ކުންފުނީގެ 40 އަހަރުގެ ދިގު ތާރީޚުގައި ހަވާލުކުރެވުނު އެންމެ ބޮޑު ޢުމްރާނީ ތަރައްގީގެ މަޝްރޫޢުގައި އެމްޓީސީސީން ސޮއިކޮށްފިއެވެ.

މިއީ ރ. އަލިފުށީ ބިންހިއްކުމާއި އެއަރޕޯޓް ތަރައްގީ ކުރުމުގެ މަޝްރޫޢެވެ. މި މަޝްރޫޢު ހަވާލުކުރުމަށް ބުދަ ދުވަހު މިނިސްޓްރީ އޮފް ނޭޝަނަލް ޕްލޭނިންގް، ހައުސިންގ އެންޑް އިންފްރާސްޓްރަކްޗަރ ގައި ބޭއްވި ރަސްމިއްޔާތުގައި، އެމްޓީސީސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ އާދަމް ޢާޒިމެވެ. އަދި މިނިސްޓްރީގެ ފަރާތުން ސޮއިކުރެއްވީ ޑިރެކްޓަރ ޖެނެރަލް ފާޠިމަތު ޝާނާ ފާރޫޤެވެ.

ޑިޒައިން އެންޑް ބިލްޑް އުސޫލުން ހަވާލުކުރެވުނު މިމަޝްރޫޢުގެ ދަށުން ރ. އަލިފުށީގެ 50.5 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މި ބިމުގެ ތެރެއިން 10 ހެކްޓަރުގެ ބިމަކީ ރަށުގެ ތަރައްގީއާއި ގެދޮރުވެރިކަމުގެ ބޭނުމަށް ޚާއްސަކުރެވިގެން ހިއްކޭ ބިމެކެވެ. އަދި ބާކީ 40.5 ހެކްޓަރު ބިމަކީ އެއަރޕޯޓް ތަރައްގީކުރުމަށް ހިއްކޭ ބިމެކެވެ. މި މަޝްރޫޢުގެ ދަށުން، 1200 މީޓަރުގެ ރަންވޭއެއް އެޅުމާއި، ޓެކްސީވޭ، އޭޕްރަން އަދި ސަރވިސް ރޯޑު ހެދުމުގެ މަސައްކަތް ވަނީ މިކުންފުންޏާއި ހަވާލުކޮށްފައެވެ. އަދި ހިއްކާ ބިމުގެ ގޮނޑުދޮށް ހިމާޔަތްކުރުމުގެ ގޮތުން 2871 މީޓަރުގެ ރިވެޓްމަންޓަކާއި، 480 މީޓަރުގެ ގްރޮއިންއެއްވެސް ގާއިމުކުރެވިގެންދާނެއެވެ.

މިއީ 451.61 މިލިއަން ރުފިޔާ ގެ މަޝްރޫޢެކެވެ. މި މަޝްރޫޢުގެ ނިންމުމަށް ހަމަޖެހިފައިވަނީ 750 ދުވަހުގެތެރޭގައެވެ.

މި މަޝްރޫޢަކީ އަގުގެ ގޮތުންނާއި، މަޝްރޫޢުގެ ދަށުން ކުރަންޖެހޭ މަސައްކަތުގެ ގޮތުން އެމްޓީސީސީގެ 40 އަހަރުގެ ދިގު ތާރީޚުގައި ސަރުކާރުން އެ ކުންފުންޏާ ހަވާލުކުރެއްވި އެންމެ ބޮޑު މަޝްރޫޢެވެ. އެގޮތުން ސަރުކާރުން މިކުންފުންޏަށް ދެއްވާ އެއްބާރުލެއްވުމާއި އެހީތެރިކަމާއި ކުރައްވާ އިތުބާރު ފާހަގަކޮށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށާއި, މިނިސްޓަރ އޮފް ނޭޝަނަލް ޕްލޭނިންގް، ހައުސިންގ އެންޑް އިންފްރާސްޓްރަކްޗަރ އަލްފާޟިލް މުޙައްމަދު އަސްލަމަށާއި, މިނިސްޓަރ އޮފް ފައިނޭންސް އަލްފާޟިލް އިބްރާހީމް އަމީރަށް އެމްޓީސީސީން ވަނީ ޝުކުރު ދަންނަވާފައެވެ. އަދި ރާއްޖޭގެ ޢުމްރާނީ ތަރައްގީގެ ބައިވެރިއެއްގެ ގޮތުން އެމްޓީސީސީން ކުރަމުންގެންދާ މަސައްކަތް ދެގޮތެއްނުވެ, ހަލުވިކަމާއެކު ކުރިއަށް ގެންދާނެކަމުގެ ޔަގީންކަން ދިވެހި ސަރުކާރަށާއި ދިވެހި ރައްޔިތުންނަށް އަރުވާ ކަމަށް އެމްޓީސީސީން ބުނެއެވެ.

ބިން ހިއްކައިގެން އެމްޓީސީސީން ތަރައްގީ ކުރާ މިއީ 3 ވަނަ އެއަރޕޯޓެވެ. މީގެ ކުރިން ހޯރަފުށީ ފަޅުން ބިން ހިއްކައިގެން އެއަރޕޯޓެއް ތައްޔާރުކޮށްފައިވާ އިރު، ގދ. ފަރެސްމާތޮޑާ އެއަރޕޯޓުވެސް (ފަޅުރައްތައް ހިމެނޭގޮތަށް) ބިން ހިއްކައިގެން އަންނަނީ ތަރައްގީ ކުރަމުންނެވެ.