ތަދަކާއި ނުލައި ފުޓްބޯޅަ ކުޅުނު ހަނދާނެއްވެސް ނެތް: ޖެސޫސް

ކޮންމެވެސް ވަރެއްގެ އަނިޔާގައި ހުރެގެން ނޫނީ އޭނާ ފުޓްބޯޅަ ކުޅުނު ދުވަހެއް ހަނދާންނުވާ ކަމަށް އާސެނަލްގެ ފޯވަޑް ގަބްރިއަލް ޖެސޫސް ބުނެފި އެވެ.

އޭނާ މިހެން ބުނީ ޗެމްޕިއަންސް ލީގުގައި ޖަރުމަނުގެ ބަޔާން މިއުނިކާ ދެކޮޅަށް ކުޅޭ މެޗުގެ ކުރިން ވާހަކަ ދައްކަމުންނެވެ. ޖެސޫސްގެ ކަކުލަށް ލިބުނު އަނިޔާގެ ސަބަބުން އޭނާ އަށް އެންމެ ފަހުން ގެއްލުނު ބޮޑު މުބާރާތަކީ 2022ގެ ވޯލްޑްކަޕެވެ. އެއަނިޔާއިން ރަނގަޅުވެގެން އެނބުރި ކުޅެން ފެށުނީ 99 ދުވަސް ފަހުންނެވެ.

އަދި ފާއިތުވެދިޔަ އަހަރެއްހާ ދުވަހު އޭނާ އަށް ވަނީ ތިން ފަހަރެއްގެ އެކި ވަރުގެ އަނިޔާތައްވެ، ގިނަ މެޗުތަކެއް ގެއްލިފަ އެވެ. މި ސީޒަނުގައި އާސެނަލްގައި މިހާތަނަށް ކުޅެވުނީ 15 މެޗެވެ.

އުމުރުން މިހާރު 27 އަހަރުގެ ފޯވަޑް އާސެނަލް އަށް ބަދަލުވީ މެންޗެސްޓާ ސިޓީގައި 159 މެޗު ކުޅެފަ އެވެ. އަދި ގިނަގިނައިން އަނިޔާވާތީވެ އާސެނަލްއިން އޭނާގެ ބަދަލުގައި ފޯވަޑަކު ހޯދަން އުޅޭ ވާހަކަ އެހުމުން ޖެސޫސް ބުނީ އެކަން ކޮށްފާނެ ކަމަށް އޭނާ ވެސް ގަބޫލުކުރާ ކަމަށެވެ.

އާސެނަލްއިން ހޯދަން މަސައްކަތް ކުރާ ފޯވަޑަކީ ބެރެންޓްފޯޑްގެ ފޯވަޑް އިވާން ޓޯނޭ ކަމަށްވެ އެވެ.