަށެވެ. މަލީހު ވިދާޅުވީ އެއީ ދެކެން ބޭނުންވާ މަންޒަރެއް ނޫން ކަމަށާއި، ކޮންމެ ރައްޔިތަކަށްވެސް އެ މީހަކު ބޭނުންވާ މީހަކަށް ވޯޓު ދިނުމުގެ ހައްގު އޮންނަންޖެހޭ ކަމަށެވެ.
މަލީހު ވިދާޅުވީ ހެލްތް މިނިސްޓަރ ޑރ. އަބްދުﷲ ޚަލީލް، ޕީއެންއެފްގެ ކެންޑިޑޭޓުންނަށާއި، މިނިވަން ކެންޑިޑޭޓުންނަށް ގުޅާފައި ރިޝްވަތު ހުށަހަޅަމުންދާ ކަމަށެވެ. އެއީ ސަރުކާރުގެ މިނިސްޓަރެއް ކަމަށާއި، ގާނޫނު އަސާސީއާއި އެއްގޮތްވާގޮތުގެ މަތިން ހުންނެވީ ވަޒީރުގެ ކަމުގެ ހުވާ ކުރައްވައިގެން ކަމަށެވެ.
ޕީއެންއެފުން ބުނެފައިވަނީ ސަރުކާރުން ރިޝްވަތު ހުށަހެޅުން ވަނީ އާންމު ކަމަކަށްވެފައި ކަމަށައި، ކެބިނެޓް މިނިސްޓަރުން އިސްވެތިބެ އެކަންކަން ކުރަމުން އަންނަ ކަމަށެވެ. އެގޮތުން ޕީއެންއެފްއިން މަޖިލީހުގެ އިންތިހާބުގައި ވާދަކުރާ ކެންޑިޑޭޓުންނާއި ސްޓޭޓް މިނިސްޓަރުކަމުގެ މަގާމާއި، ފައިސާ ހުށަހަޅާފައިވާ ކަމަށެވެ.
ސަރުކާރުން ކޮރަޕްޝަން އާންމު އާދައިގެ ކަމަކަށް ހަދާފައިވާ ކަމަށާއި، މި ސަރުކާރު ގެނައީ އެކަން ހުއްޓުވަން ނަމަވެސް، އެކަންކަން ފާލުން ނެއްޓިފައިވާ ކަމަށެވެ. އަދި ދިވެހިންގެ ފައިސާ ބޭނުންކުރަމުންދަނީ އެންމެ ދިވެއްސެއްގެ މަސްލަހަތަށްޓަކައި ކަމަށެވެ.
