ގާނޫނަކަށް ބަދަލު ގެންނަން ޖެހުނަސް އެކަން ކުރައްވާނެ ކަމަށް ވިދާޅުވި
ބިލެތްދޫ ދާއިރާގެ މެންބަރު އަހުމަދު ހަލީމް
ދިވެހިރާއްޖޭގައި ފުރަތަމަ އަޒުލުކުރެވޭ ވެރިޔަކަށް ވެގެންދާނީ ރައީސް ޑރ. މުހައްމަދު މުއިއްޒު ކަމަށް ބިލެތްދޫ ދާއިރާގެ މެންބަރު އަހުމަދު ހަލީމް ވިދާޅުވެއްޖެއެވެ.
އެމްޑީޕީން ބޭއްވި ގަލޮޅު ތަރާވީހުގައި ވާހަކަ ދައްކަވަމުން މެންބަރު ހަލީމް ވިދާޅުވީ ރައީސް ޑރ. މުއިއްޒަށް ގޮވާލަނީ ވެރިކަމެއް ކުރައްވަންވާނީ އިންސާފުވެރިކޮށް ކަމަށާއި، ވެރިކަން ކުރާނީ ހިތުހުރިގޮތަކަށް ނޫން ކަމަށެވެ. އަދި ދިވެހިރާއްޖޭގައި ފުރަތަމަ އަޒުލުކުރެވޭ ވެރިޔަކަށް ވެގެންދާނީ ރައީސް ޑރ. މުހައްމަދު މުއިއްޒު ކަމަށެވެ. އަދި ފުރިހަމަ މެޖޯރިޓީއެއް ލިބިއްޖެނަމަ އެކަން ކުރައްވާނެކަމަށް މެންބަރު ހަލީމް ވިދާޅުވިއެވެ. މެންބަރު ހަލީމް ވިދާޅުވީ މިހާތަނަށް ރާއްޖޭގައި ނުކުރެވި އޮތް ކަމަކީ އިތުބާރުނެތްކަމުގެ ވޯޓެއް ނަގައިގެން ރާއްޖޭގެ ރައީސަކު މަގާމުން ވަކިކުރުން ކަމަށެވެ.
މެންބަރު ހަލީމް ވިދާޅުވީ އިރާދަކުރެއްވިޔާ އެ ތަޖުރިބާ ކުރެވޭނެ ކަމަށާއި، މަޖިލިސް އިންތިހާބު ރަނގަޅަށް ކާމިޔާބުކުރުމާއެކު އެންމެ ފުރަތަމަ މަސައްކަތަކަށް ވެގެންދާނީ ރައީސް މުއިއްޒު ވެރިކަމުން ވަކިކުރެއްވުން ކަމަށެވެ.
މަގޫދޫ އެއަރޕޯޓުގެ މައްސަލައިގައި މެންބަރު ހަލީމް ވިދާޅުވީ ގާނޫނަކުން ބަދަލު ގެންނަން ޖެހުނަސް އެކަން ކުރައްވާނެ ކަމަށައި، ޖުލައި މަހުގައި މަގޫދޫ އެއަރޕޯޓުގައި ބޯޓު ޖައްސާނެ ކަމަށެވެ.
މެންބަރު ހަލީމް ވިދާޅުވީ މަގޫދޫ އެއަރޕޯޓު އެތަނުގައި ބޭއްވުމަށް ގާނޫނަކުން އެ ބަދަލު ގެންނަން ޖެހުނު ނަމަވެސް އެކަން ކުރާނެ ކަމަށެވެ. އަދި ޖުލައި މަހު މަގޫދޫ އެއަރޕޯޓުގައި ބޯޓު ޖެއްސޭ ވަރު އެމްޑީޕީގެ ޕާލަމެންޓްރީ ގްރޫޕުގެ މެންބަރުންނާއެކު ކޮށް ނިންމަވާނެކަމަށެވެ.
މެންބަރު އަހުމަދު ހަލީމް ވިދާޅުވީ މިވަގުތަކީ ވަރަށް ދަތި ވަރަށް އުނދަގޫ ވަގުތެއް ކަމަށެވެ. އެއީ އޭނާގެ ދާއިރާގެ ރައީސް އިބްރާހިމް މުހައްމަދު ޞާލިހުގެ ސަރުކާރުގައި ވަރަށް މަސައްކަތުން 70 އިންސައްތަ މަސައްކަތް ނިންމާފައި އޮތް އެއަރޕޯޓެއް ރައީސް ޑރ. މުހައްމަދު މުއިއްޒު ފޭރިގަނެފައިވާ ކަމަށެވެ. އަދި އެކަމާއި ގުޅިގެން ދާއިރާގެ ގިނަ ރައްޔިތުންތަކެއް މިހާރުވެސް އިހުތިޖާޖު ކުރަމުން އަންނަ ކަމަށެވެ.
މެންބަރު ހަލީމް ވިދާޅުވީ ދައުލަތެއްގެ ސިފަ މި ރާއްޖޭގައި ގެއްލި ހިނގައްޖެ ކަމަށާއި، މި ރާއްޖެ ހަމަ މަގަށް އަޅުވަން މިހާރަށްވުރެވެސް ބޮޑަށް މަސައްކަތް ކުރަން ޖެހޭ ކަމަށެވެ.
މެންބަރު ހަލީމް ވިދާޅުވީ އެމްޑީޕީގެ ސަރުކާރު އައި އިރުގައި، ރައީސް އަބްދުﷲ ޔާމީންގެ ސަރުކާރުންވެސް ކަންކަން ހުރީ ފަށާ ނުނިމި ކަމަށެވެ. އޭގެ ތެރޭގައި ފަރެސްމާތޮޑާގެ އެއަރޕޯޓަކީ އެންމެ ހެކްޓަރެއް ހިއްކިފައި އޮތް ތަނެއް ކަމަށެވެ. ނަމަވެސް ރައީސް ޞާލިހުގެ ސަރުކާރު ނިމުނު އިރުގައި އެތަނަށް މަތިންދާބޯޓު ޖައްސާ ކަމަށެވެ.
މެންބަރު ވިދާޅުވީ ކޮއްކޯފުޅު ހޮވުމަށްޓަކައި ދައުލަތުގެ ފައިސާ ނަހަމަގޮތުގައި ބޭނުންކުރަމުންދާތަން ފެންނަމުންދާ ކަމަށެވެ.
މެންބަރު ހަލީމް ވިދާޅުވީ މަގޫދޫ އަދި ބިލެއްދޫ ރައްޔިތުން އަދި ފީއަލީ ރައްޔިތުން ކުރަމުންދާ ހިތާމައިގައި މުޅި ޕާޓި އޮތް ކަމަށެވެ. އަދި ހޯމަ ދުވަހު އެއަރޕޯޓު މައްސަލައިގައި ކުއްލި މައްސަލައެއް މަޖިލީހަށް ވައްދާނެކަމަށް މެންބަރު ހަލީމް ވިދާޅުވިއެވެ. އަދި އެކަމުގައި ޕާލަމެންޓްރީ ގްރޫޕުގެ މެންބަރުން ތިބުމަށް މެންބަރު ވަނީ އެދިވަަޑައިގަންނަވާފައެވެ.
