ޣައްޒާ ހަނގުރާމައާ ގުޅޭ ގޮތުން ޓްރަމްޕް، ޔޫއޭއީގެ ރައީސްއާ މަޝްވަރާ ކުރައްވައިފި

އިސްރާއީލުން ޣައްޒާގައި ހިންގަމުން އަންނަ ހަނގުރާމަ ނިންމުމާ ގުޅޭ ގޮތުން، އެމެރިކާގެ ރައީސް ޑޮނަލްޑް ޓްރަމްޕް، ޔުނައިޓެޑު އަަރަބް އެމިރޭޓްސް (ޔޫއޭއީ)ގެ ރައީސް ޝައިޚް މުޙައްމަދު ބިން ޒާޔިދުއާ މަޝްވަރާ ކުރައްވައިފި އެވެ.

އެމިރޭޓްސް ނިއުސް އޭޖެންސީ (ވާމް) އިން ވަނީ އެކަން ރިޕޯޓުކޮށްފަ އެވެ. 

ފޯނު މެދުވެރިކޮށް ދެ ރައީސުން މަޝްވަރާ ކުރައްވާފައިވާ ކަންތައްތަކުގެ ތެރޭގައި، އެމެރިކާ އާއި ޔޫއޭއީއާ ދެމެދު އޮތް ޒަމާންވީ ގުޅުން ބަދަހި ކުރުމާއި، މި ފަހުން ޔޫއޭއީގެ ޤައުމީ ސަލާމަތާ ބެހޭ އެޑްވައިޒަރު. ޝައިޙް ތަޙްނޫން ބިން ޒާޔިދު އެމެރިކާ އަށް ކުރެއްވި ދަތުރުފުޅާ ގުޅޭ ގޮތުން ވެސް ވަނީ މަޝްވަރާ ކުރައްވާފައި އެވެ. 

މި ދަތުރުފުޅުގައި، ޔޫއޭއީ އިން ވަނީ އެމެރިކާގައި 10 އަހަރުގެ މުއްދަތަށް 1.4 ޓްރިލިއަން ޑޮލަރުގެ އިންވެސްޓްމަންޓެއް ކުރުމަށް އެއްބަސްވެފައިވެ އެވެ.

މި އިންވެސްޓްމަންޓް އަމާޒު ކުރެވިފައި ވަނީ އާޓިފިޝަލް އިންޓެލިޖެންސް އިންފްރާސްޓްރަކްޗަރ، ސެމިކޮންޑަކްޓަރސް، ހަކަތަ އަދި އެމެރިކާގެ މެނުފެކްޗަރިންގެ ދާއިރާ އަށެވެ.

ޣައްޒާގެ ހާލަތާ ގުޅޭ ގޮތުން، ޔޫއޭއީގެ ރައީސް ޝެއިޚް މުޙައްމަދު ވިދާޅުވެފައި ވަނީ ޣައްޒާގެ ރައްޔިތުންނަށް އެހީތެރިކަން ފޯރުކޮށް ދިނުމަކީ ވަރަށް މުހިންމު ކަމެއް ކަމަށް ވިދާޅުވެފައި އެވެ.

އަދި ދެ ދައުލަތުގެ ޙައްލަކީ ސަރަހައްދުގައި ދެމެހެއްޓެނިވި، އަދި އަދުލުވެރި ސުލްހައެއް ގާއިމު ކުރުމަށް މުހިންމު ކަމެއްކަން ފާހަގަ ކުރެއްވި އެވެ.