އަމިއްލަ ދަނޑުގައި ނަޕޯލީ އަށް ލަދުވެތި ބައްޔެއް

އިޓާލިއަން ލީގުގައި އެޓަލަންޓާއާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ނަޕޯލީ ބަލިވެއްޖެ އެވެ.

ނަޕޯލީގެ އަމިއްލަ ދަނޑުގައި ކުޅުނު މެޗުން އެ ޓީމު ބަލިވީ، 3-0 ގެ ލަދުވެތި ނަތީޖާ އަކުންނެވެ. މެޗުގެ ފުރަތަމަ ހާފުގައި އެޓަލަންޓާ އިން ދެ ލަނޑު ޖެހިއިރު، އަނެއް ލަނޑު ޖެހީ ދެ ވަނަ ހާފުގަ އެވެ.

މެޗު ފަށައިގެން 26 ވަނަ މިނެޓުގައި އެޓަލަންޓާ އަށް ލީޑު ނަގައިދިނީ އަލެކްސޭ މިރަންޗުކް އެވެ. އޭގެ ފަހުން މެޗުގެ ފުރަތަމަ ހާފު ނިމުމުގެ ކުރިން އެ ޓީމަށް ލީޑު ފުޅާ ކޮށްދިނީ ޖިއަންލޫކާ ސްކަމާކާ އެވެ. އެ ލަނޑު ޖަހަން ސްކަމާކާ އަށް ފުރުސަތު ތަނަވަސްކޮށްދިނީ މިރަންޗުކް އެވެ. މެޗުގައި އެޓަލަންޓާގެ ތިން ވަނަ ލަނޑު މެޗުގެ ފުރިހަމަ ވަގުތު ހަމަވާން ދެ މިނެޓަށްވެފައި ވަނިކޮށް ޖެހީ ޓެއުން ކޫޕްމެއިނާސް އެވެ. މެޗުގައި އޭނާ ކުޅެން ނިކުތީ ވެސް ބަދަލު ކުޅުންތެރިޔެއްގެ ގޮތުގަ އެވެ.

މިއީ މި ސީޒަންގެ ލީގުގައި ނަޕޯލީގެ ނުވަ ވަނަ ބައްޔެވެ. މިހާތަނަށް ކުޅުނު 30 މެޗުން އެ ޓީމަށް ލިބެނީ 45 ޕޮއިންޓެވެ. ނަޕޯލީ އަތުން މޮޅުވި އެޓަލަންޓާ އޮތީ 29 މެޗުން 50 ޕޮއިންޓާއެކު ހަ ވަނައިގަ އެވެ.