ރައީސް ޔާމީން ރަސްމާލެ މަޝްރޫއު ސިފަކުރެއްވީ ކަތިވަޅިޔާއި މަރިޔަނބާއި ކޮށި ދަނޑު ގެއްލިގެން ދާ މަޝްރޫޢެއްގެ ގޮތުގައި

މިސަރުކާރުން ހިންގާ އެންމެ ބޮޑު މަޝްރޫޢުކަމަށް ވާ ރަސްމާލެ މަޝްރޫޢުން ހަމައެކަނި ކަރުދާހުގައި އޮތް ކުންފުންޏަކަށް ހުޅުމާލެއިން ބޮޑު ބިމެއް ވިއްކާލުމަކީ މަރިޔަނބާއި ކަތިވަޅި އާއި ކޮށި ދަނޑު ގެއްލިގެންދާ ކަމެއްގެ ގޮތުގައި ކުރީގެ ރައީސް އަބްދުﷲ ޔާމީން ސިފަކުރައްވައިފިއެވެ.

ރައީސް ޔާމީން އިސްވެހުންނަވާ އުފައްދަވާފައިވާ ޕީޕަލްސް ނޭޝަނަލް ފްރޮންޓް (ޕީއެންއެފް)ގެ ޖަލްސާގައި ވާހަކަފުޅު ދައްކަވަމުން ޔާމީން ވިދާޅުވީ ރަސްމާލެ ނަމުގައި ފުށިދިއްގަރު ފަޅު ހިއްކުމުގެ މަސައްކަތް މިސަރުކާރުން ފެށިނަމަވެސް އެމަސައްކަތް މިހާރު ހުއްޓިފައިވާކަމަށެވެ. އަދި އެމަޝްރޫޢު ހިންގުމަށް ހަވާލުުކުރި ކުންފުންޏަކީ ހަމައެކަނި ކަރުދާހުގައި ލިޔެފައި އޮތް ކުންފުންޏަކަށްވާއިރު އެކުންފުންޏަށް ދޭ ބިމަކީ ހުޅުމާލޭގެ ތިންބައިކުޅަ އެއްބައި ވަރުގެ ބިމެއްކަމަށެވެ. އެއީ 90 ހެކްޓަރުގެ ބިމެއްކަމަށާއި އެވާހަކަ ދައްކާ މީހުންގެ އަނގަ ބަންދުކުރުމަށް ވަޒީފާ ދިންނަމަވެސް އެއީ ތެދެއްކަމަށް ޔާމީން ވިދާޅުވިއެވެ. އެކުންފުންޏަށް ދޭ ބިމުގެ އަގު 72،000 މިލިއަން ރުފިޔާއަށް އަރާކަމަށް ޔާމީން ވިދާޅުވިއެވެ.

ޔާމީން ވިދާޅުވީ މަޝްރޫޢު ހިންގަން ހަވާލުކުރި ކުންފުނީގައި ފައިސާ ނެތުމުން އެކުންފުންޏަށް ދޭ ބިން ވިއްކާލާނަމަ އެގެއްލެނީ މަރިޔަނބާއި، ކަތިވަޅި އާއި ކޮށިދަނޑުކަމަށެވެ. އަދި ހުޅުމާލެ ބިން ހިއްކާފައިވަނީ ބިދޭސީންގެ ފައިސާއަކުން ނޫންކަމަށް ޔާމީން ވިދާޅުވިއެވެ.

ޔާމީން ވިދާޅުވީ މިސަރުކާރުގެ ކެންޑިޑޭޓުން ރައްޔިތުންގެ މަޖިލީހަށް ހޮވަންނުޖެހެނީ މިފަދަ ކަންކަން މިސަރުކާރުން ހިންގާތީކަމަށެވެ. ސަރުކާރުން ހިންގާ މިފަދަ ކަންކަން ހުއްޓުވުމަށްޓަކައި ސަރުކާރުގެ މެންބަރުން މަޖިލީހަށް ނުހޮވުމަށް ޔާމީން އެދިވަޑައިގެންނެވިއެވެ.

ފުށިދިއްގަރުފަޅު ހިއްކުމުގެ މަޝްރޫޢު ފެށުމަށް ބޭއްވި ރަސްމިއްޔާތުގައި ރައީސުލްޖުމްހޫރިއްޔާ ޑރ މުހައްމަދު މުއިއްޒު އެމަޝްރޫޢު މެދުނުކެނޑި ކުރިޔަށްދާނެކަމަށް ވިދާޅުވިނަމަވެސް ދާދިފަހުން މީޑިޔާއަކަށް ދެއްވި އިންޓަރވިއުއެއްގައި ރައީސް މުއިއްޒު ވަނީ އެމަޝްރޫޢު ހުއްޓިފައިވާކަމަށް ވިދާޅުވެފައެވެ. މިއަހަރުގެ އޮކްޓޯބަރު މަހު އެމަޝްރޫޢުގެ ބިން އެއްކޮށް ހިއްކާ ނިންމަންޖެހޭއިރު އަދި މިހާތަނަށް ހިއްކާފައިވަނީ 10 ހެކްޓަރުގެ ބިމެވެ. މިމަޝްރޫޢުގެ ދަށުން 1153 ބިން ހިއްކަން ވަނީ ހަމަޖެހިފައެވެ. މަޝްރޫޢު ފެށިތާ ތިން މަހަށްވުރެ ގިނަ ދުވަސްވަނީ ވެފައެވެ. މިމަޝްރޫޢު ހިންގަން ހަވާލުކޮށްފައިވަނީ ސްރީލަންކާގެ ކެޕިޓަލް މެރިން އެންޑު ކޮންސްޓަރަކްޝަން ކޮމްޕެނީ (ސީއެމްސީސީ) އަށެވެ. އެއީ ފައިސާގެ ބަދަލުގައި ބިންދޭ ގޮތަށެވެ.