އިނގިރޭސި ޕްރިމިއާ ލީގުގައި ނިއުކާސަލް ޔުނައިޓެޑާ ދެކޮޅަށް ކުޅުނު މެޗުން މޮޅުވެ، އާސެނަލް އިން އަންނަ ސީޒަންގެ ޔުއެފާ ޗެމްޕިއަންސް ލީގުގެ ޖާގައެއް ކަށަވަރު ކޮށްފި އެވެ.

އާސެނަލްގެ އަމިއްލަ ދަނޑު، އެމިރޭޓްސް ސްޓޭޑިއަމްގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. މެޗުގައި އާސެނަލް އިން ލަނޑު ޖެހީ ވެސް މެޗުގެ ދެ ވަނަ ހާފުގަ އެވެ.

މެޗު ފަށައިގެން ކުރީ ކޮޅު ނިއުކާސަލް އިން ވަނީ ލަނޑު ޖެހުމަށް ފުރުސަތު ތަނަވަސްކޮށްފަ އެވެ. އެ ޓީމުގެ ބްރޫނޯ ހިމަރޭސް ފޮނުވާލި ބޯޅަ އާސެނަލްގެ ގޯލު ކީޕަރު ޑޭވިޑް ރަޔާ ވަނީ މަތަކޮށްފަ އެވެ.

އޭގެ ފަހުން އާސެނަލްގެ ލިއާންޑްރޯ ޓްރޮސާޑް ފޮނުވާލި ބޯޅަ ދިޔައީ ގޯލާ އަމާޒު ނުވެ ބޭރަށެވެ. އާސެނަލް އަށް ލިބުނު ކޯނަރެއްގައި ބުކަޔޯ ސަކާ ހުރަސްކޮށްދިން ބޯޅައެއް، އެ ޓީމުގެ ކުޅުންތެރިޔަކު ބޮލުން ފޮނުވާލި ނަމަވެސް، ނިއުކާސަލްގެ ގޯލު ކީޕަރު ވަނީ އެ ބޯޅަ އަތުން ޖައްސައި ބޭރުކޮށްލައިފަ އެވެ.

މެޗުގައި ނިއުކާސަލްގެ ހާވީ ބާންސް ފޮނުވާލި ބޯޅަ ވެސް އާސެނަލްގެ ކީޕަރު ވަނީ މަތަކޮށްފަ އެވެ. އޭގެ ފަހުން ވެސް މެޗުގައި ނިއުކާސަލް އިން ލަނޑު ޖެހުމަށް މަސައްކަތް ކުރި އެވެ.

މެޗުގެ ދެ ވަނަ ހާފު ފަށައިގެން ދިހަ ވަނަ މިނެޓުގައި އާސެނަލަށް ލީޑު ނަގައިދިނީ ޑެކްލަން ރައިސް އެވެ. އެއީ މާޓިން އޮޑެގާޑް ތަނަވަސްކޮށްދިން ފުރުސަތެއްގައި، އޭރިޔާ ބޭރުން ފޮނުވާލި ބޯޅަ ގޯލަށް ވައްދާލައިގެން ރައިސް ޖެހި ލަނޑެކެވެ.

މިއީ މި ސީޒަންގައި މި ދެ ޓީމު ބައްދަލު ކުރި ހަތަރު ވަނަ ފަހަރެެވެ. ކުރިން ނިއުކާސަލްގެ ދަނޑުގައި ކުޅުނު ލީގު މެޗުގައި އެ ޓީމުން ވަނީ އާސެނަލް ބަލިކޮށްފަ އެވެ. މީގެ އިތުރުން ކަރަބޯ ކަޕްގެ ސެމީ ފައިނަލްގެ ދެ ލެގުގައި ވެސް ނިއުކާސަލް އިން ވަނީ އާސެނަލް ބަލިކޮށްފަ އެވެ.

ނިއުކާސަލް އަތުން ހޯދި މޮޅާއެކު އާސެނަލް އިން ވަނީ އަންނަ ސީޒަންގެ ޗެމްޕިއަންސް ލީގުގެ ޖާގައެއް ކަށަވަރު ކޮށްފަ އެވެ. ލީގު ތާވަލްގެ ދެ ވަނައިގައި އާސެނަލް އޮތީ 37 މެޗުން 71 ޕޮއިންޓާ އެކު އެވެ. ލީގުގައި އާސެނަލް އަށް ބާކީ އެއް މެޗު އޮތްއިރު، ލީގުގެ ދެ ވަނަ ކަށަވަރު ކުުރުމަށް އެ ޓީމަށް ބޭނުން ވަނީ އެންމެ ޕޮއިންޓެކެވެ.

މިދިޔަ ދެ ސީޒަން ވެސް އާސެނަލް އިން ނިންމާލީ ލީގު ތާވަލްގެ ދެ ވަނަ މަގާމުގަ އެވެ.