ކަނޑައަޅާފައިވާ އަގަށްވުރެ ބޮޑު އަގުނަގާ ޓެކްސީ ރިޕޯޓްކުރުމަށް ކިޔުއާރު ކޯޑެއް
ސަރުކާރުން ކަނޑައަޅާފައިވާ އަގުތަކަށް ވުރެ ބޮޑު އަގުގައި ޓެކްސީ ދަތުރު ކުރުމުގެ ޝަކުވާ ލިބެމުންދޭ
ޓެކްސީ
މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަނުން ޓެކްސީގެ ޚިދުމަތްތަކަށް ކަނޑައަޅާފައިވާ އަގަށްވުރެ ބޮޑުކޮށް، ޤަވައިދާ ޚިލާފަށް އަގުނަގާ ޓެކްސީތައް ރިޕޯޓުކުރުމަށް އެ ވުޒާރާއިން ކިއުއާރުކޯޑެއް ތައާރަފުކޮށްފިއެވެ.
ޓްރާންސްޕޯޓް މިނިސްޓްރީން އެކްސްގައި ކުރި ޕޯސްޓެއްގައި ބުނެފައިވަނީ ސަރުކާރުން ކަނޑައަޅާފައިވާ އަގުތަކަށް ވުރެ ބޮޑު އަގުގައި ޓެކްސީ ދަތުރު ކުރުމުގެ ޝަކުވާ ލިބެމުންދާ ކަމަށާއި އެކަމަކީ މަނާކަމެއް ކަމަށެވެ. މިފަދަ މައްސަލަތައް ރިޕޯޓު ކުރުމަށް، ކިއު އާރު ކޯޑު މެދުވެރިކޮށް ސްކޭން ކުރެވޭނެކަމަށް ޓްރާންސްޕޯޓް މިނިސްޓްރީން ބުނެއެވެ.
މިނިސްޓްރީން ބުނީ މި ކިއު އާރު ކޯޑުން، ފަސިންޖަރުން ދަތުރުކުރަން ބޭނުންވާ މަންޒިލަށް ދިއުމަށް ޑްރައިވަރު އުޒުރުވެރިވާނަމަ ވެސް ރިޕޯޓުކުރެވޭނެކަމަށެވެ.
ބައެއް ޓެކްސީ ޑްރައިވަރުން އަމިއްލައަށް އެކި އަގުތައް ނަގާ މައްސަލަ ހައްލުކުރުމުގެ މަސައްކަތް ޓްރާންސްޕޯޓް މިނިސްޓްރީން މިދިޔަ މަހު ފަހުކޮޅު ވަނީ ފަށާފައެވެ.
މާލެ ސަރަހައްދުގައި ދަތުރު ކުރުމަށް މިނިސްޓްރީން ވަކި އަގުތަކެއް ކަނޑައަޅާފައި ވީނަމަވެސް ބޮޑު އަގުގައި ދަތުރުކުރާ މައްސަލަ އަބަދުވެސް އަންނަނީ ފެންމަތިވަމުންނެވެ.
ޓެކްސީ ދަތުރުތަކަށް ސަރުކާރުން ކަނޑައަޅާފައިވާ އަގުތަކަކީ، މާލެއިން ހުޅުމާލެ ދެވަނަ ފިޔަވައްސަށް 100 ރުފިޔާ، މާލެއިން ހުޅުމާލެ ފުރަތަމަ ފިޔަވައްސަށް 85 ރުފިޔާ، މާލެއިން ވެލާނާ އިންޓަނޭޝަނަލް އެއާޕޯޓަށް 70 ރުފިޔާ، ހުޅުމާލެ ފުރަތަމަ ފިޔަވަހިން އެއާޕޯޓަށް 80 ރުފިޔާ ،ހުޅުމާލެ ދެވަނަ ފިޔަވަހިން އެއާޕޯޓަށް 85 ރުފިޔާ އަދި މާލެ ތެރޭގެ ދަތުރެއްނަމަ 30 ރުފިޔާއެވެ.
