މަސްތުވާތަކެތި ބޭނުންކޮށް، ގެންގުޅެ އެތަކެތީގެ ވިޔަފާރި ކުރުމުގެ ތުހުމުގައި މީހަކު ބަންދުކޮށްފި
29 މާރިޗު 2024 | ހުކުރު 06:02އޭނާ ހުރި އެޕާޓްމަންޓަކީ މަސްތުވާތަކެތީގެ ވިޔަފާރި ކުރުމަށް ބޭނުންކުރާ އެޕާޓްމެންޓެއް ކަމަށް އިންޓެލް ރިޕޯޓުގައި އޮތް
ކްރިމިނަލް ކޯޓް
މަސްތުވާތަކެތި ބޭނުންކޮށް، ގެންގުޅެ އެތަކެތީގެ ވިޔަފާރި ކުރި މީހަކު ބަންދުކޮށްފިއެވެ.
ފުލުހުން އެދިގެން ކްރިމިނަލް ކޯޓުން ނެރުނު އަމުރުގައި ބަންދުކުރުމަށް އަމުރުކޮށްފައިވަނީ ކ. މާލެ، މ. ޝަބީނާ، ހަމްދޫން އަހުމަދު (29) އެވެ. އަދި އޭނާ ބަންދުގައި ބަހައްޓަން އަމުރުކޮށްފައިވަނީ ކަސްޓޯޑިއަލް ޖަލެއްގައެވެ. ބަންދުގެ މުއްދަތުގެ ގޮތުގައި ދީފައިވަނީ 15 ދުވަހެވެ.
ކްރިމިނަލް ކޯޓުގެ އަމުރުގައި ބުނެފައިވަނީ ތުހުމަތެއް ވުޖޫދުވާވަރަަށް ޖެކި ލިބިފައިވާކަމަށް ފެންނަ ކަމަށެވެ. އަދި ހުށަހެޅިފައިވާ ފުލުހުންގެ ބަޔާންތަކުންނާއި މަސްތުވާތަކެތީގެ ތަހުލީލު ރިޕޯޓާއި ފޮޓޯ ރިޕޯޓުން އޭނާއާއި ގުޅުން ހުރި އެޕާޓްމަންޓަކުން ގިނަ އަދަދެއްގެ މަސްތުވާތަކެތިކަމަށް ޝައްކުކުރެވޭ ތަކެތި ފެނިފައިވާކަން އެނގޭ ކަމަށެވެ.
ބަންދުގައި ބަހައްޓަންޖެހޭ ހާލަތެއްގެ ގޮތުގައި ބުނެފައިވަނީ ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 49 ވަނަ މާއްދާއާއި، ޖިނާއީ އިޖްރާއަތުގެ ގާނޫނުގެ 59 ވަނަ މާއްދާއާއި، 60 ވަނަ މާއްދާއަށް ރިއާޔަތްކޮށް މުޖްތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށްޓަކައި ކަމަށެވެ.
އަދި ބަންދުގައި ބަހައްޓަންޖެހޭ ހާލަތް އޮތްކަމަށް ދެކޭ ސަބަބުގެ ގޮތުގައި ބުނެފައިވަނި ގިނަ އަދަދެއްގެ މަސްތުވާތަކެތިކަމަށް ބެލެވޭ ތަކެތި އޭނާއާ ގުޅުންހުރި ތަނަކުން ފެނިފައިވުމާއި، ހުށަހެޅިފައިވާ ފުލުހުންގެ އިންޓެލިޖެންސް ރިޕޯޓުގައި، އޭނާ ހުރި އެޕާޓްމަންޓަކީ މަސްތުވާތަކެތީގެ ވިޔަފާރި ކުރުމަށް ބޭނުންކުރާ އެޕާޓްމެންޓެއް ކަމަށް އޮންނާތީ އާއި މަސްތުވާތަކެތީގެ ވިޔަފާރި ކުރުމަށް ބޭނުންކުރެވޭ އާލާތްތައް އެޕާޓްމަންޓުން ފެނިފައިވާތީ، އޭނާއަކީ މަސްތުވާތަކެތީގެ ވިޔަފާރިކުރުމުގައި ބައިވެރިވުމެއް އޮތް ފަރާތެއް ކަަމަށް ބެލެވޭތީ، އެފަދަ ފަރާތެއް ބަންދުން ދޫކޮށްލައިފިނަމަ މުޖްތަމައުގެ ސަލާމަތަށް ނުރައްކަލެއް އޮތްކަމަށް ފެންނާތީ ކަމަށެވެ.
