މި އެއް އަހަރު ފެނިގެން ދިޔައީ ބާރުވެރިކަން އެއްކުރުމުގެ ހުރިހާ ސިފައެއް ސަރުކާރުގައި މޫލާ އަށަގަނެފައިވާ މަންޒަރު - ބިގޭ

މި އެއް އަހަރު ފެނިގެން ދިޔައީ ބާރުވެރިކަން އެއްކުރުމުގެ ހުރިހާ ސިފައެއް ސަރުކާރުގައި މޫލާ އަށަގަނެފައިވާތަން ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.

ބުދަ ދުވަހު މަޖިލިސް ކައިރީގައި ކުރިއަށް ދިޔަ އިހުތިޖާޖުގެ ތެރެއިން ރާއްޖެޓީވީ އަށް ދެއްވި ބަސްތީގަތުމެއްގައި އޭނާ ވިދާޅުވީ ޕީޕީއެމް ޕީއެންސީގެ ފިކުރަކީ ބާރުތައް އެއްކުރުމުގެ ވިސްނުމެއް ކަމަށެވެ. އެކަން އެ ޕާޓީތަކުން ވެރިކަން ކުރި ގޮތަށް ބެލުމުން ވަރަށް ސާފުކޮށް އެނގެން އޮތް ކަމަށް އޭނާ ވިދާޅުވިއެވެ. އެގޮތުން ޕީޕިއެމް ވެރިކަމުގައި ވެސް އެކަން ވަރަށް ރަނގަޅަށް ފެނިގެން ދިޔަ ކަމަށް އޭނާ ވިދާޅުވިއެވެ އެހެނެންނަމަވެސް އެމްޑީޕީގެ ވެރިކަމުގައި މަޖިލީހުގެ ފުރިހަމަ މެޖޯރިޓީ އެމްޑީޕީ އަށް އޮތް އިރު ވެސް އެމްޑީޕީން އަމަލުކޮށްފައިވާނީ ތިން ބާރު އެއް ނުވާ ގޮތަށް ކަމަށް އޭނާ ވިދާޅުވިއެވެ. އޭރު އެންޓި ޑިފެކްޝަން ޤާނޫނުގެ މަސައްކަތް ވެސް ކުރިއަށް ގެންދިޔައީ އެގޮތުގެ މަތިން ކަމަށާއި މިހާރު އެފަދަ މަންޒަރެއް ނުފެންނަ ކަމަށް ވިދާޅުވިއެވެ.

Advertisement

ދޮގާއި މަކަރާއި އޮޅުވާލައިގެން ވެރިކަމަށް އައިސް ރައްޔިތުންގެ ހައްގުތައް ހަނިކުރާކަމަށް އޭނާ ވިދާޅުވިއެވެ. އޭނާ ވަނީ މެމްބަރުންގެ ބާރުތައް ހަނިކޮށް ތަޅުއަޅުވަމުންދާކަމަށް ސިފަކުރައްވާފައެވެ. އަދި މިހާރު ސަރުކާރުން މެމްބަރުން ކަސްތޮޅުއަޅުވާފައިވާ ކަމަށް އޭނާ ވަނީ ސިފަކުރައްވާފައެވެ. ޤާނޫނަށް ގެނައި އިސްލާހާއި އެކު މެމްބަރުން ތަޅުއެޅުވުމުން ކުރިއަށް އޮތްތަނުގައި މެމްބަރުންނަށް އަނގަ ހުޅުވާލަން ވެސް ފުރުސަތު ނުލިބޭނެ ކަމަށް އޭނާ ވިދާޅުވިއެވެ. ރައީސް ޑރ.މުހައްމަދު މުއިއްޒު ހިތްހަމަ ނުޖެހޭ ގޮތަށް މެމްބަރަކަށް ދެން އެއްވެސް ކަމެއް ނުކުރެވޭނެ ކަމަށް އޭނާ ވަނީ ވިދާޅުވެފައެވެ. މިއީ މަޖިލީހުގެ ބާރު ކެނޑި އަޅުވެތިކަމަށް ވެއްޓުން ކަމަށް އޭނާ ވަނީ ސިފަކުރައްވާފައެވެ.

ރައްޔިތުންގެ މަޖިލީހުގެ މެމްބަރަކު ސިޔާސީ ޕާޓީ ބަދަލުކޮށްފިނަމަ ނުވަތަ އެ މެންބަރަކު ޕާޓީން ވަކިކޮށްފިނަމަ ނުވަތަ އަމިއްލަ މެންބަރަކު ޕާޓީއަކާއި ގުޅިއްޖެނަމަ މަޖިލީހުގެ މެންބަރުކަން ގެއްލޭގޮތަށް ޤާނޫނުއަސާސީ އަށް ގެނައި އިސްލާހު ރައީސުލްޖުމްހޫރިއްޔާ މުޙައްމަދު މުޢިއްޒު ބުދަ ދުވަހު ތަސްދީޤުކުރެއްވީ ބުރާސްފަތި ދުވަހުއެވެ.

ގާނޫނު އަސާސީ އަށް މި ގެނައި ބަދަލު ތަސްދީގު ކުރުމާއެކު، ރައްޔިތުންގެ މަޖިލީހުގެ މެމްބަރަކު ސިޔާސީ ޕާޓީ ބަދަލު ކޮށްފިނަމަ ނުވަތަ އެ މެންބަރަކު ޕާޓީން ވަކިކޮށްފި ނަމަ ނުވަތަ އަމިއްލަ މެމްބަރަކު މަޖިލީހުގެ އުމުރުގެ ތެރޭގައި ޕާޓީއަކާ ގުޅިއްޖެނަމަ މަޖިލީހުގެ މެންބަރުކަން ގެއްލޭނެއެވެ.

ވެރިކަންކުރާ ޕީއެންސީގެ މެމްބަރު، ހުޅުދޫ ދާއިރާގެ މެންބަރު މުޙައްމަދު ޝާހިދު ހުށަހެޅުއްވި ޤާނޫނުއަސާސީ އަށް ބަދަލު ގެނައުމުގެ ބިލުގެ ފުރަތަމަ ކިޔުން އިއްވީ ބުދަ ދުވަހުގެ ހެނދުނެވެ.

ޤާނޫނު އަސާސީ އަށް ބަދަލު ގެންނަން ހުށަހެޅި ބިލު 69 މެންބަރުންގެ ވޯޓުން މަޖިލީހަށް ބަލައިގަންނަން ފާސް ކުރީ ބުދަ ދުވަހުގެ މެންދުރު ކުރިންނެވެ.