އެޓްލާންޓާއިން ލިވަޕޫލް ރޮއްވާލައިފި

އިޓަލީގެ އެޓްލާންޓާއިން ލިވަޕޫލް 3-0އިން ބަލިކޮށް ޔޫރޮޕާ ލީގުގެ ސެމީ ފައިނަލާ ގާތަށް ޖެހިލައިފި އެވެ.

ދެ ޓީމަށް ވެސް ގޯލު ޖަހާން ރަނގަޅު ފުރުސަތުތައް ލިބުނު މެޗުގައި ފުރަތަމަ ދެ ގޯލު ޖެހީ ސްކަމާކާ އެވެ. މެޗު ނިމެން ހަތް މިނިޓަށްވީ ފަހުން ފަހު ގޯލު ޖެހީ ޕަސަލިކެވެ. ލިބަޕޫލްގެ މުހައްމަދު ސަލާހް ޖެހި ގޯލު ރެފްރީ ނިންމީ އޮފަސައިޑް ކަމަށެވެ.

މި ބައްޔާއެކު ލިވަޕޫލަށް ސެމީ ފައިނަލަށް ދެވޭނީ އަންނަ ހަފުތާގައި އިޓަލީގައި ކުޅޭ މެޗު 4-0އިން ކާމިޔާބުކޮށްގެންނެވެ.

މެޗަށް ފަހު ލިވޕޫލްގެ ކެޕްޓަން ވާޖިލް ވެންޑައިކް ބުނީ ބަލިވީ ވަކިވަކި ކުޅުންތެރިންގެ މިސްޓޭކް މާގިނަވުމުން ކަމަށެވެ.

އޭނާ ބުނީ މެޗުގައި ލިވަޕޫލުން ތިބީ އިދިކޮޅު ޓީމަށް ޖާގަ ހުސްކޮށްދީގެން ކަމަށާއި ބޯޅަތައް އަމިއްލަ އަތުން ގެއްލިދިޔައީ ނުރައްކާތެރި ހިސާބުތަކުން ކަމަށެވެ.

މި ސީޒަނުގެ ނިމުމަކާ ގާތްވެފައިވާއިރު ލިވަޕޫލުގެ ފޯމު ވަނީ ދަށްވެފައި ކަމަށް ގިނަ ބަޔަކު ގަބޫލުކުރެ އެވެ. އަދި މި ބައްޔާއެކު ލިވަޕޫލް އަމިއްލަ ދަނޑުގައި ބަލިނުވެ ދަމަހައްޓަމުން އައި ސިލްސިލާ ވަނީ ނިމުމަކަށް އައިސްފަ އެވެ. އެއީ 34 މެޗާއި 415 ދުވަހަށް ފަހު އެވެ.