ސަރުކާރަށް ފުރިހަމަ ބާރާއެކު މަޖިލީހުގެ މެޖޯރިޓީ ދީފިނަމަ ތިބޭނީ އަނދިރި މަރުހަލާއެއްގައި - ބިގޭ

ސަރުކާރަށް ފުރިހަމަ ބާރާއެކު މަޖިލީހުގެ މެޖޯރިޓީ ދީފިނަމަ ތިބޭނީ އަނދިރި މަރުހަލާއެއްގައި ކަމަށް އަލިފުށީ ދާއިރާގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.

އޭނާ މިހެން ވިދާޅުވީ ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ޓިކެޓުގައި މާފަންނު އުތުރު ދާއިރާއަށް ވާދަކުރައްވާ ކެންޑިޑޭޓު ބުދަ ދުވަހުގެރޭ ބޭއްވި ކެމްޕޭނު ބައްދަލުވުމުގައި ވާހަކަ ދައްކަވަމުންނެވެ.

އެމްޑީޕީ އަށް ކުރިއަށް އޮތް ރައްޔިތުންގެ މަޖިލީހުގެ މެޖޯރިޓީ ނުލިބެއްޖެ ނަމަ މި ގައުމު އަނބުރާ ނުވެސް ލިބޭނެ ކަމަށާއި ޤައުމުގެ ސަލާމަތަށް އެދޭ ނަމަ ވޯޓުދޭންވީ އެމްޑީޕީގެ ކެންޑިޑޭޓުންނަށް ކަމަށް ވެސް އޭނާ ވިދާޅުވިއެވެ.

މެންބަރު މުހައްމަދު ރަޝީދު ވަނީ މިހާރު މަޖިލީހުގެ ހާލަތަށް އަލިއަޅުވާލައްވާފައެވެ. މިހާރު މަޖިލީހުގެ މެޖޯރިޓީ އޮތް އިރު ވެސް ސަރުކާރުން ދަނީ ދޮގުހަދަމުން ކަމަށާއި އެމްޑީޕީ އަށް މެޖޯރިޓީ ނެތް ހާލަތުގައި ގައުމުގެ ހާލަތު ތަސައްވުރު ވެސް ނުކުރެވޭ ކަމަށް އޭނާ ވިދާޅުވިއެވެ. ފާއިތުވި ތިން މަސް ދުވަހަށް ނަޒަރު ހިންގާލާ އިރު މި ސަރުކާރުން ވެރިކަމަށް އައި ފަހުން ކިހާ ދޮގެއް ހަދާފައިވޭތޯ ސުވާލުކޮށްލަން ޖެހޭ ކަމަށް އޭނާ ވިދާޅުވިއެވެ. އަދި މި ތިން މަސް ދުވަސް 5 އަހަރު ދުވަހަށް ބަދަލުވެގެން ދާއިރު މަޖިލީހުގެ މެޖޯރިޓީ ނެތް ނަމަ ދެން ޤައުމަށް ވެގެންދާނެ ގޮތަކާއި މެދު އާއްމުން މިއަދު ވިސްނާލަން ޖެހޭ ކަމަށް މެންބަރު ވިދާޅުވިއެވެ. 5 އަހަރުގެ ފުރިހަމަ ދައުރެއް މި ސަރުކާރުން އަދާ ކުރާ އިރު ވަރަށް ބައިވަރުކަންކަން ގޯސްކޮށް ހިނގާނެ ކަމަށާއި އެހެންކަމުން ޤައުމު ހަމަމަަގަށް އަޅުވަން އެމްޑީޕީގެ ދައުރު މުހިންމު ކަމަށް އޭނާ ވިދާޅުވިއެވެ.

އިތުރަށް ވާހަކަދައްކަވަމުން މެންބަރު މުހައްމަދު ރަޝީދު ވަނީ މަޖިލީހުގެ ބައެއް އިތުރު ކަންކަމާއި ގުޅޭގޮތުން ވެސް ވާހަކަދައްކަވާފައެވެ. އެގޮތުން މަޖިލީހުގެ ތިން ދައުރު މަޖިލީހުގައި ހޭދަ ކުރި އިރު މަޖިލީހުގައި އަންހެނުން މަދުކަން ފާހަގަކުރެވޭ ކަމަށާއި އެހެންކަމުން އެމްޑީޕީގެ ފަރާތުން ކުރިމަތިލާފައިވާ އަންހެން ބޭފުޅުން ހޮވުމަށް އޭނާ ވަނީ ގޮވާލައްވާފައެވެ.