އަލިފުށީ ބިންހިއްކައި އެއަރޕޯޓް އެޅުމަށް އެމްޓީސީސީއަށް

ރ. އަލިފުށީގައި އެއާޕޯޓް އެޅުމަށް އެމްޓީސީސީއާ ހަވާލުކޮށްފިއެވެ.

އަލިފުށީގައި އެއަރޕޯޓު އެޅުމަށް ބޭނުންވާ ބިން ހިއްކައި، އެއަރޕޯޓު ތަރައްގީކުރުމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން އެމްޓީސީސީއާ ހަވާލުކޮށްފައިވަނީ ދެ އަހަރު ދުވަހުގެ ތެރޭގައި ނިންމާގޮތަށެވެ. ޑިޒައިން އެންޑް ބިލްޑް އުސޫލުން ތަރައްޤީކުރާ މި މަޝްރޫއު އެކުންފުންޏާ ޙަވާލުކޮށްފައިވަނީ 451.6 މިލިއަނަށްވުރެ ގިނަ ރުފިޔާއަށެވެ.

އަލިފުށީގައި އެއާޕޯޓް އެޅުމުގެ މަސައްކަތް ސަރުކާރުން އެމްޓީސީސީއާ ހަވާލުކުރީ 750 ދުވަހުގެ ތެރޭގައި އެ މަސައްކަތް ނިންމާ ގޮތަށެވެ. މި މަޝްރޫޢުގައި އެރަށު ބިން ހިއްކުން ވެސް ހިމެނެއެވެ.

އެމްޓީސީސީގެ ސީއީއޯ އާޒިމް ވިދާޅުވީ، މިއީ އެމްޓީސީސީގެ ހަޔާތުގައި މިހާ ބޮޑު ޕްރޮޖެކްޓެއް ސަރުކާރުން ހަވާލުކުރާ ފުރަތަމަ ފަހަރުކަމަށާއި، މިކަމުން އެނގިގެންދަނީ އެމްޓީސީސީއަށް އޮތް އިތުބާރު ބޮޑުކަން ކަމުގައެވެ. މިއީ އެމްޓީސީސީން ކުރަމުން އަންނަ މަސައްކަތް ސަރުކާރުން ބަލައިގަތް ކަމުގެ ނިޝާނެއް ކަމަށް އާޒިމް ވިދާޅުވިއެވެ. އަދި ސަރުކާރުން ދީފައިވާ މުއްދަތުގެ ތެރޭގައި މި މަޝްރޫއު ނިންމާލެވޭނެ ކަމަށާއި، ސައިޓް މޮބިލައިޒްކުރުމުގެ މަސައްކަތް ވަރަށް އަވަހަށް ފަށައި، އަމަލީ މަސައްކަތް ފެށިގެންދާނެ ކަމަށް އާޒިމް ވިދާޅުވިއެވެ. އަދި އަވަސް ތަރައްގީއެއް ގެނައުމަށްޓަކައި ސަރުކާރުން ކުރަމުންދާ މަސައްކަތަށް އެކުންފުނީގެ ފަރާތުން ފުރިހަމައަށް އެއްބާރުލުން ދޭނެ ކަމަށެވެ.

އެއަރޕޯޓު އެޅުމަށާއި ތަރައްގީގެ އިތުރު މަޝްރޫއުތަކަށް އަލިފުށިން 50.5 ހެކްޓަރުގެ ބިން ހިއްކުމަށްވަނީ ހަމަޖެހިފައެވެ. މީގެތެރެއިން 40.5 ހެކްޓަރުގެ ބިމަކީ އެއަރޕޯޓު ހެދުމަށް ޚާއްސަކޮށްފައިވާ ބިމެވެ. އަދި އަނެއް 10 ހެކްޓަރުގެ ބިމަކީ ރަށުގެ ތަރައްގީއަށާއި ގެދޮރުވެރިކަމަށް ބޭނުންކުރުމަށް ހިއްކާ ބިންކަމުގައި ޕްލޭނިންގ މިނިސްޓްރީން ވިދާޅުވެއެވެ. 1200 މީޓަރުގެ ދިގު ރަންވޭއަކާއެކު އެއަރޕޯޓަށް ބޭނުންވާ ޢުމްރާނީ ތަރައްގީ ގާއިމުކުރުމަށް ހަމަޖެހިފައިވާއިރު މިކަމަށް ހިއްކާ ބިން ހިމާޔަތްކުރުމަށް 2871 މީޓަރުގެ ރިވެޓްމަންޓަކާއި 480 މީޓަރުގެ ފައިކަށި ޖެހުމަށް ހަމަޖެހިފައިވެއެވެ.