ޝަރީއަތް ނިމެންދެން ފާރިސް ބަންދުކުރަން ނެރުނު އަމުރުގެ އިސްތިއުނާފް މިއަދު ފަށަނީ
6 އޯގަސްޓު 2017 | އާދީއްތަ 03:37ކޯޓް އަމުރެއްގެ ދަށުން ފާރިސް ހައްޔަރުކުރީ ޖުލައި 18 ވަނަ ދުވަހު
ދިއްގަރު ދާއިރާގެ މެންބަރު އަހުމަދު ފާރިސް މައުމޫން
ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހުމަދު ފާރިސް މައުމޫން ޝަރީއަތް ނިމެންދެން ބަންދުކުރަން ދަށު ކޯޓުން ނެރުނު އަމުރުގެ އިސްތިއުނާފް ފެށުމަށް މިއަދަށް ތާވަލުކޮށްފި އެވެ.
ހައިކޯޓުގައި އެ މައްސަލަ ތާވަލުކޮށްފައިވަނީ މިއަދު މެންދުރު 2:00 ގަ އެވެ.
ފާރިސް ހައްޔަރުކުރުމަށް ނެރުނު އަމުރާއި ޝަރީއަތް ނިމެންދެން ބަންދުކުރަން ކްރިމިނަލް ކޯޓުން ނެރުނު ދެ އަމުރުގެ އިސްތިއުނާފް މައްސަލަ ބުރާސްފަތި ދުވަހަށް ތާވަލުކުރި އެވެ. ނަމަވެސް، ކުރިއަށް ގެންގޮސްފައި ވަނީ ހަމައެކަނި ހައްޔަރު ކުރުމަށް ނެރުނު އަމުރުގެ މައްސަލަ އެވެ.
ފާރިސް ހައްޔަރު ކުރުމަށް ނެރުނު އަމުރުގެ ދަށުން، ޖުލައި 18 ވަނަ ދުވަހު އޭނާ ހައްޔަރު ކުރުމަށް ފަހު، ބަންދާއި މެދު ގޮތެއް ނިންމުމަށް ޖުލައި 19 ވަނަ ދުވަހު ކްރިމިނަލް ކޯޓަށް ހާޒިރުކުރުން، ތުހުމަތު ކުރެވޭ މައްސަލައިގެ ތަހުގީގު ނިންމައި ދައުވާކޮށް ޝަރީއަތް ނިމެންދެން ހޯމް މިނިސްޓްރީއިން ކަނޑައަޅާ ތަނެއްގައި ބަންދުކުރުމަށް ވަނީ އަމުރުކޮށްފަ އެވެ.
ފާރިސް ބަންދުކޮށްފައި ވަނީ މާފުށީ ޖަލުގަ އެވެ. އެހެން ނަމަވެސް، އޭނާގެ މައްޗަށް ހިންގާ ތަހުގީގު ކުރިއަށް ގެންދިއުމަށް ދޭތެރެދޭތެރެއިން ދޫނިދޫއަށް ގެންދެ އެވެ.
ފާރިސް ހައްޔަރު ކޮށްފައިވަނީ، ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމަށް ފާސްކުރުމަށް މަޖިލިހަށް ހުށަހެޅީ 42 މެންބަރުންގެ ސޮޔާއެކު ކަމަށް، އޭޕްރީލް 17 ވަނަ ދުވަހު މަޖިލީހުން ފާސްކުރުމާ ގުޅިގެން، މަޖިލީހުގެ ރައީސްގެ މައްޗަށް އިތުބާރު ނެތްކަމުގެ މައްސަލައެއް މަޖިލީހަށް ވެއްދުމަށް، 42 މެންބަރުންގެ ސޮއި ހޯދުމަށް މަޖިލިސް މެންބަރުންނަށް ނުފޫޒު ފޯރުވައި ގާނޫނާ ޚިލާފަށް މަސައްކަތްތަކެއް ކޮށްފައިވާ ކަމުގެ ތުހުމަތުގަ އެވެ.
އެ މައްސަލައިގައި އޭނާ ހައްޔަރުކޮށް ބަންދުކޮށްފައިވާއިރު، ޝަޙްސް އޮޅުވާލުމުގެ ދައުވާކޮށް އޭނާގެ މައްޗަށް ކްރިމިނަލް ކޯޓުގައި ޝަރީއަތެއް ދަނީ ހިންގަމުންނެވެ.
