ބައެއް ޓީމުތަކަށް އިންސާފުން ބޭރުން ކަންކަން ކުރާ ކަމުގެ ތުހުމަތުތަކާހުރެ ތުރުކީ ލީގުގައި ވީއޭއާރު ޗެކްކުރުމަށް ބިދޭސީ ރެފްރީން ހަމަޖައްސައިފި އެވެ.
ތުރުކީ ލީގަކީ މި ފަހަކަށް އައިސް އެންމެ ގިނައިން ސަޕޯޓަރުން ދަނޑަށް އަރައި ހުއްޓުވި ލީގެކެވެ.
އެ ލީގުން ނެރުނު ބަޔާނުގައި ބުނެފައިވަނީ މިހާރު ކުރިއަށްދާ ސީޒަން ނިމެންދެން ގަދަ މެޗުތަކުގައި ވީއޭއާރު ބަލަހައްޓާނީ ބިދޭސީ ރެފްރީން ކަމަށެވެ.
ތުރުކީގެ ފެނަބާޗޭގެ ރައީސް މީގެ ކުރިން ބުނެފައިވަނީ މެޗުތަކުގެ ނަތީޖާ ކަނޑައަޅަނީ ރެފްރީން ބޭނުންކޮށްގެން އަންޑަ ގްރައުންޑް ނެޓްވޯކްތަކުން ކަމަށެވެ.
ފެންބާޗޭ ވަނީ ތުރުކީ ސުޕަކަޕުގައި ގަލަޓަސަރާއީއާ ދެކޮޅަށް ކުޅުނު މެޗު ހުއްޓާލާފައި ދަނޑުން ފޭބުމުން 98450 ޕައުންޑުން ޖޫރިމަނާވެސްކޮށްފަ އެވެ.
ތުރުކީ ފުޓްބޯޅަ ފެޑަރޭޝަނުން ބުނީ މިފަދަ މައްސަލަތަކާހުރެ ޔޫރަޕުގެ އެކި ގައުމުތަކާއެކު ވީއޭއާރު ޗެކް ކުރުމަށް ރެފްރީން ހޯދުމުގެ މަސައްކަތް މިހާރު ފަށާފައިވާ ކަމަށެވެ. މި ގޮތުން ރެފްރީން ހަމަޖައްސާނީ ސްޕޭނާއި އިޓަލީ އާއި ޖަރުމަނާއި ނެދަލޭންޑްސް އާއި ޕޯޗުގަލްއިން ކަމަށް ވެސް ވަނީ ބުނެފަ އެވެ.
ތުރކީގެ ފެނަބާޗޭއިން ވަނީ ޔޫރޮޕާ ލީގުގައި ބުރާސްފަތި ދުވަހު ކުޅެންޖެހޭ މެޗެއް އޮއްވައި ސުޕަކަޕް މެޗު ޝެޑިއުލް ކުރުމުން އެކަމާ ހިތްހަމަނުޖެހުން ފާޅުކޮށްފަ އެވެ. އަދި މެޗަށް ބިދޭސީ ރެފްރީއަކު ހަމަޖެއްސުމަށް ވެސް އެކުލަބުން ވަނީ ގޮވާލައިފަ އެވެ. ނަމަވެސް ފަހުން ވަނީ މިވާހަކަ ދޮގުކޮށްފަ އެވެ.
މިދިޔަ މާޗު މަހު ފެންބާޗޭ އާއި ޓްރަބްޒޮންސްޕާ ކުޅުނު މެޗުގައި ސަޕޯޓަރުން ދަނޑަށް އަރައި ވަނީ ބައެއް ކުޅުންތެރިންނަށް ވެސް ހަމަލާދީފަ އެވެ.
