މި ސަރުކާރަށް މަޖިލީހުގެ މެޖޯރިޓީ ލިބިއްޖެނަމަ މިނިވަންކަން ގެއްލި އަނިޔާވެރިކަން އިސްކުރާނެ - ފައްޔާޒް
21 މާރިޗު 2024 | ބުރާސްފަތި 08:37ސަރުކާރުން ބޭނުންހާ ގޮތަކަށް ކަންކަން ކުރަން ޖާގަ ނުދެވޭނެ ކަމަށާއި އަނިޔާވެރިކަމަށް އަލުން ފުރުސަތު ނުދޭނެ ކަމަށް ފައްޔާޒް ވިދާޅުވި
މިސްރާބު ހަމަމަގަށް ކެމްޕެއިން ޖަލްސާގެ ތެރެއިން
މި ސަރުކާރަށް މަޖިލީހުގެ މެޖޯރިޓީ ލިބިއްޖެނަމަ މިނިވަންކަން ގެއްލި އަނިޔާވެރިކަން އިސްކުރާނެ ކަމަށް އެމްޑީޕީގެ ޗެއަރޕަރސަން އަދި ކުރީގެ ސަރުކާރުގެ އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެއްޖެއެވެ.
ފައްޔާޒް މިހެން ވިދާޅުވީ ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ޓިކެޓުގައި މާފަންނު އުތުރު ދާއިރާއަށް ވާދަކުރައްވާ އިފްހާމް ހުސެއިން ބުދަ ދުވަހުގެރޭ ބޭއްވި ކެމްޕޭނު ބައްދަލުވުމުގައި ވާހަކަ ދައްކަވަމުންނެވެ.
އެގޮތުން، މިހާރުގެ ސަރުކާރަށް މެޖޯރިޓީ ލިބިއްޖެ ނަމަ އަނިޔާވެރިވާނެކަމާ މެދު ޝައްކެއް ނެތް ކަމަށް ފައްޔާޒް ވިދާޅުވިއެވެ. މީގެ ކުރިން ވެސް މި ސަރުކާރުން އެމްޑީޕީގެ އަނގަ ބަންދުކުރަން މަސައްކަތް ކުރި ކަމަށާއި އެކަން ނުވީ އެމްޑީޕީގެ މެޖޯރިޓީ މަޖިލީހުގައި އޮތުމުން ކަމަށް ފައްޔާޒް ވިދާޅުވިއެވެ. މި ސަރުކާރަށް މަޖިލީހުގެ މެޖޯރިޓީ ލިބިއްޖެއްޔާ ހީ ނުކުރާ ވަރަށް ސަރުކާރުގެ އަނިޔާވެރިކަން ފެނިގެންދާނެ ކަމަށް ފައްޔާޒް ވިދާޅުވިއެވެ. އަދި މި ސަރުކާރުން ދަނީ ދޮގު މައްޗަށް ދޮގު ހަދަމުންކަން ފާހަގަކުރައްވާ ފައްޔާޒް ވަނީ ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. މި ސަރުކާރަށް ހެޔޮ ވެރިކަމެއް ކޮށްދެވޭނެ ކަަމަށް ކޮންމެވެސް ވަރަކަށް ކުރިން އުންމީދު ކުރެއްވި ނަމަވެސް، ސަރުކާރުން ހަދަމުންދާ ދޮގުތައް ހާމަވުމުން، މިހާރު މި ސަރުކާރަށް ހެޔޮ ވެރިކަމެއް ކޮށްދެވިދާނެ ކަމަށް ޤަބޫލުނުކުރައްވާ ކަމަށް ފައްޔާޒް ވިދާޅުވިއެވެ. އެހެންކަމުން ސަރުކާރުން ބޭނުންހާ ގޮތަކަށް ކަންކަން ކުރަން ޖާގަ ނުދެވޭނެ ކަމަށާއި އަނިޔާވެރިކަމަށް އަލުން ފުރުސަތު ނުދޭނެ ކަމަށް ފައްޔާޒް ވިދާޅުވިއެވެ.
ފައްޔާޒް ވަނީ މި ސަރުކާރުން ގޯތި ދޭނެ ކަމަށް ބުނެ ދޮގު ހަދަމުންދާ ކަމަށާއި ގޯތި ދޭނެ ނަމަ ގޯތީގެ މައްސަލަ ބަލަން ކޮމިޓީ އެއް އެކުލަވާލަން ޖެހޭ ސަބަބެއް ނެތް ކަމަށް ވިދާޅުވެފައެވެ. ރައީސް ޑރ. މުއިއްޒު ވެރިކަމަށް ވަޑައިގަތުމުގެ ކުރިން ކުރީ ސަރުކާރުން ގޯތި ދިންތަނަކުން ދިން މިންވަރަކަށް އާއްމުންނާއި އެތަންތަން ހަވާލުކުރައްވާނެ ކަމަށް ވައުދުވެވަޑައިގަންނަވާފައިވާތީ، އެ ވައުދު ފުއްދަވަން ޖެހިވަޑައިގަންނަވާނެކަމަށް ފައްޔާޒް ވިދާޅުވިއެވެ. މި ބައްދަލުވުމުގައި ފައްޔާޒް ވަނީ ނިމިދިޔަ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ދޫކުރަން ޖެހޭ ފްލެޓާއި ގޯތި ނުދީ މި ސަރުކާރުން އެތަންތަން ހިފަހައްޓާތީ އެކަމާ މެދު ވަރަށް ބޮޑަށް ނުރުހުން ފާޅުކުރައްވާފައެވެ.
