ޚުދުމުހުތާރު ވެރިއެއްގެ ސިފަ މިއަދު އުދަރެހުން ފެނޭ، ދައުލަތް ހިންގަން އުޅެނީ އެކޮޅު ކޮޅުން - މޫކޭ
30 މާރިޗު 2024 | ހޮނިހިރު 08:47މޫސަ ވަނީ އެމްޑީޕީގެ އިސް މީހުން ފުލުހަށް ހާޒިރުކުރާތީ ކަންބޮޑުވުން ފާޅުކުރައްވާފަ
މޫސާ އަލީ މަނިކު (މޫކޭ)
ޚުދުމުހުތާރު ވެރިއެއްގެ ސިފަ މިއަދު އުދަރެހުން ފެންނަމުންދާ ކަަމަށާއި ދައުލަތް ހިންގަން އުޅެނީ އެކޮޅު ކޮޅުން ކަމަށް ކުރީގެ މެނޭޖިން ޑިރެކްޓަރ އެމްޑީޕީގެ ޤައުމީ މަޖިލީހުގެ މަޑުއްވަރީ ދާއިރާގެ ރައީސް މޫސާ އަލީ މަނިކު (މޫކޭ) ވިދާޅުވެއްޖެއެވެ.
އެނާ އެފަދައިން ވިދާޅުވީ ހުޅުމާލެ މެދު ދާއިރާ އަށް ވާދަކުރާ ކެނޑިޑޭޓުންނަށް ތާއީދު ހޯދުމަށް ބޭއްވި ތަރާވީހުގައި ވާހަކަދައްކަވަމުންނެވެ. އޭނާ ވަނީ އާރްޑީސީގެ ޚިޔާނާތުގެ މައްސަލަ އެއް އޮތް ކަމަށް ބުނެ އެމްޑީޕީގެ ޗެއަރޕަރސަން ފައްޔާޒް އިސްމާއިލް ފުލުހަށް ހާޒިރުކުރުމާއި އެމްޑީޕީގެ އިސް ވެރިން އެކި މައްސަލަތަކުގައި ތަހުގީގީ އިދާރާތަކަށް ހާޒިރުކުރަނީ ބިރު ދައްކަން ކަަމަށް ވިދާޅުވެފައެވެ. އެމްޑީޕީ އަކީ އަބަދުވެސް ބިރުވެރިކަމާއި ދެކޮޅަށް އައްޑަނައެއްގެ ގޮތުގައި މަސައްކަތް ކުރާނެ ޕާޓީ އެއް ކަމަށް އޭނާ ވިދާޅުވިއެވެ. އެމްޑީޕީގެ ވެރިކަމަކީ އަމާނާތްތެރި ވެރިކަމެއް ކަމަށް ވެސް އޭނާ ވަނީ ވިދާޅުވެފައެވެ.
މި ސަރުކާރުން އާއްމުންނަށް ބިރު ދައްކަމުންދާ ކަމަށާއި ދޮރުން ދޮރަށް ދާއިރު ވެސް އެންމެ ބޮޑަށް ފާހަގަކުރެވޭ އެއް ކަމަކީ އެއީ ކަމަށް އޭނާ ވިދާޅުވިއެވެ. އެގޮތުން ވަޒީފާގެ ބިރާއި، ވިޔަފާރިވެރިންނަށް އޮތް ބިރު ފަދަ އެތައް ކަމެއް މި ވެރިކަމުގައި ފާހަގަކުރެވޭ ކަމަށް އޭނާ ވަނީ ވިދާޅުވެފައެވެ. އަދި ބިމެއް ނޫނީ ފްލެޓެއް އަދި އެ ނޫން ވެސް އެއްޗެއް ލިބިފައި އޮތް މީހެއް ވެއްޖެއްޔާ އެ އަތުލާނެ ކަމުގެ ބިރު ވެސް މި ވެރިކަމުގައި އިންތިހާ އަށް އޮތް ކަމަށް އޭނާ ވަނީ ވިދާޅުވެފައެވެ. މޫސާ އަލީ މަނިކުގެ ވާހަކައިގައި ފުށިދިއްގަރުފަޅު މަޝްރޫޢުގައި ކޮރަޕްޝަން އެކުލެވޭ ކަމަށް ބުނާ ވާހަކަ އަށް ނުސީދާކޮށް އަލިއަޅުވާލެއްވިއެވެ. އެގޮތުން އެމްޓީސީސީން ރާޖޫ ކިޔާ މީހަކަށް އުސޫލާއި ޚިލާފަށް ތަކެތި ފޯރުކޮށްދިން ކަމަށް އަޑުފެތުރިފައިވާ އިރު "ރާޖޫ"ގެ ކޮންޓްރޯލް ވެރިކަމުގައި އޮތް ކަމަށް އޭނާ ވަނީ ސިފަކުރައްވާފައެވެ.
އޭނާ ވަނީ މި ސަރުކާރުގެ މިސްރާބެއް ނެތް ކަމަށް ފާހަގަކުރައްވާ އެކަމަށް ވަރަށް ބޮޑަށް ފާޑު ވިދާޅުވެފައެވެ. އަދި މި ސަރުކާރުން ދޮގު މައްޗަށް ދޮގު ހަދަމުންދާ ކަމަށާއި އޮޅުވާލުން ނޫން ކަމެއް ނުފެންނަ ކަމަށް އޭނާ ވިދާޅުވިއެވެ. މީގެ އިތުރުން ނިމިދިޔަ އެމްޑީޕީގެ ސަރުކާރަކީ ޚުދުމުހުތާރު ވެރިކަމަކަށް ފަހު ލިބުނު އަމާން 5 އަހަރު ކަމަށާއި މިހާރު އަނެއްކާވެސް ފެންނަނީ އަނިޔާވެރި ވެރިކަމެއް ކަމަށް އޭނާ ވަނީ ވިދާޅުވެފައެވެ. ހުޅުމާލެ އަށްޓަކާ ރައީސް ޑރ.މުހައްމަދު މުއިއްޒު ވެވަޑައިގެންނެވި ވައުދުތަކުގައި ވެސް ހުރީ އޮޅުވާލުމާއި މަކަރުވެރި ވާހަކަތައް ކަަމަށް އޭނާ ވިދާޅުވިއެވެ. ހުޅުމާލެ އާއި މެދު ސަރުކާރުގެ ވިސްނުމެއް ފިކުރެއް ނެތް ކަމަށް އޭނާ ވަނީ ވިދާޅުވެފައެވެ. މީގެ އިތުރުން އޭނާ ވަނީ ބަސްދަތުރުތަކުގެ އިންތިޒާމް ރަނގަޅުކުރުމަށާއި ޕާކިން މައްސަލަ އަށް ހައްލު ހޯދާދިނުން ފަދަ މުހިންމުކަންކަމަށް ސަމާލުކަން ދިނުމަށް ސަރުކާރަށް ގޮވާލައްވާފައެވެ.
