ބެޑްމިންޓަން އެސޯސިއޭޝަންގެ ރައީސް އާ ގުޅުންހުރި ތަންތަން އޭސީސީން ބަލާ ފާސްކުރަނީ
23 މާރިޗު 2024 | ހޮނިހިރު 17:45އޭސީސީން މީޑިއާތަކާ ހިއްސާކުރި މެސެޖެއްގައި ބުނީ ކޯޓު އަމުރެއްގެ ދަށުން މޫސައާ ގުޅުންހުރި ބައެއް ތަންތަން ބަލަމުން އަންނަ ކަމަށް
ބެޑްމިންޓަން އެސޯސިއޭޝަންގެ ރައީސް މޫސާ ނާޝިދު
ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް) ގައި ހިންގާފައިވާ ކޮރަޕްޝަނުގެ ތުހުމަތުުތަކާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން ކުރަމުންގެންދާ ތަހުގީގުގެ ބޭނުމަށް އެ އެސޯސިއޭޝަނުގެ ރައީސް މޫސާ ނާޝިދާ ގުޅުން ހުރި ތަންތަން ބަލައިފާސްކުރަން ފަށައިފިއެވެ.
ބެޑްމިންޓަން އެސޯސިއޭޝަންގެ ކޮރަޕްޝަން މައްސަލައިގައި ހުސްވި ހަފުތާގެ އަންގާރަ ދުވަހު އޭސީސީގެ ޓީމަކުން ވަނީ އެ އެސޯސިއޭޝަންގެ އޮފީސް ބަލައިފާސްކޮށްފައެވެ. އޭރު އޭސީސީން ބުނީ ބީއޭއެމާ ދެކޮޅަށް ހުށަހެޅިފައިވާ ކޮރަޕްޝަނާ ގުޅުންހުރި، ގިނަ ތުހުމަތުތަކަކާ ގުޅިގެން ލިޔެކިޔުމާއި މައުލޫމާތު ހޯދަމުން އަންނަ ކަމަށެވެ.
އޭސީސީން މީޑިއާތަކާ ހިއްސާކުރި މެސެޖެއްގައި ބުނީ ކޯޓު އަމުރެއްގެ ދަށުން މޫސައާ ގުޅުންހުރި ބައެއް ތަންތަން ބަލަމުން އަންނަ ކަމަށެވެ.
ބެޑްމިންޓަން އެސޯސިއޭޝަންގެ ކޮރަޕްޝަން މައްސަލަތަކެއް ބަލަމުންދާ ކަމަށް ބުނި ނަމަވެސް މިހާތަނަށް އޭސީސީން އެ މައްސަލަތަކާ ގުޅޭ ތަފުސީލެއް ހިއްސާ އެއް ނުކުރެއެވެ.
ބެޑްމިންޓަން އެސޯސިއޭޝަނުގެ ކޮރަޕްޝަން މައްސަލަތައް ބަލަމުން އަންނައިރު، ބެޑްމިންޓަން އެސޯސިއޭޝަނުގެ ކޮރަޕްޝަނުގެ މައްސަލަތަކުގައި އޭސީސީން އެތަނަށް ވަނުމުން އައްޑޫގައި ބާއްވަން އުޅުނު އެ އެސޯސިއޭޝަނުގެ އިންތިހާބު ވަނީ ހުއްޓައިލާފައެވެ. މީގެ ކުރިން އެސޯސިއޭޝަނުން ދިޔައީ ކަމިޝަނަރ އޮފް ސްޕޯޓްސް އިންތިހާބު ހުއްޓާލަން އެންގުމުން ވެސް އެކަން ބޮލާލައި ޖަހައި އިންތިހާބު ބާއްވަން ތައްޔާރުވަމުންނެވެ.
