ކުރީ ސަރުކާރުގައި ޓްރާންސްޕޯޓު މިނިސްޓްރީ 24 ގަޑިއިރު ދިން ޚިދުމަތްތައް މިހާރު ލިބެނީ ރަސްމީ ގަޑީގައި އެކަނި
25 މާރިޗު 2024 | ހޯމަ 10:51ޓްރާންސްޕޯޓް އޮންލައިން ޚިދުމަތްތައް ރައްޔިތުންނަށް ދޫނުކުރޭ
ޓްރާންސްޕޯޓު މިނިސްޓްރީން ބޭއްވި ނޫސްވެރިންގެ ބައްދަލުވުމެއްގެ ތެރެއިން
ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުގައި ޓްރާންސްޕޯޓު މިނިސްޓްރީގެ ޚިދުމަތްތައް ޑިޖިޓަލައިޒްކޮށް، 24 ގަޑިއިރު ބައެއް ޚިދުމަތް ދިން ނަމަވެސް މިހާރު އެޚިދުމަތްތައް ލިބެނީ ރަސްމީ ގަޑީގައި އެކަނި ކަން ހާމަވެއްޖެއެވެ.
ޓްރާންސްޕޯޓު މިނިސްޓްރީގެ ޚިދުމަތްތައް ހޯދުމަށް ދާން ޖެހެނީ އެމިނިސްޓްރީއަށެވެ. ރައްޔިތުންނަށް ލުއި ފަސޭހަ ކޮށްދިނުމުގެ ގޮތުންނާއި، ޚިދުމަތްތައް ދިނުން ލަސްވާ މައްސަލަ ހައްލުކުރުމުގެ ގޮތުން އޮންލައިންކޮށް ޚިދުމަތްތައް ލިބޭ ގޮތަށް އިންތިޒާމްތައް ހަމަޖެއްސިއެވެ. އެގޮތުން 24 ގަޑިއިރު އީޕޯޓަލް އަދި ސިމްސްގެ ޚިދުމަތްތައް ތައާރަފްކުރިއެވެ. މީގެ އިތުރުން 12 ނޮވެންބަރު 2023 ގައި "ޓްރާންސްޕޯޓް އޮންލައިން" މެދުވެރިކޮށް މިނިސްޓްރީގެ ހުރިހާ ޚިދުމަތެއް އޮންލައިންކޮށް ލިބޭނެ ގޮތަށް ހަމަޖެއްސިއެވެ. އޭގެ ތެރޭގައި އެއްގަމާއި ކަނޑު އުޅަނދުތަކުގެ ރަޖިސްޓްރީއާ ގުޅޭ ހުރިހާ ޚިދުމަތެއް ވެސް ހިމެނެ އެވެ. ނަމަވެސް މިސަރުކާރުން ޓްރާންސްޕޯޓު އޮންލައިން އިން ޚިދުމަތްތައް ދޫކުރަން ފަށާފައެއް ނުވެއެވެ. މިއީ ހުރިހާ ޚިދުމަތެއް އެއްތަނަކުން ދިނުމަށްޓަކައި މިނިސްޓްރީން ގާއިމްކުރި ޕްލެޓްފޯމެކެވެ.
މީގެ އިތުރުން 24 ގަޑިއިރު ޚިދުމަތް ދޭން ފެށި އީޕޯޓަލް އަދި ސިމްސްގެ ޚިދުމަތްތައް ވެސް މިހާރު ލިބެނީ ރަސްމީ ގަޑީގައި އެކަންޏެވެ. ސިމްސް ޕޯޓަލްއާއެކު ކޮންމެ ތާކު ހުރެގެން ވެސް ޚިދުމަތަށް އެދެވޭއިރު، 24 ގަޑިއިރު ޚިދުމަތް ލިބޭގޮތް ނުވުމަކީ ޚިދުމަތްތައް ލަސްވެ، ގިނަ އުދަނގޫތަކެއް ރައްޔިތުންނަށް ކުރިމަތިވާނެ ކަމެކެވެ.
އިތުބާރުހުރި ފަރާތަކުން ރާއްޖެއެމްވީއަށް ވިދާޅުވީ އީޕޯޓަލް އަދި ސިމްސްގެ ޚިދުމަތްތައް 24 ގަޑިއިރު ދޭން ފެށިނަމަވެސް އައު ސަރުކާރާއެކު ޚިދުމަތް މެދުކަނޑާލާފައިވާތީ ރައްޔިތުންގެ ވަރަށް ގިނަ ޝަކުވާތައް ލިބެމުންދާ ކަމަށެވެ. ކުރީ ސަރުކާރުގައި އަވަސް ޚިދުމަތްތަކެއް ރައްޔިތުންނަށް ދޭން އެނިސްޓްރީން ކުރި މަސައްކަތްތައް ތަންފީޒު ނުކޮށް، އެއްކޮށް ދޫކޮށްލާފައިވާ ކަމަށް އެބޭފުޅާ ވިދާޅުވިއެވެ. އަދި މިއީ އެނިސްޓްރީން ފަހަތަށް އެޅި ފިޔަވަޅެއް ކަން އޭނާ ފާހަގަ ކުރެއްވިއެވެ. އަދި ކުރިއަށް އޮތީ ސަރުކާރުގެ ބަންދު ގިނަ ދުވަސްތަކެއް ކަމަށްވާތީ ވަރަށް ގިނަ ދަތިތަކާއި ކުރިމަތިވާނެ ކަމަށް އޭނާ ވިދާޅުވިއެވެ.
މިމައްސަލައާ ގުޅިގެން ޓްރާންސްޕޯޓު މިނިސްޓްރީގެ ބަހެއް ވަނީ ލިބޭ ގޮތް ނުވެފައެވެ.
