ދިވެހިރާއްޖޭގެ މަސްދޯނިތަކަށް އިންޑިއާގެ ސިފައިން އަރާފައިވަނީ މިސްކޮމިއުނިކޭޝަން މައްސަލައަކުން ކަމަށާއި، ފޮރުވިފައިވާ އިތުރު ކަމެއް ނެތް ކަމަށް ޑިފެންސް މިނިސްޓަރު ޣައްސާން މަޢުމޫން ވިދާޅުވެއްޖެއެވެ.

ހޯމަ ދުވަހުގެ ރައްޔިތުން މަޖިލީހުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރު ޣައްސާން ވިދާޅުވީ އިންޑިއާ ސިފައިން ދިވެހި މަސްދޯނިތަކަށް އަރައި ކުރިއަށް ގެންދިޔައީ އާދައިގެ ބަލާ ފާސްކުރުމުގެ އޮޕަރޭޝަނެއް ކަމަށެވެ. އެގޮތުން ދިވެހި މަސްވެރިންގެ ފޯނުތަކާއި، މަސްދޯނީގެ އެކިއެކި ބައިތައް ބަލާފާސްކުރި ކަމަށް މިނިސްޓަރު ޣައްސާން ވިދާޅުވިއެވެ. އަދި ވިދާޅުވީ ހާދިސާ ހިނގި ވަގުތު މަސްވެރިން ނަގާފައިވާ ބައެއް ވީޑިއޯތައް ޑިލިޓްކޮށްފައިވާ ކަމަށެވެ.

މިނިސްޓަރު ޣައްސާން ވިދާޅުވީ މަސްދޯނިތަކަށް ސިފައިން އަރާފައިވަނީ ރާއްޖޭގެ އިގްތިސާދީ ސަރަހައްދުގައި ހަރަކާތްތެރިވަމުން ދަނިކޮށް ކަމަށާއި، ރާއްޖޭގެ އިގްތިސާދީ ސަރަހައްދުން ބޭރުވެފައިނުވާ ކަމަށެވެ. އަދި ދޯނިތަކުގައި ހަރުކޮށްފައި ހުރި ޓްރެކިން ޑިވައިސްތަކުން އެކަން ކަށަވަރުކުރެވޭ ކަމަށް މިނިސްޓަރު ވިދާޅުވިއެވެ.

މީގެ އިތުރުން މިނިސްޓަރު ވިދާޅުވީ ބޯޑިންގެ ހަރަކާތް ހިންގާފައިވަނީ މިސްކޮމިއުނިކޭޝަންއަކާއި ހެދި ކަމަށް ރަސްމީ މަސްދަރުތަކުން މައުލޫމާތު ދީފައިވާ ކަމަށެވެ. އެއީ ސެޓްލައިޓް ފޯނު ދޯނިތަކުގައި ބޭނުންކުރާތީ ކަމަށާއި، އެ ހުރިތޯ ކަށަަވަރުކުރުމުގެ ގޮތުން ހިންގި އޮޕަރޭޝަނެއް ކަމަށެވެ. މިނިސްޓަރު ޣައްސާން ވިދާޅުވީ އިންޑިއާ ކަނޑުގެ ސަރަހައްދުގައި ސެޓްލައިޓް ފޯނު ބޭނުންކުރުމަކީ ގާނޫނީ ގޮތުން މަނާ ކަމެއް ކަމަށެވެ. އަދި އެގޮތަށް އެކަން ހިނގާފާނެ ކަމަށް ގަބޫލުކުރާ ކަމަށާއި، ފޮރުވިފައިވާ އިތުރު ކަމެއް ނެތް ކަމަށް މިނިސްޓަރު ވިދާޅުވިއެވެ.

މަސްދޯނިތަކަށް އިންޑިއާ ސިފައިން ހަތިޔާރާއެކު އަރާފައިވަނީ 31 ޖެނުއަރީ އަދި 1 ފެބްރުއަރީ 2024 ގައެވެ.

ދިވެހިރާއްޖޭގެ ޚާއްސަ އިގުތިސާދީ ސަރަހައްދުގައި މަސްވެރިކަން ކުރަމުންދިޔަ މަސް ދޯނިތަކަށް އެރި މައްސަލަ ފެންމަތިވެފައި ވާއިރު، މިފަދަ ކަންކަން ތަކުރާރު ނުވާނެ ގޮތަކަށް ކަންކަން ކުރިއަށް ގެންދިއުމަށް ރައްޔިތުން މަޖިލީހުގެ މެންބަރުން ގޮވާލާފައިވެއެވެ. މިހާދިސާއާ ގުޅިގެން މަސްވެރިންނަށް ވަރަށް ބޮޑަށް ނޭދެވޭ އަސަރުކޮށްފައިވާތީ، އެ ދޯނިތަކުގައި ތިބި މަސްވެރިންނަށް ސައިކޯސޯޝަލް ސަޕޯޓު ވެސް ވަނީ ދީފައެވެ.