މިސަރުކާރަށް ފްލެޓުތަކާއި ގޯތިތަކަށް ބޭނުން ގޮތެއް ނުހެދިގެން އުޅެނީ އެމްޑީޕީގެ މެޖޯރިޓީ މަޖިލީހުގައި އޮތީމަ: ޝާހިދު
ރައްޔިތުންނަށް ދެރަނިކަމެތިކަން ލިބޭ ކަންކަން ވިޔަނުދީ ހިފަހައްޓަމުން ގެންދަނީ އެމްޑީޕީން
އެމްޑީޕީގެ ރައީސް އަބްދުﷲ ޝާހިދު ވާހަކަ ދައްކަވަނީ
ކުރީގެ ރައީސް އިބްރާހީމް މުހައްމަދު ސާލިހުގެ ސަރުކާރުގައި ދޫކުރި ފްލެޓުތަކާއި، ގޯތިތަކަށް މިސަރުކާރަށް ބޭނުން ގޮތެއް ނުހެދިގެން އުޅެނީ އެމްޑީޕީގެ މެޖޯރިޓީ ރައްޔިތުން މަޖިލީހުގައި އޮތުމުން ކަމަށް އެ ޕާޓީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
ބުދަ ދުވަހުގެ ރޭ ހެންވޭރު ތަރާވީހުގައި ވާހަކަދައްކަވަމުން ޝާހިދު ވިދާޅުވީ ރައީސް ޑރ މުއިއްޒު ބޭނުންފުޅުވެވަޑައިގަންނަވާ އެންމެހައި ގޮތްގޮތަށް ގައުމުގެ ކަންކަން ކުރިއަަށް ނުގެންދެވެނީ އެމްޑީޕީގެ މެޖޯރިޓީ މަޖިލީހުގައި އޮތުމުން ކަމަށާއި، އެމްޑީޕީގެ މެންބަރުން ބުރަ މަސައްކަތްތަކެއް ކުރަމުން ގެންދާ ކަމަށެވެ. ރައްޔިތުންނަށް ދެރަނިކަމެތިކަން ލިބޭ ކަންކަން ވިޔަނުދީ ހިފަހައްޓަމުން ގެންދަނީ އެމްޑީޕީން ކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ ރައީސް ސާލިހުގެ ސަރުކާރުގައި ދޫކޮށްފައިވާ ގޯތިތަކާއި ފްލެޓުތަކަށް އިޝާރާތް ކުރައްވައި ޝާހިދު ވިދާޅުވީ ގޯތިތަކާއި ފްލެޓުތައް ދޫނުކޮށް އެއް ކޮމިޓީ އަނެއް ކޮމިޓީއަށް ގެންދަނީ އޭގައި ހެދޭނެ އެއްވެސް ގޮތެއް ނެތުމުން ކަމަށެވެ.
ޝާހިދު ވިދާޅުވީ ކުރިއަށް އޮތް ރައްޔިތުން މަޖިލީހުގެ މެޖޯރިޓީ ސަރުކާރަށް ލިބިއްޖެނަމަ ރައްޔިތުންތައް ބޯހިޔާވަހިކަމަށް ވައްސަލާމް ކިޔަން ޖެހޭނެ ކަމަށެވެ. ރާއްޖޭގެ މިސްރާބު ހަމަމަގަށް އަޅުވައި، ރާއްޖޭގެ ރައްޔިތުންގެ ބޯހިޔާވަހިކަން ކަށަވަރު ކުރުމަށް މަޖިލީހުގެ މެޖޯރިޓީ އެމްޑީޕީ ނަގަންޖެހޭ ކަމަށް ޝާހިދު ވިދާޅުވިއެވެ. އެހެންކަމުން ކުރިއަށް އޮތް ރައްޔިތުން މަޖިލީހުގެ މެޖޯރިޓީ އެމްޑީޕީއަށް ހޯދުމަށް ހުރިހާ ރައްޔިތުން ވަރަށް ބުރަކޮށް، ފަހަތަށް ނުޖެހި މަސައްކަތް ކުރުމަށް ޝާހިދު ގޮވާލެއްވިއެވެ.
