ފަށާފައި ހުރި ކަންތައްތައް ނިމުމުން އައްޑޫ ސިޓީގައި ހަމަޖެހިގެން އައްޑޫ ރައްޔިތުންނަށް އުޅެވޭނެ
ކުރީގެ ރައީސް އިބްރާހީމް މުހައްމަދު ސާލިހު
އައްޑޫ ސިޓީއަށް ތަރައްގީ ގެނެސްފައިވަނީ އެމްޑީޕީގެ ވެރިކަންތަކުގައި އެކަނި ކަމަށާއި، ވޭތުވެދިޔަ 50 އަހަރު ތެރޭގައި ވެސް އެކަން ފެނިގެން ގޮސްފައިވަނީ އެގޮތަށް ކަމަށް ކުރީގެ ރައީސް އަދި އެމްޑީޕީގެ އިސް އެޑްވައިޒަފު އިބްރާހީމް މުހައްމަދު ސާލިހު ވިދާޅުވެއްޖެއެވެ.
ބުރާސްފަތި ދުވަހުގެ ރޭ ކުރިއަށް ގެންދިޔަ އެމްޑީޕީ މިސްރާބު ހަމަމަގަށް ޖަލްސާގައި ރައީސް ސާލިހު ވިދާޅުވީ ވޭތުވެދިޔަ 50 އަހަރު ދުވަހުގެ ތެރޭގައި ވެސް އައްޑޫ ސިޓީއަށް ތަރައްގީގެ މަސައްކަތެއް ކުރެވިފައިވަނީ އެމްޑީޕީގެ ވެރިކަންތަކުގައި އެކަނި ކަމަށާއި ވަކިން ހާއްސަކޮށް ވޭތުވެދިޔަ 5 އަހަރު އެކަން ފާހަގަކުރެވިގެންދާނެ ކަމަށެވެ.
ރައީސް ސާލިހު ވިދާޅުވީ ބައެއް ބޭފުޅުންނަކީ ހަނދާން ނެތޭ ބައެއް ކަމަށާއި، ކުރެވިފައި ހުންނަ ކަންކަން ވެސް ވަރަށް އަވަހަށް ހަނދާން ނެތޭ ބައެއް ކަމަށެވެ. އެހެންނަމަވެސް އަލުން އެކަމަށް ވިސްނުން ހިންގާލުމުން އައްޑޫ ސިޓީގެ މަގުތައް ހެދުމާއި، އެއަރޕޯޓް ތަރައްގީކުރުމާއި، ރިސޯޓް ހެދުމަށް ބިން ހިއްކުމާއި، ރަށަށް ބޭނުންވާ ބިން ހިއްކުމާއި، ބަނދަރުތައް ހެދުމާއި، މިފްކޯގެ ކޯލްޑް ސްޓޯރޭޖް ބޮޑު ކުރުމަށް ފަށާފައި ހުރި މަސައްކަތް ފެނުމުން ބަދަލުތަކެއް ގެންނަން މަސައްކަތް ކޮށްފައި ހުރިކަން ފެނިގެންދާނެ ކަމަށެވެ.
ރައިސް ސާލިހު ވިދާޅުވީ ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި، ކުރިއެކޭ އެއްގޮތަށް އައްޑޫ ސިޓީގެ ތާއީދާއެކުގައި ރައްޔިތުންގެ މަޖިލީހުގެ އަޣުލަބިއްޔަތު އެމްޑީޕީން ނަގާނެ ކަމަށެވެ.
ރައީސް ސާލިހުގެ ވާހަކަފުޅުގައި އައްޑޫ ސިޓީއަށް ވޭތުވެދިޔަ އެމަނިކުފާނުގެ 5 އަހަރު ތެރޭގައި ވެރިކަމުގެ ތެރޭގައި ކޮށްދެއްވާފައިވާ ކަންކަމަށް އަލިއަޅުއްވާލެއްވިއެވެ.
ރައީސް ސާލިހު ވިދާޅުވީ ވެރިކަމަށް ވަޑައިގަތުމަށްޓަކައި ރައީސް ޑރ. މުހައްމަދު މުއިއްޒު ވައުދުފުޅުތަކެއް ވެވަޑައިގެންނެވި ނަމަވެސް، މިއަދު ގިނަ ރައްޔިތުންނަށް އެނގިގެންދަނީ އެމަނިކުފާނު ހެއްދެވީ ބޮޑެތި ދޮގުކަމަށާއި، މިކަމާ ދޭތެރޭގައި ޝައްކު ކުރާ ރައްޔިތަކު ނެތް ކަމަށެވެ.
މީގެއިތުރުން ކުރިއަށް އޮތް މަޖިލިސް އިންތިހާބަށް ދޮގު މައްޗަށް ދޮގު ހަދަމުންދާ ކަމަށާއި، ރައްޔިތުން މިއަދު އެކަންކަމާއި ސުވާލު އުފައްދަންޖެހޭ ކަމަށާއި ބަޖެޓަށް ވަންނަ ފައިސާއާއި ޑަޒަނުން ވަޒީފާދޭއިރު، އެކަންކަން މި ސަރުކާރުން ހާމަނުކުރާ ކަމަށް ރައީސް ސާލިހު ވިދާޅުވިއެވެ.
